ഭര്‍ത്താവിനു സീറ്റൊപ്പിച്ച് നല്‍കി; ഭാര്യക്ക് മറ്റൊരിടത്ത് സീറ്റ് നല്‍കാമെന്ന് പറഞ്ഞ് കൊണ്ടു പോയി ലൈംഗിക അതിക്രമത്തിന് ശ്രമം; ടിടിഇ അറസ്റ്റില്‍

റിസര്‍വേഷന്‍ കോച്ചില്‍ കയറിയ ദമ്പതികള്‍ക്ക് സീറ്റ് റെഡിയാക്കി നല്‍കാമെന്ന് പറഞ്ഞ് യുവതിയ്ക്കുനേരെ ടിടിഇയുടെ ലൈംഗിക അതിക്രമം. നിസാമുദ്ദീന്‍ എക്‌സ്പ്രസ് ട്രെയിനിലാണ് സംഭവം. റിസര്‍വേഷന്‍ കോച്ചില്‍വച്ച് ലൈംഗികാതിക്രമം കാട്ടിയെന്ന യാത്രക്കാരിയുടെ പരാതിയില്‍ ടിടിഇ കൊല്ലം കടയ്ക്കല്‍ സ്വദേശി ഷിജുവിനെ(47) ഷൊര്‍ണൂര്‍ റെയില്‍വേ പൊലീസ് അറസ്റ്റ് ചെയ്തു. ഇയാള്‍ മദ്യലഹരിയിലായിരുന്നുവെന്നാണു വിവരം.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

തിരുവനന്തപുരത്തു നിന്നു നിസാമുദ്ദീനിലേക്കു പോയ ട്രെയിനില്‍ വെള്ളിയാഴ്ച ഉച്ചയ്ക്കു മൂന്നരയോടെയായിരുന്നു സംഭവം. റിസര്‍വേഷന്‍ കോച്ചില്‍ കയറിയ കണ്ണൂര്‍ സ്വദേശികളായ ദമ്പതികള്‍ സീറ്റിനായി തൃശൂരിനും വള്ളത്തോള്‍ നഗറിനുമിടയില്‍ വച്ചു ടിടിഇയെ സമീപിച്ചു. ഭര്‍ത്താവിനു സീറ്റ് നല്‍കിയ ശേഷം യുവതിക്കു മറ്റൊരിടത്ത് ഒഴിവുണ്ടായിരുന്ന സീറ്റ് നല്‍കാമെന്ന് പറഞ്ഞ് കൊണ്ടുപോവുകയായിരുന്നു. ഒഴിഞ്ഞ ഭാഗത്തുള്ള സീറ്റില്‍ യുവതിയുടെ സമീപത്തിരുന്ന് കടന്നുപിടിക്കാന്‍ ശ്രമിക്കുകയായിരുന്നു.

യുവതി ഉടന്‍ ഷൊര്‍ണൂര്‍ റെയില്‍വേ പൊലീസിനെ ഫോണില്‍ വിവരം അറിയിക്കുകയും ട്രെയിന്‍ ഷൊര്‍ണൂരില്‍ എത്തിയപ്പോള്‍ പൊലീസ് ടിടിഇയെ പിടികൂടുകയുമായിരുന്നു. പൊലീസിന്റെ പരിശോധനയില്‍, ഇയാള്‍ മദ്യപിച്ചിരുന്നതായി കണ്ടെത്തി. പ്രതിയെ സസ്‌പെന്‍ഡ് ചെയ്തതായി റെയില്‍വേ അറിയിച്ചു. കോടതിയില്‍ ഹാജരാക്കി റിമാന്‍ഡ് ചെയ്തു.

Tags: TTE Arrested, Nizamuddin Express, Shornur Railway Police, Sexual Assault, Train Crime, Kollam, Shiju TTE, Railway Police, Kerala News

News Tag Live യുട്യൂബ് ചാനല്‍ Subscribe ചെയ്യുക