21
Nov 2024
Sat
 |
|
ദോഹ: ലുസൈല് ഫെറി ടെര്മിനലും രണ്ട് ഫെറി സ്റ്റോപ്പുകളും അടങ്ങുന്ന വാട്ടര് ടാക്സി പദ്ധതിയുടെ ആദ്യ ഘട്ടത്തിന്റെ അടിസ്ഥാന സൗകര്യങ്ങള് പൂര്ത്തിയാക്കിയതായി ഗതാഗത മന്ത്രാലയം (MoT) അറിയിച്ചു. ഒന്നാം ഘട്ടത്തിന്റെ ഭാഗമായി ലുസൈല് സിറ്റി, പേള് ഖത്തര്, കോര്ണിഷ് എന്നീ മൂന്ന് സ്റ്റേഷനുകളുടെ നിര്മാണമാണ് പൂര്ത്തിയാക്കിയത്. ഇവയില് ലുസൈല് സിറ്റിയില് പ്രധാന വാട്ടര് ടാക്സി സ്റ്റേഷനാണ് നിര്മ്മിച്ചത്. ബോട്ടുകള് പാര്ക്ക് ചെയ്യാനും ചാര്ജ് ചെയ്യാനുമുള്ള സൗകര്യങ്ങള് ഇവിടെയുണ്ടായിരിക്കും.പഴയ ദോഹ തുറമുഖത്ത് നടക്കുന്ന ഖത്തര് ബോട്ട് ഷോയില് 450ലധികം സമുദ്ര കമ്പനികളുടെയും വ്യാപാരമുദ്രകളുടെയും പങ്കാളിത്തത്തോടെയാണ് പ്രഖ്യാപനം.
പദ്ധതി പൂര്ത്തിയാക്കാന് ഓപ്പറേറ്ററെ തിരഞ്ഞെടുക്കുന്നതിനുള്ള പ്രവര്ത്തനങ്ങള് നടന്നുവരികയാണെന്നും ടാക്സി സര്വീസിനായി ഉപയോഗിക്കേണ്ട ബോട്ടുകള് ഉടന് തീരുമാനിക്കുമെന്നും ഗതാഗത മന്ത്രാലയം പ്രസ്താവനയില് അറിയിച്ചു.
പദ്ധതിയുടെ രണ്ടാം ഘട്ടത്തില് കത്താറ, പഴയ ദോഹ തുറമുഖം, ഹമദ് ഇന്റര്നാഷണല് എയര്പോര്ട്ട്, അല് വക്ര സിറ്റി തുടങ്ങിയ സ്ഥലങ്ങളിലേക്ക് കൂടി സര്വീസ് വ്യാപിപ്പിക്കും.
ദോഹ സിറ്റിയെ ലുസൈല് സിറ്റി, സിമൈസ്മ വഴി അല് ഖോര് സിറ്റിയുമായി ബന്ധിപ്പിക്കുന്നതാണ് പദ്ധതിയുടെ മൂന്നാം ഘട്ടം. അത്യാധുനിക പരിസ്ഥിതി സൗഹൃദ സാങ്കേതിക വിദ്യകളാല് സജ്ജീകരിച്ച ആധുനിക ജലത്തിലൂടെയുള്ള പൊതുഗതാഗത സംവിധാനങ്ങള് ലഭ്യമാക്കുകയാണ് വാട്ടര് ടാക്സി പദ്ധതി ലക്ഷ്യമിടുന്നത്.
ഷോയിലെ MoT ബൂത്ത് ലുസൈല് ഫെറി ടെര്മിനലിന്റെ ഒരു മോക്ക്അപ്പ് പ്രദര്ശിപ്പിക്കുന്നുണ്ട്. പദ്ധതിയുടെ സൗകര്യങ്ങളുടെ ദൃശ്യ അവതരണവും ബൂത്തില് സജ്ജീകരിച്ചിരിക്കുന്നു.
വിവിധ സ്ഥലങ്ങളിലേക്കും പുറത്തേക്കും യാത്രക്കാരെ എത്തിക്കുന്നതിന് മറ്റ് പൊതുഗതാഗത സംവിധാനങ്ങളുമായുള്ള സംയോജനം വര്ധിപ്പിക്കാനും പദ്ധതി ലക്ഷ്യമിടുന്നു.
പ്രധാന ലുസൈല് ഫെറി ടെര്മിനല് 2200 ചതുരശ്ര മീറ്റര് വിസ്തൃതിയില് വ്യാപിച്ചുകിടക്കുന്നു. 24 മീറ്റര് നീളമുള്ള നാല് പൊണ്ടൂണിന് ഉള്ക്കൊള്ളാന് കഴിയും. ടെര്മിനലില് വെയിറ്റിംഗ് ഏരിയ, ടിക്കറ്റിംഗ് സൗകര്യം, റീട്ടെയിലിംഗ്, ഓഫീസുകള് തുടങ്ങിയ വിവിധ സേവന സൗകര്യങ്ങളും ഉള്പ്പെടുന്നു. പേള്, കോര്ണിഷിലെ രണ്ട് ഫെറി സ്റ്റോപ്പുകളില് പോണ്ടൂണുകള്, ടിക്കറ്റിംഗ് ഓഫീസുകള്, കസ്റ്റമര് സര്വീസ് ഓഫീസുകള് എന്നിവ ഉള്പ്പെടുന്നു.
Water taxi in Qatar infrastructure of the first phase completed
Latest News
More Stories
All Rights Reserved © 2022