ഇസ്രായേൽ തിരഞ്ഞെടുപ്പിൽ അനിശ്ചിതത്വം; നെതന്യാഹുവിനും പ്രതിപക്ഷത്തിനും ഭൂരിപക്ഷമില്ല

ഇസ്രായേൽ പൊതുതിരഞ്ഞെടുപ്പിൽ പ്രധാനമന്ത്രി ബെഞ്ചമിൻ നെതന്യാഹുവിന്റെ സഖ്യവും പ്രതിപക്ഷവും തമ്മിൽ കടുത്ത പോരാട്ടം. പുറത്തുവന്ന എക്സിറ്റ് പോൾ ഫലങ്ങൾ മാറിമറിഞ്ഞതോടെ ആർക്കും വ്യക്തമായ ഭൂരിപക്ഷം ലഭിക്കില്ലെന്ന സൂചനയാണ് പുറത്തുവരുന്നത്. അന്തിമ ഫലത്തിൽ സൈനികരുടെയും മറ്റ് അർഹരായ വോട്ടർമാരുടെയും ബാലറ്റുകൾ നിർണായകമായേക്കും.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

സാധാരണ പോളിങ് കേന്ദ്രങ്ങളിലെ വോട്ടെണ്ണൽ പൂർത്തിയായിട്ടുണ്ട്. സൈനികർ ഉൾപ്പെടെ സ്വന്തം പോളിങ് കേന്ദ്രത്തിന് പുറത്ത് വോട്ട് ചെയ്തവരുടെ ഇരട്ട കവറുകളിലുള്ള ബാലറ്റുകളാണ് ഇനി എണ്ണാനുള്ളത്. ഇവയുടെ ഫലം പുറത്തുവരുന്നതോടെ സീറ്റുനിലയിൽ മാറ്റമുണ്ടാകാം.

നെതന്യാഹു സഖ്യത്തിന് 52 സീറ്റുകളും മുൻ സൈനിക മേധാവി ഗാദി ഐസൻകോട്ടിന്റെ നേതൃത്വത്തിലുള്ള പ്രതിപക്ഷ സഖ്യത്തിന് 49 സീറ്റുകളും ലഭിക്കുമെന്നാണ് ചാനൽ 12ന്റെ പുതുക്കിയ എക്സിറ്റ് പോൾ പ്രവചനം. നേരത്തേ പ്രതിപക്ഷത്തിന് അനുകൂലമായിരുന്ന സൂചനകളാണ് പിന്നീട് മാറിയത്. പ്രധാന ടെലിവിഷൻ ചാനലുകളുടെ പ്രവചനങ്ങൾ ഇഞ്ചോടിഞ്ച് പോരാട്ടമാണ് സൂചിപ്പിക്കുന്നത്.

120 അംഗ ഇസ്രയേൽ പാർലമെന്റായ നെസറ്റിൽ ഭൂരിപക്ഷ സർക്കാർ രൂപീകരിക്കാൻ 61 സീറ്റുകൾ ആവശ്യമാണ്. ഒരു പാർട്ടിക്കോ സഖ്യത്തിനോ ഈ സംഖ്യയിലെത്താൻ കഴിഞ്ഞില്ലെങ്കിൽ മറ്റ് പാർട്ടികളുടെ പിന്തുണ തേടേണ്ടിവരും. അറബ് പാർട്ടികളുമായി ചേർന്ന് ഭൂരിപക്ഷം ഉറപ്പാക്കാൻ ഐസൻകോട്ടിന്റെ നേതൃത്വത്തിലുള്ള പ്രതിപക്ഷ സഖ്യത്തോട് ഡെമോക്രാറ്റ്സ് നേതാവ് യായർ ഗോലാൻ ആവശ്യപ്പെട്ടിട്ടുണ്ട്.

ആർക്കും സർക്കാർ രൂപീകരിക്കാൻ കഴിയാത്ത സാഹചര്യമുണ്ടായാൽ ഇസ്രയേലിൽ വീണ്ടും തിരഞ്ഞെടുപ്പ് നടക്കാനുള്ള സാധ്യതയുമുണ്ട്. അതുവരെ നെതന്യാഹു കാവൽ പ്രധാനമന്ത്രിയായി തുടരും. അന്തിമ ഫലങ്ങൾ ലഭിച്ചശേഷം പ്രസിഡന്റ് ഐസക് ഹെർസോഗ് രാഷ്ട്രീയ പാർട്ടി നേതാക്കളുമായി കൂടിയാലോചിച്ച് സർക്കാർ രൂപീകരിക്കാൻ ഏറ്റവും കൂടുതൽ സാധ്യതയുള്ള നേതാവിനെ കണ്ടെത്തും. തുടർന്ന് സഖ്യസർക്കാർ രൂപീകരിക്കാൻ ആ നേതാവിന് 42 ദിവസം വരെ സമയം ലഭിക്കും.

ഇസ്രയേലിലെ ആനുപാതിക പ്രാതിനിധ്യ സംവിധാനപ്രകാരം വോട്ടർമാർ വ്യക്തിഗത സ്ഥാനാർഥികൾക്കല്ല, രാഷ്ട്രീയ പാർട്ടികൾക്കാണ് വോട്ട് ചെയ്യുന്നത്. ദേശീയതലത്തിൽ കുറഞ്ഞത് 3.25 ശതമാനം വോട്ട് നേടുന്ന പാർട്ടികൾക്കാണ് പാർലമെന്റിൽ പ്രവേശിക്കാൻ കഴിയുക. വോട്ടിന്റെ അനുപാതത്തിനനുസരിച്ചാണ് സീറ്റുകൾ വിതരണം ചെയ്യുന്നത്.

തിരഞ്ഞെടുപ്പിൽ ഏകദേശം 77.7 ശതമാനം പോളിങ് രേഖപ്പെടുത്തിയതായാണ് റിപ്പോർട്ട്. 2022ലെ തിരഞ്ഞെടുപ്പിലുണ്ടായിരുന്ന 70 ശതമാനത്തിലധികം പോളിങ്ങിനെക്കാൾ കൂടുതലാണിത്.

News Tag Live യുട്യൂബ് ചാനല്‍ Subscribe ചെയ്യുക