ഖുര്‍ആനില്‍ തൊട്ട് പ്രതിജ്ഞ ചെയ്ത് സൊഹ്‌റാന്‍ മംദാനി; ന്യൂയോര്‍ക്ക് ചരിത്രത്തിലെ ആദ്യ മുസ്ലിം മേയര്‍ അധികാരമേറ്റു

ന്യൂയോര്‍ക്ക്: അമേരിക്കയിലെ ഏറ്റവും വലിയ നഗരമായ ന്യൂയോര്‍ക്കിന്റെ മേയറായി സോഹ്റാന്‍ മംദാനി സത്യപ്രതിജ്ഞ ചെയ്ത് അധികാരമേറ്റു. ന്യൂയോര്‍ക്ക് സിറ്റിയുടെ ചരിത്രത്തിലെ ആദ്യത്തെ മുസ്ലിം മേയറും, തലമുറകളിലെ ഏറ്റവും പ്രായം കുറഞ്ഞ മേയറുമാണ് മംദാനി.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ഡെമോക്രാറ്റ് ആയ മംദാനി, വ്യാഴാഴ്ച അര്‍ദ്ധരാത്രിക്ക് തൊട്ടുപിന്നാലെ മാന്‍ഹട്ടനിലെ പ്രവര്‍ത്തനം നിര്‍ത്തിയ ഒരു ചരിത്രപ്രസിദ്ധമായ സബ്വേ സ്റ്റേഷനില്‍ വെച്ചാണ് സത്യപ്രതിജ്ഞ ചെയ്തത്. ഖുര്‍ആനില്‍ തൊട്ടായിരുന്നു അദ്ദേഹം സത്യപ്രതിജ്ഞ ചൊല്ലിയത്. ‘ഇതൊരു വലിയ ബഹുമതിയും എന്റെ ജീവിതത്തിലെ ഏറ്റവും വലിയ ഭാഗ്യവുമാണ്,’ മംദാനി പറഞ്ഞു.

ന്യൂയോര്‍ക്ക് അറ്റോര്‍ണി ജനറലും മംദാനിയുടെ രാഷ്ട്രീയ സുഹൃത്തുമായ ലെറ്റിഷ്യ ജെയിംസാണ് സത്യവാചകം ചൊല്ലിക്കൊടുത്തത്. നഗരത്തിലെ ആദ്യകാല സബ്വേ സ്റ്റോപ്പുകളിലൊന്നായ പഴയ സിറ്റി ഹാള്‍ സ്റ്റേഷനിലായിരുന്നു ചടങ്ങ്.

ALSO READ: മംദാനിക്ക് പിന്നാലെ ഗസാല ഹാഷ്മിയും; പുതുചരിത്രം കുറിച്ച് ഹൈദരാബാദുകാരി

വ്യാഴാഴ്ച ഉച്ചയ്ക്ക് 1 മണിക്ക് (18:00 GMT) സിറ്റി ഹാളില്‍ നടക്കുന്ന വിപുലമായ പൊതുചടങ്ങില്‍ വെച്ച് മംദാനി വീണ്ടും സത്യപ്രതിജ്ഞ ചെയ്യും. മംദാനിയുടെ രാഷ്ട്രീയ നായകന്മാരില്‍ ഒരാളായ യുഎസ് സെനറ്റര്‍ ബെര്‍ണി സാന്‍ഡേഴ്സായിരിക്കും ഈ ചടങ്ങില്‍ സത്യവാചകം ചൊല്ലിക്കൊടുക്കുക. ഇതിനുശേഷം ബ്രോഡ്വേയിലെ ‘കാനിയോണ്‍ ഓഫ് ഹീറോസില്‍’ ഒരു പൊതു ബ്ലോക്ക് പാര്‍ട്ടിയും സംഘടിപ്പിക്കും.

ചരിത്രനേട്ടവുമായി മംദാനി

ന്യൂയോര്‍ക്കിന്റെ ആദ്യ മുസ്ലിം മേയര്‍ എന്നതിലുപരി, ദക്ഷിണേഷ്യന്‍ വംശജനായ ആദ്യ മേയറും ആഫ്രിക്കയില്‍ ജനിച്ച ആദ്യ മേയറും കൂടിയാണ് മംദാനി. 34 വയസ്സുള്ള അദ്ദേഹം, ന്യൂയോര്‍ക്കിലെ തലമുറകളിലെ ഏറ്റവും പ്രായം കുറഞ്ഞ മേയര്‍ കൂടിയാണ്.

മംദാനിയുടെ വാഗ്ദാനങ്ങള്‍

ലോകത്തിലെ ഏറ്റവും ചെലവേറിയ നഗരങ്ങളിലൊന്നായ ന്യൂയോര്‍ക്കിലെ ജീവിതച്ചെലവ് കുറയ്ക്കുന്നതിനുള്ള നയങ്ങളുമായാണ് ഈ ഡെമോക്രാറ്റിക് സോഷ്യലിസ്റ്റ് അധികാരത്തിലെത്തുന്നത്. ‘അഫോര്‍ഡബിലിറ്റി’ (താങ്ങാനാവുന്ന ചെലവ്) എന്നത് അദ്ദേഹത്തിന്റെ പ്രചാരണത്തിലെ പ്രധാന മുദ്രാവാക്യമായിരുന്നു. സൗജന്യ ശിശു സംരക്ഷണം, സൗജന്യ ബസ് സര്‍വീസ്, 10 ലക്ഷത്തോളം വരുന്ന കുടുംബങ്ങള്‍ക്ക് വാടക മരവിപ്പിക്കല്‍, സര്‍ക്കാര്‍ വക പലചരക്ക് കടകള്‍ എന്നിവ അദ്ദേഹത്തിന്റെ വാഗ്ദാനങ്ങളില്‍ ഉള്‍പ്പെടുന്നു.

എന്നാല്‍, മാലിന്യ സംസ്‌കരണം, മഞ്ഞുവീഴ്ച, എലിശല്യം എന്നിവ കൈകാര്യം ചെയ്യുക, സബ്വേയിലെ കാലതാമസം, റോഡിലെ കുഴികള്‍ തുടങ്ങിയ വെല്ലുവിളികളും അദ്ദേഹത്തെ കാത്തിരിക്കുന്നുണ്ട്.

ട്രംപുമായുള്ള ബന്ധം

പ്രസിഡന്റ് ഡൊണാള്‍ഡ് ട്രംപുമായുള്ള അഭിപ്രായവ്യത്യാസങ്ങളും മംദാനിക്ക് നേരിടേണ്ടിവരും. മംദാനി ജയിച്ചാല്‍ നഗരത്തിനുള്ള ഫണ്ട് തടയുമെന്നും നാഷണല്‍ ഗാര്‍ഡിനെ അയക്കുമെന്നും മംദാനിയെ നാടുകടത്തണമെന്നും തിരഞ്ഞെടുപ്പ് വേളയില്‍ ട്രംപ് ഭീഷണിപ്പെടുത്തിയിരുന്നു. മംദാനിയെ ‘നൂറു ശതമാനം കമ്മ്യൂണിസ്റ്റ് ഭ്രാന്തന്‍’ എന്നാണ് ട്രംപ് വിശേഷിപ്പിച്ചത്.

എന്നാല്‍, നവംബറില്‍ ഇരുവരും വൈറ്റ് ഹൗസില്‍ വെച്ച് നടത്തിയ കൂടിക്കാഴ്ച ഏവരെയും അത്ഭുതപ്പെടുത്തി. ‘അദ്ദേഹം മികച്ച രീതിയില്‍ പ്രവര്‍ത്തിക്കണമെന്നാണ് ഞാന്‍ ആഗ്രഹിക്കുന്നത്, അതിനായി ഞാന്‍ സഹായിക്കും,’ കൂടിക്കാഴ്ചയ്ക്ക് ശേഷം ട്രംപ് പറഞ്ഞു.

ട്രംപിനെ ഇപ്പോഴും ഒരു ഫാസിസ്റ്റായി കാണുന്നുണ്ടോ എന്ന മാധ്യമപ്രവര്‍ത്തകന്റെ ചോദ്യത്തിന്, ‘അത് കുഴപ്പമില്ല, നിങ്ങള്‍ക്ക് അത് പറയാം, വിശദീകരിക്കുന്നതിലും എളുപ്പം അതാണ്,’ എന്ന് പറഞ്ഞ് ട്രംപ് മംദാനിയെ രക്ഷിക്കാന്‍ ശ്രമിച്ചു. എന്നാല്‍ കൂടിക്കാഴ്ചയ്ക്ക് ശേഷവും ട്രംപ് ഒരു ഫാസിസ്റ്റാണെന്ന തന്റെ പഴയ നിലപാടില്‍ മാറ്റമില്ലെന്ന് മംദാനി വ്യക്തമാക്കി.

ഇന്ത്യന്‍ വേരുകളുള്ള മംദാനി

ഉഗാണ്ടയിലെ കമ്പാലയില്‍ പ്രശസ്ത ചലച്ചിത്ര സംവിധായിക മീര നായരുടെയും അക്കാദമിക് പണ്ഡിതനായ മഹ്‌മൂദ് മംദാനിയുടെയും മകനായാണ് സോഹ്റാന്‍ ജനിച്ചത്. ഏഴാം വയസ്സില്‍ കുടുംബത്തോടൊപ്പം ന്യൂയോര്‍ക്കിലെത്തി. 2018-ലാണ് യുഎസ് പൗരത്വം ലഭിച്ചത്. 2020-ല്‍ ക്വീന്‍സിനെ പ്രതിനിധീകരിച്ച് സ്റ്റേറ്റ് അസംബ്ലി സീറ്റില്‍ വിജയിക്കുന്നതിന് മുമ്പ് അദ്ദേഹം രാഷ്ട്രീയ പ്രചാരണങ്ങളില്‍ പ്രവര്‍ത്തിച്ചിരുന്നു.

മുന്‍ ഗവര്‍ണര്‍ ആന്‍ഡ്രൂ ക്യൂമോയെ രണ്ട് തവണ (പ്രൈമറിയിലും നവംബറിലെ തിരഞ്ഞെടുപ്പിലും) പരാജയപ്പെടുത്തിയാണ് മംദാനി മേയര്‍ സ്ഥാനത്തേക്ക് എത്തിയത്. 51.5 ശതമാനം വോട്ടുകള്‍ നേടി. കുമോക്ക് 39.7 ശതമാനം വോട്ടുകളാണ് ലഭിച്ചത്.