സാങ്കല്‍പ്പിക കഥാപാത്രങ്ങളോട് ലൈംഗിക ആകര്‍ഷണം; ഫിക്ടോ സെക്ഷ്വാലിറ്റി വെളിപ്പെടുത്തുന്നവരുടെ എണ്ണം വര്‍ധിക്കുന്നു

What is ‘Fictosexuality’? ഡാര്‍സി (Darcy) എന്ന കഥാപാത്രത്തിന്റെ ഗൗരവം മുതല്‍ ചാന്‍ഡലര്‍ ബിംഗിന്റെ (Chandler Bing) തമാശകള്‍ വരെ, അത്തരം സ്വഭാവമുള്ള യഥാര്‍ത്ഥ വ്യക്തികളെ കണ്ടെത്താന്‍ ആഗ്രഹിക്കുന്നവരാണ് മിക്ക പുരുഷന്മാരും സ്ത്രീകളും. എന്നാല്‍ മറ്റു ചിലര്‍ക്ക് താല്പര്യം ആ സാങ്കല്‍പ്പിക കഥാപാത്രങ്ങളോട് തന്നെയാണ്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

മനുഷ്യ ലൈംഗികതയില്‍ വര്‍ദ്ധിച്ചുവരുന്ന ഈ പുതിയ പ്രവണത പലരെയും അത്ഭുതപ്പെടുത്തുകയും മനുഷ്യവംശത്തിന്റെ ഭാവിയെക്കുറിച്ച് ആശങ്കാകുലരാക്കുകയും ചെയ്യുന്നു. തന്നെ ഒരിക്കലും തിരികെ സ്‌നേഹിക്കാന്‍ കഴിയാത്ത ഒന്നിനോടുള്ള പ്രണയം വെളിപ്പെടുത്തുന്നവരുടെ എണ്ണം കൂടിവരികയാണ്. ‘ഫിക്ടോസെക്ഷ്വല്‍’ ആയ വ്യക്തികളെ സംബന്ധിച്ചിടത്തോളം, സങ്കല്‍പ്പങ്ങളോടുള്ള ഈ ആകര്‍ഷണം കേവലം മനസ്സില്‍ ഒതുങ്ങുന്നതല്ല; അത് ഹൃദയസ്പര്‍ശിയായ പ്രണയമായും യഥാര്‍ത്ഥത്തില്‍ നിലവിലില്ലാത്ത ഒരു സത്തയുമായുള്ള ബന്ധമായും മാറിയിരിക്കുന്നു.

എന്താണ് ‘ഫിക്ടോസെക്ഷ്വാലിറ്റി’?

തെറാപ്പിസ്റ്റും ജെന്‍ഡര്‍ സ്‌പെഷ്യലിസ്റ്റുമായ റെബേക്ക മൈനറുടെ അഭിപ്രായത്തില്‍, സാങ്കല്‍പ്പിക കഥാപാത്രങ്ങളോട് തോന്നുന്ന വൈകാരികമോ പ്രണയപരമോ ലൈംഗികമോ ആയ ആകര്‍ഷണമാണ് ‘ഫിക്ടോസെക്ഷ്വാലിറ്റി’. ചിലപ്പോള്‍ യഥാര്‍ത്ഥ മനുഷ്യരേക്കാള്‍ കൂടുതല്‍ ഇവര്‍ക്ക് സാങ്കല്‍പ്പിക കഥാപാത്രങ്ങളോട് താല്പര്യം തോന്നാം. പുസ്തകങ്ങള്‍, സിനിമകള്‍, ടിവി ഷോകള്‍, വീഡിയോ ഗെയിമുകള്‍ എന്നിവയിലെ കഥാപാത്രങ്ങള്‍ ഇത്തരം ആകര്‍ഷണം ഉണ്ടാക്കാം. ‘ഇത്തരക്കാര്‍ക്ക് ഈ ബന്ധങ്ങള്‍ കേവലം ഉപരിപ്ലവമായ ഒന്നല്ല, മറിച്ച് വളരെ ആഴത്തിലുള്ളതും അര്‍ത്ഥവത്തായതുമായ ഒന്നാണ്,’ എന്ന് റെബേക്ക കൂട്ടിച്ചേര്‍ത്തു.

മിക്കപ്പോഴും ‘അസെക്ഷ്വല്‍’ (Asexual ലൈംഗിക താല്പര്യം കുറഞ്ഞവര്‍) എന്ന വിഭാഗത്തിന് കീഴിലുള്ള ഒരു മൈക്രോ ലേബലായാണ് (Microlabel) ഇതിനെ കണക്കാക്കുന്നത്. ‘ഭാവനയുടെയും കഥപറച്ചിലിന്റെയും വൈകാരിക ബന്ധത്തിന്റെയും ശക്തിയെയാണ് ഇത് കാണിക്കുന്നത്,’ എന്ന് വിദഗ്ധര്‍ പറയുന്നു.

ഫിക്ടോസെക്ഷ്വല്‍ എന്നാല്‍ അസെക്ഷ്വല്‍ ആണോ?

അല്ല. എല്ലാവരുടെയും ലൈംഗിക ആകര്‍ഷണം വ്യത്യസ്തമാണ്. ഒരാള്‍ ഫിക്ടോസെക്ഷ്വല്‍ ആണെന്ന് കരുതി അവര്‍ അസെക്ഷ്വല്‍ ആകണമെന്നില്ല. ഫിക്ടോസെക്ഷ്വല്‍ ആയവര്‍ തന്നെ സ്‌ട്രൈറ്റ്, ഗേ, പാന്‍സെക്ഷ്വല്‍ എന്നിങ്ങനെ പല സ്വത്വങ്ങളില്‍ പെടുന്നവരാകാം.

എന്തുകൊണ്ടാണ് കൂടുതല്‍ ആളുകള്‍ ഫിക്ടോസെക്ഷ്വല്‍ ആയി മാറുന്നത്?

നിലവിലെ സാഹചര്യത്തില്‍ ഇത് കേവലം വിനോദങ്ങളില്‍ മാത്രം ഒതുങ്ങുന്നില്ല; നിര്‍മ്മിത ബുദ്ധി (AI) ഈ മേഖലയെ പൂര്‍ണ്ണമായും മാറ്റിമറിച്ചു. 2025-ല്‍ പ്രണയത്തിനായി AI ചാറ്റ്‌ബോട്ടുകളെ ആശ്രയിക്കുന്നവരുടെ എണ്ണം ഗണ്യമായി വര്‍ദ്ധിച്ചു. AI കാമുകന് വേണ്ടി വിവാഹമോചനം നേടുന്നതും, പങ്കാളി നഷ്ടപ്പെട്ടവര്‍ AIല്‍ പ്രണയം കണ്ടെത്തുന്നതും, AI ബോട്ടിനെ വിവാഹം കഴിക്കുന്നതും വരെ വാര്‍ത്തകളില്‍ ഇടം പിടിച്ചു.

മനുഷ്യര്‍ക്ക് നല്‍കാന്‍ കഴിയാത്ത ഒരു സുരക്ഷിതബോധം സാങ്കല്‍പ്പിക പങ്കാളികള്‍ നല്‍കുന്നു എന്നതാണ് ഇതിന്റെ പ്രധാന ആകര്‍ഷണം. 2018-ല്‍ അക്കിഹിക്കോ കൊണ്ടോ എന്ന വ്യക്തി ഒരു ഹോളോഗ്രാഫിക് പോപ്പ് താരത്തെ വിവാഹം കഴിച്ചിരുന്നു. ഏകദേശം 12 ലക്ഷം രൂപ ചെലവാക്കിയാണ് അദ്ദേഹം ഇത് ചെയ്തത്. അദ്ദേഹത്തിന്റെ അഭിപ്രായത്തില്‍ ആ സാങ്കല്‍പ്പിക പങ്കാളി ‘എപ്പോഴും അദ്ദേഹത്തിനൊപ്പം ഉണ്ടാകും, ഒരിക്കലും ചതിക്കില്ല, ഒരിക്കലും രോഗബാധിതയാവുകയോ മരിക്കുകയോ ഇല്ല.’

പാരീസ് നാന്‍തറെ സര്‍വ്വകലാശാലയിലെ ഗവേഷകയായ ആഗ്‌നസ് ഗിയാര്‍ഡിന്റെ അഭിപ്രായത്തില്‍, ‘തിരസ്‌കരിക്കപ്പെടുമോ എന്ന പേടിയില്ലാത്തതാണ്’ ആളുകളെ ഇതിലേക്ക് ആകര്‍ഷിക്കുന്നത്. കൂടാതെ, ഇതിന്റെ സമയം, തീരുമാനങ്ങള്‍, വേഗത എന്നിവയെല്ലാം സ്വന്തം നിയന്ത്രണത്തിലാണെന്നതും ഇതിന്റെ പ്രത്യേകതയാണ്.