മലേഷ്യയെ 5-1ന് തകർത്ത് ഇന്ത്യ; ഏഷ്യൻ ഗെയിംസിൽ പുരുഷ ഹോക്കിയിൽ സ്വർണം

ഐച്ചി-നഗോയ 2026 ഏഷ്യൻ ഗെയിംസിൽ പുരുഷ ഹോക്കിയിൽ ഇന്ത്യയ്ക്ക് സ്വർണം. ഫൈനലിൽ മലേഷ്യയെ 5-1ന് തകർത്താണ് ഇന്ത്യ കിരീടം നിലനിർത്തിയത്. ഏഷ്യൻ ഗെയിംസ് ചരിത്രത്തിൽ പുരുഷ ഹോക്കിയിൽ തുടർച്ചയായി രണ്ടാം തവണ സ്വർണം നേടുന്ന നേട്ടവും ഇന്ത്യ സ്വന്തമാക്കി.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ക്യാപ്റ്റൻ ഹർമൻപ്രീത് സിംഗ് ഇരട്ടഗോൾ നേടി ഇന്ത്യയുടെ വിജയത്തിൽ നിർണായക പങ്കുവഹിച്ചു. ആദ്യ ക്വാർട്ടറിലും നാലാം ക്വാർട്ടറിലും പെനാൽറ്റി കോർണർ ഗോളുകളിലൂടെയായിരുന്നു ഹർമൻപ്രീതിന്റെ നേട്ടം.

മലേഷ്യയുടെ ഷെല്ലോ സിൽവേറിയസ് ആദ്യ ക്വാർട്ടറിൽ ഗോൾ നേടി സമനില പിടിച്ചെങ്കിലും രണ്ടാം ക്വാർട്ടറിൽ ജുഗ്രാജ് സിംഗ് പെനാൽറ്റി കോർണറിലൂടെ ഇന്ത്യയെ വീണ്ടും മുന്നിലെത്തിച്ചു. തുടർന്ന് ഹാർദിക് സിംഗ് പെനാൽറ്റി സ്ട്രോക്കിലൂടെ ഇന്ത്യയുടെ ലീഡ് ഉയർത്തി.

പകരക്കാരനായി ഇറങ്ങിയ ശിലാനന്ദ് ലക്ര ഫീൽഡ് ഗോളിലൂടെ ഇന്ത്യയുടെ ലീഡ് 4-1 ആക്കി. മത്സരത്തിന്റെ അവസാന ഘട്ടത്തിൽ ഹർമൻപ്രീത് വീണ്ടും പെനാൽറ്റി കോർണർ ഗോളാക്കി മാറ്റിയതോടെ ഇന്ത്യ 5-1ന്റെ തകർപ്പൻ വിജയം ഉറപ്പിച്ചു.

ഈ നേട്ടത്തോടെ ഒരേ ഏഷ്യൻ ഗെയിംസ് പതിപ്പിൽ പുരുഷ-വനിതാ ഹോക്കി ഇനങ്ങളിൽ ഇന്ത്യ സ്വർണം നേടുന്നത് ആദ്യമായാണ്. വനിതാ ഹോക്കിയിലും ഇന്ത്യ നേരത്തെ സ്വർണം നേടിയിരുന്നു.ഇരുടീമുകളുടെയും സ്വർണനേട്ടത്തോടെ 2028 ലോസ് ആഞ്ചലസ് ഒളിമ്പിക്സിലേക്കുള്ള യോഗ്യതയും ഇന്ത്യ ഉറപ്പാക്കി.

ടൂർണമെന്റിലെ മികച്ച ഗോൾവേട്ടക്കാരുടെ പട്ടികയിൽ ഹർമൻപ്രീത് സിംഗ് 10 ഗോളുകളുമായി രണ്ടാം സ്ഥാനത്താണ്. പാകിസ്ഥാന്റെ സുഫ്യാൻ ഖാൻ 12 ഗോളുകളുമായി ഒന്നാമതെത്തി. ഇന്ത്യയുടെ അഭിഷേക്, ദിൽപ്രീത് സിംഗ് എന്നിവർ ഒമ്പത് ഗോളുകൾ വീതം നേടി മൂന്നാം സ്ഥാനത്തുണ്ട്.

ALSO READ: വെറും 2800 രൂപയ്ക്ക് വാങ്ങിയ പഴയ ചിത്രം; വിറ്റപ്പോൾ കിട്ടിയത് 13 കോടി!

News Tag Live യുട്യൂബ് ചാനല്‍ Subscribe ചെയ്യുക