19
Nov 2026
Thu
19 Nov 2026 Thu
Myanmar committed genocide against its Rohingya minority rules UN's top court

ഹേഗ്: 2017ൽ റോഹിങ്ക്യൻ മുസ്‌ലിം ന്യൂനപക്ഷത്തിനെതിരെ മ്യാൻമർ സൈന്യം നടത്തിയ സൈനിക നടപടികൾ വംശഹത്യയാണെന്ന് അന്താരാഷ്ട്ര നീതിന്യായ കോടതി (ഐസിജെ) വിധിച്ചു. ആയിരക്കണക്കിന് റോഹിങ്ക്യൻ സാധാരണക്കാരെ കൊലപ്പെടുത്തിയ സംഭവത്തിൽ മ്യാൻമർ വംശഹത്യാ കൺവെൻഷൻ ലംഘിച്ചതായും കോടതി കണ്ടെത്തി. ഒൻപത് ജഡ്ജിമാർ വിധിയെ അനുകൂലിച്ചപ്പോൾ ആറുപേർ എതിർത്തു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

2017ൽ വടക്കൻ റാഖൈൻ സംസ്ഥാനത്ത് നടന്ന സൈനിക നടപടികളിൽ ഏകദേശം 10,000 റോഹിങ്ക്യക്കാർ ക്രൂരമായി കൊല്ലപ്പെട്ടതായാണ് കോടതിയുടെ കണ്ടെത്തൽ. സൈനിക നടപടികളിൽ നിന്ന് രക്ഷപ്പെടാൻ ബംഗ്ലാദേശിലേക്ക് പലായനം ചെയ്യാൻ ശ്രമിച്ച റോഹിങ്ക്യൻ സാധാരണക്കാർക്കു നേരെ മ്യാൻമർ സുരക്ഷാസേന ആക്രമണം നടത്തിയെന്നും കോടതി ചൂണ്ടിക്കാട്ടി.

റോഹിങ്ക്യൻ സായുധസംഘടനയായ അരക്കാൻ റോഹിങ്ക്യ സാൽവേഷൻ ആർമി (ആർസ) 2017 ഓഗസ്റ്റിന് മുമ്പ് നടത്തിയ ആക്രമണങ്ങളും കോടതി അംഗീകരിച്ചു. എന്നാൽ ഇതിന്റെ പേരിൽ സാധാരണക്കാർക്കെതിരെ നടന്ന സൈനിക അതിക്രമങ്ങളെ ന്യായീകരിക്കാനാവില്ലെന്നാണ് കോടതി വിലയിരുത്തിയത്. വംശഹത്യാ ഉദ്ദേശ്യത്തോടെയാണ് മ്യാൻമർ സുരക്ഷാസേന പ്രവർത്തിച്ചതെന്നതിന് ന്യായമായ തെളിവുകളുണ്ടെന്നും ജഡ്ജി ഇവാസാവ യുജി നിരീക്ഷിച്ചു.

വംശഹത്യ തടയുന്നതിലും കുറ്റക്കാർക്കെതിരെ നടപടിയെടുക്കുന്നതിലും മ്യാൻമർ പരാജയപ്പെട്ടതായി കോടതി കണ്ടെത്തി. സുരക്ഷാസേനയോടൊപ്പം പ്രവർത്തിച്ച വ്യക്തികൾ നടത്തിയ വംശഹത്യാ കുറ്റകൃത്യങ്ങൾ തടയുന്നതിലും കുറ്റക്കാരെ ശിക്ഷിക്കുന്നതിലും രാജ്യം വീഴ്ചവരുത്തി. വംശഹത്യാ കൺവെൻഷൻ നടപ്പാക്കുന്നതിനാവശ്യമായ നിയമനിർമാണം നടത്തുന്നതിലും മ്യാൻമർ പരാജയപ്പെട്ടതായി കോടതി വ്യക്തമാക്കി.

കുറ്റകൃത്യങ്ങളിൽ പങ്കുണ്ടെന്ന് സംശയിക്കാൻ ന്യായമായ കാരണമുള്ള എല്ലാവരെയും കണ്ടെത്തി അന്വേഷണം നടത്താനും നിയമനടപടി സ്വീകരിക്കാനും കോടതി മ്യാൻമറിനോട് നിർദേശിച്ചു. സമാനമായ അതിക്രമങ്ങൾ ആവർത്തിക്കാതിരിക്കാനുള്ള ഉറപ്പുകളും നടപടികളും സ്വീകരിക്കണമെന്നും വിധിയിൽ പറയുന്നു.

റോഹിങ്ക്യൻ സമൂഹത്തിന് സംഭവിച്ച നാശനഷ്ടങ്ങൾക്ക് മ്യാൻമർ നഷ്ടപരിഹാരം നൽകണമെന്നും കോടതി ഉത്തരവിട്ടു. നഷ്ടപരിഹാരത്തിന്റെ തുകയും അത് നൽകേണ്ട രീതികളും അന്താരാഷ്ട്ര നീതിന്യായ കോടതി പിന്നീട് നിശ്ചയിക്കും. വംശഹത്യയുമായി ബന്ധപ്പെട്ട തെളിവുകൾ നശിപ്പിക്കപ്പെടാതെ സംരക്ഷിക്കുന്നതിൽ മ്യാൻമർ വീഴ്ചവരുത്തിയതായും കോടതി കണ്ടെത്തി.

റോഹിങ്ക്യൻ മുസ്‌ലിംകൾക്കെതിരായ അതിക്രമങ്ങളിൽ മ്യാൻമറിന്റെ ഉത്തരവാദിത്വം അന്താരാഷ്ട്ര തലത്തിൽ നിർണയിക്കുന്ന നിർണായക വിധിയായാണ് ഈ നടപടി വിലയിരുത്തപ്പെടുന്നത്. Genocide Convention പ്രകാരമുള്ള രാജ്യത്തിന്റെ ബാധ്യതകൾ ലംഘിച്ചതിന് മ്യാൻമർ ഉത്തരവാദിയാണെന്ന് കോടതി വ്യക്തമാക്കിയതോടെ റോഹിങ്ക്യൻ ജനതയ്ക്ക് നീതിയും നഷ്ടപരിഹാരവും ഉറപ്പാക്കുന്നതിലേക്കുള്ള സുപ്രധാന ചുവടുവയ്പ്പായി വിധി മാറി.

News Tag Live യുട്യൂബ് ചാനല്‍ Subscribe ചെയ്യുക