
അക്ബര് പൊന്നാനി
![]() |
|
ഒലിവ് ഓയില് ഉള്കൊള്ളുന്ന ആരോഗ്യ ഫലങ്ങളും പോഷക മൂല്യങ്ങളും ഇനിയും വിശദീകരിക്കേണ്ട, അത്രയ്ക്ക് സുവിദിതമാണത്. എന്നാല് ഒലിവ് മരത്തിന്റെ ഇലകളെ കുറിച്ച് നമ്മിലെത്ര പേര്ക്കറിയാം? എന്തറിയാം? ഓയിലിനേക്കാള് ഒട്ടും കുറവല്ല ആ വിശിഷ്ട മരത്തിന്റെ ഇല എന്ന് മാത്രം ആദ്യത്തില് മനസ്സിലാക്കുക.
അറബ് രാജ്യങ്ങളില് ഉള്പ്പെടെ ഭക്ഷണത്തിലെ ഒരു വിശേഷ വിഭവമാണ് ഒലിവെണ്ണ. ഒലിവ് കായയും എണ്ണയും ആരോഗ്യത്തിന് എത്രത്തോളം ഗുണകരവും ശരീരത്തെ പുഷ്ടിപ്പെടുത്തുന്ന ഒട്ടേറെ പോഷകങ്ങളാല് സമ്പന്നവുമാണ് അതെന്നത് തന്നെ അതിന് കാരണം.
എന്നാല്, ഒലിവ് മരത്തിന്റെ ഇലകള് അതില് നിന്നുള്ള എണ്ണയേക്കാള് ആരോഗ്യ പരിപാലനത്തിന് ഒട്ടും പിന്നിലല്ലെന്ന് സമീപകാല പഠനങ്ങള് വെളിച്ചത്ത് കൊണ്ട് വന്നിട്ടുണ്ട്.
ഉയര്ന്ന അളവിലുള്ള ആന്റിഓക്സിഡന്റുകള് അഥവാ ഒലിയൂറോപിന്:
ഒലിവ് ഇലകളില് ഉയര്ന്ന അളവില് ആന്റിഓക്സിഡന്റുകള് – പ്രത്യേകിച്ച് ഒലിയൂറോപിന് എന്ന സംയുക്തം ഉണ്ട്. ഒലിവ് മരങ്ങളുടെ (Olea europaea) ഇലകള്, പുറംതൊലി, പഴങ്ങള് എന്നിവയില് കാണപ്പെടുന്ന പ്രകൃതിദത്തമായ ഒരു സംയുക്തമാണ് ഒലിയൂറോപീന്. ഇത് ഒരു തരം പോളിഫെനോള് ആണ് – പ്രത്യേകിച്ച് ഒരു സെക്കോയിറിഡോയിഡ്. ഒലിവ് മരത്തിന്റെ പല ഔഷധ ഗുണങ്ങള്ക്കും നിദാനം തന്നെ ഇതിന്റെ സാന്നിധ്യമാണ്. ഒലിയൂറോപിന് എന്ന സംയുക്തം ഒലിവ് ഇലകളിലാണ് സമൃദ്ധമായി കാണപ്പെടുന്നത്.
ഒലിവ് കായയും ഒലിവെണ്ണയും ധാരാളമായി ഉപയോഗിക്കുന്ന പ്രദേശങ്ങളില് പരമ്പരാഗത മരുന്നായി ഒലിവ് ഇലകള് ഉപയോഗിച്ചുവരുന്നു. മെഡിറ്ററേനിയന് മേഖലയില് പനി, മലേറിയ, വാതം, ദഹന പ്രശ്നങ്ങള് തുടങ്ങിയ വിവിധ രോഗങ്ങള് ചികിത്സക്കായി ഒലിവ് ഇല വ്യാപകമായി ഉപയോഗിച്ച് വരുന്നു.
ആന്റിഓക്സിഡന്റുകള്: ഹൃദ്രോഗം, കാന്സര് എന്നിവയിലും ആശാവഹം
ഒലിയൂറോപിന് പുറമേ, ഒലിവ് ഇലകളില് ഹൈഡ്രോക്സിടൈറോസോള്, ല്യൂട്ടോലിന്, എപിജെനിന്, വെര്ബാസ്കോസൈഡ് തുടങ്ങിയ മറ്റ് ആന്റിഓക്സിഡന്റുകളും അടങ്ങിയിട്ടുണ്ടെന്നും പഠനങ്ങള് കണ്ടെത്തിയിട്ടുണ്ട്. ഈ സംയുക്തങ്ങള് ശരീരത്തിലെ ഡി എന് എ കോശ സ്തരങ്ങള്, കലകള് എന്നിവയ്ക്ക് കേടുപാടുകള് വരുത്തുന്ന ഒരു പ്രധാന ഘടകമായ ഓക്സിഡേറ്റീവ് സ്ട്രെസ്സുകള് കുറയ്ക്കാന് സഹായിക്കുന്നു. അതുവഴി ഹൃദ്രോഗം, കാന്സര് തുടങ്ങിയ മാരകമായ രോഗങ്ങളെ തടയുന്നതിന് സഹായകരമാവുകയും ചെയ്യുന്നു.
പ്രത്യാശ തുളുമ്പുന്ന ആരോഗ്യ ഫലങ്ങള്
സൗത്ത് ഓസ്ട്രേലിയ സര്വകലാശാലയിലെ ഗവേഷകര് 819 പേരില് നടത്തിയ 12 പഠനങ്ങളും പരീക്ഷണങ്ങളും വിശകലനം ചെയ്തപ്പോള്, ഒലിവ് ഇലയുടെ സത്ത് രക്തത്തിലെ കൊഴുപ്പിന്റെ അളവ് ക്രമപ്പെടുത്തുകയും രക്തസമ്മര്ദ്ദം അഭികാമ്യമായ വിധത്തിലാക്കുകയും ചെയ്യുന്നുവെന്ന് കണ്ടെത്തുകയുണ്ടായി. വിശേഷിച്ചും ഉയര്ന്ന രക്തസമ്മര്ദ്ധം ഉള്ളവരുടെ കാര്യത്തില്.
ആറാഴ്ച്ച മുതല് 48 ആഴ്ച വരെയുള്ള കാലയളവില് പ്രതിദിനം 500 മില്ലിഗ്രാം മുതല് 5 ഗ്രാം വരെയാണ് ഉപയോഗിച്ച പഠന വേളയില് ഉപയോഗിച്ച ഡോസുകള്.
ഷുഗറും പ്രഷറും ക്രമപ്പെടുത്താം
ഒളിവില മാഹാത്മ്യം സംബന്ധിച്ച മറ്റൊരു പഠനത്തില് നിന്ന് രക്തത്തിലെ പഞ്ചസാര, ലിപിഡ് അളവ്, രക്തസമ്മര്ദ്ദം എന്നിവ ക്രമപ്പെടുത്താനും ഒളിവില പ്രയോജനകരമാണെന്ന് കണ്ടെത്തുകയുണ്ടായി. പഠനത്തില് പങ്കെടുത്ത 703 പേരില് നടത്തിയവര് ദിവസേന 250 മുതല് 1,000 മില്ലിഗ്രാം വരെ ഒലിവ് ഇല സത്ത് കഴിക്കുകയുണ്ടായി. ഫലമോ, രക്തത്തിലെ പഞ്ചസാര, ലിപിഡ് അളവ്, രക്തസമ്മര്ദ്ദം എന്നിവയില് ആശാവഹമായ പുരോഗതിയും!
പ്രയോജനങ്ങള് പിന്നെയും
ഒലിയൂറോപിന്, ഹൈഡ്രോക്സിടൈറോസോള് എന്നിവയെക്കുറിച്ചുള്ള പഠനങ്ങള് ശരീര ഭാരം, ലിപിഡ് അളവ്, അസ്ഥികളുടെയും സന്ധികളുടെയും ആരോഗ്യം, ഗ്രാഹ്യശേഷി എന്നിവയിലും പുരോഗതി കണ്ടെത്തിയിട്ടുണ്ട്.
ഒലിവ് ഇല ഇങ്ങിനെയൊക്കെ സേവിക്കാം
ആരോഗ്യ ഗവേഷകര് ഒലിവ് ഇലയുടെ വിവിധ തരത്തിലുള്ള ഉപയോഗം ഉപദേശിക്കുന്നുണ്ട്. ചായയായി ചേര്ത്ത് കഴിക്കുക, സലാഡുകളില് ഉള്പ്പെടുത്തുക, ഭക്ഷ്യവസ്തുക്കളില് പൊടിച്ചു ചേര്ത്ത് സേവിക്കുക, ജ്യൂസുകളില് ചേര്ക്കുക, ബേക്കിംഗില് ഒരു ചേരുവയായി ഉപയോഗിക്കുക എന്നിങ്ങനെയൊക്കെ ഒലിവ് ഇലയുടെ ആരോഗ്യ ഗുണങ്ങള് അനുഭവിക്കാം. ഇതിലൂടെയെല്ലാം ഇലയിലെ ആന്റിഓക്സിഡന്റ് സ്വായത്തമാക്കാം.
ദിനേനയുള്ള ഉചിതമായ അളവ്
ഒലിവ് ഇലയുടെ സത്ത് പ്രതിദിനം ഒരു ഗ്രാം വരെ അളവില് കഴിക്കുന്നത് സുരക്ഷിതമാണെന്ന് കണക്കാക്കപ്പെടുന്നു, അതോടൊപ്പം, പ്രതിദിനം ശരീര ഭാരത്തിന് ഒരു കിലോയ്ക്ക് 85 മില്ലിഗ്രാം എന്ന തോതിലും കൂടുന്നത് വിപരീത ഫലത്തിന് ഇടവെച്ചേക്കാം എന്നാ ആശങ്കയും നിലവിലുണ്ട്.
എന്നാല് ഗര്ഭിണികളും മുലയൂട്ടുന്നവരും ജാഗ്രതൈ
എന്നാല്, ഇതെല്ലാമാണെങ്കിലും രണ്ടു വിഭാഗം സ്ത്രീകള് ജാഗ്രത പാലിക്കുന്നതാണ് നല്ലത്. ഗര്ഭിണികളും മുലയൂട്ടുന്ന അമ്മമാരും ആണ് ആ രണ്ടു വിഭാഗം സ്ത്രീകള്. അവരുടെ കാര്യത്തില് ഒലിവ് ഇല കഴിക്കുന്നത് എത്രത്തോളം സുരക്ഷിതമാണെന്ന കാര്യത്തില് മതിയായത്ര തോതിലുള്ള ഡാറ്റ ലഭ്യമല്ലെന്ന കാരണം കൊണ്ടാണ് ഈ ജാഗ്രതാ പാലനമാണ് നല്ലതെന്ന ഉപദേശം.