ലോകത്ത് ഫിന്‍ലാന്റ്; അപ്പോള്‍ ഗള്‍ഫിലെ ഏറ്റവും സന്തോഷമുള്ള രാജ്യം ഏതാണ്?

ലോകത്ത് ഫിന്‍ലാന്റ്; അപ്പോള്‍ ഗള്‍ഫിലെ ഏറ്റവും സന്തോഷമുള്ള രാജ്യം ഏതാണ്?

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

പാരീസ്: ലോകത്ത് ഏറ്റവും സന്തോഷമുള്ള രാജ്യങ്ങളില്‍ ഇത്തവണയും ഒന്നാം സ്ഥാനത്ത് സ്‌കാന്റനേവിയന്‍ രാജ്യങ്ങളില്‍പ്പെട്ട ഫിന്‍ലാന്റാണ്. തുടര്‍ച്ചയായ ഏഴാം വര്‍ഷമാണ് ഈ സ്ഥാനം അലങ്കരിക്കുന്നത്. അയല്‍ക്കാരായ സ്വീഡന്‍, ഡെന്‍മാര്‍ക്ക്, ഐസ്ലന്‍ഡ് എന്നിവയും തങ്ങളുടെ ഉയര്‍ന്ന സ്ഥാനം നിലനിര്‍ത്തി.

എന്നാല്‍, ഗള്‍ഫ് രാഷ്ട്രങ്ങളുടെ സ്‌കോറും മോശമല്ല. ലോകത്തെ ഏറ്റവും സന്തോഷമുള്ള രാജ്യങ്ങളില്‍ 13ാം സ്ഥാനത്താണ് കുവൈറ്റ്. ഗള്‍ഫില്‍ കുവൈറ്റിന് മുന്നിലെത്താന്‍ മറ്റു രാജ്യങ്ങള്‍ക്ക് കഴിഞ്ഞില്ല. മികച്ച സാമ്പത്തിക ഭദ്രതയുള്ള സൗദി അറേബ്യ, യുഎഇ, ഖത്തര്‍ തുടങ്ങിയ രാജ്യങ്ങളെ പിന്നിലാക്കിയാണ് കുവൈറ്റ് കുതിച്ചത്. രാജ്യം രാഷ്ട്രീയ പ്രതിസന്ധിയിലൂടെയും കടന്നുപോകുന്നുണ്ടെങ്കിലും ജനങ്ങള്‍ സന്തോഷവാന്‍മാരാണെന്നാണ് റിപോര്‍ട്ട് വ്യക്തമാക്കുന്നത്.

പ്രതിശീര്‍ഷ ജിഡിപി, സാമൂഹിക പിന്തുണ, ആരോഗ്യകരമായ ആയുര്‍ദൈര്‍ഘ്യം, സ്വാതന്ത്ര്യം, ഉദാരത, അഴിമതി തുടങ്ങിയ കാര്യങ്ങള്‍ പരിശോധിച്ചാണ് പട്ടിക തയ്യാറാക്കുന്നത്. 143 രാജ്യങ്ങളിലെ ആളുകള്‍ക്കിടയില്‍ സര്‍വേ നടത്തി. പൂജ്യം മുതല്‍ 10 വരെയുള്ള സ്‌കെയിലില്‍ അവരുടെ ജീവിതം വിലയിരുത്താനാണ് സര്‍വേ ആവശ്യപ്പെട്ടിരുന്നത്. മാര്‍ച്ച് 20 ന് അന്താരാഷ്ട്ര സന്തോഷദിനത്തോട് അനുബന്ധിച്ചാണ് സൂചിക പ്രസിദ്ധപ്പെടുത്തിയത്.

യുഎന്‍ സ്‌പോണ്‍സര്‍ ചെയ്ത സൂചികയില്‍ മറ്റ് പാശ്ചാത്യ രാജ്യങ്ങള്‍ ഇത്തവണ താഴേക്ക് പോയി. യുവാക്കള്‍ക്കിടയില്‍ വര്‍ധിച്ചുവരുന്ന അസന്തുഷ്ടിയാണ് കാരണം. പത്ത് വര്‍ഷത്തിലധികമായി പ്രസിദ്ധീകരിച്ചുവരുന്ന സൂചികയില്‍ ആദ്യമായി അമേരിക്കയും ജര്‍മ്മനിയും ആദ്യ 20ല്‍ നിന്ന് പുറത്തായി.

കിഴക്കന്‍ യൂറോപ്യന്‍ രാജ്യങ്ങളായ സെര്‍ബിയ, ബള്‍ഗേറിയ, ലാത്വിയ രാജ്യങ്ങളില്‍ സന്തോഷം ഇത്തവണ വലിയ തോതില്‍ വര്‍ധിച്ചിട്ടുണ്ട്. 2020ല്‍ താലിബാന്‍ നിയന്ത്രണം വീണ്ടെടുത്തതുമുതല്‍ മാനുഷിക ദുരന്തത്താല്‍ വലയുന്ന അഫ്ഗാനിസ്ഥാന്‍ അവസാന സ്ഥാനത്ത് തുടര്‍ന്നു.

The world’s happiest countries in 2024: Kuwait smiles into the global top 20