16
Oct 2026
Fri
ന്യൂഡല്‍ഹി: തെരഞ്ഞെടുപ്പ് കമ്മീഷന്റെ വോട്ടര്‍പട്ടിക ക്രമക്കേടുകള്‍ക്കും സ്‌പെഷ്യല്‍ ഇന്റന്‍സീവ് റിവിഷനുമെതിരെ (SIR) ‘കോക്ക്രോച്ച് ജനതാ പാര്‍ട്ടി’ (CJP) തലസ്ഥാനത്ത് ആഹ്വാനം ചെയ്ത പ്രതിഷേധം തടയാന്‍ കടുത്ത നിയന്ത്രണങ്ങളുമായി ഡല്‍ഹി പൊലീസ്. ഡല്‍ഹിയുടെ ഹൃദയഭാഗമായ കൊണാട്ട് പ്ലേസിലെ സെന്‍ട്രല്‍ പാര്‍ക്കില്‍ ഒക്ടോബര്‍ 16-ന് ദേശീയപതാകയേന്തി ഒത്തുകൂടാന്‍ സി.ജെ.പി സ്ഥാപകന്‍ അഭിജീത് ദിപ്‌കെ ആഹ്വാനം ചെയ്തിരുന്നു.
 |
|
പ്രതിഷേധം തടയണമെന്ന് ആവശ്യപ്പെട്ട് പ്രദേശത്തെ വ്യാപാരി നല്‍കിയ ഹര്‍ജി ഡല്‍ഹി ഹൈക്കോടതി തള്ളുകയും, ക്രമസമാധാനം ഉറപ്പാക്കാന്‍ പൊലീസിന് നിര്‍ദ്ദേശം നല്‍കുകയും ചെയ്തിരുന്നു. ഇതിന് തൊട്ടുപിന്നാലെയാണ് കൊണാട്ട് പ്ലേസിലും പരിസര പ്രദേശങ്ങളിലും ഭാരതീയ നാഗരിക് സുരക്ഷാ സംഹിത (BNSS) 163ാം വകുപ്പ് പ്രകാരം പൊലീസ് നിരോധനാജ്ഞ പ്രഖ്യാപിച്ചത്.
പാര്‍ക്ക് പൂട്ടി എന്‍.ഡി.എം.സി
പ്രതിഷേധക്കാര്‍ ഒത്തുചേരുന്നത് തടയാന്‍ ന്യൂഡല്‍ഹി മുനിസിപ്പല്‍ കൗണ്‍സില്‍ (NDMC) വ്യാഴാഴ്ച മുതല്‍ സെന്‍ട്രല്‍ പാര്‍ക്ക് അടച്ചുപൂട്ടി. ‘ഭരണപരമായ കാരണങ്ങളാല്‍ ഒക്ടോബര്‍ 16, 17 തീയതികളില്‍ പാര്‍ക്ക് പൊതുജനങ്ങള്‍ക്ക് ലഭ്യമായിരിക്കില്ല’ എന്ന് കാണിച്ച് എന്‍.ഡി.എം.സി പബ്ലിക് നോട്ടീസ് പതിക്കുകയായിരുന്നു.
അതേസമയം, പ്രതിഷേധത്തിന് എത്തുന്ന പൊതുജനങ്ങളെ തടയുമെന്നും, ദേശീയപതാക ഉയര്‍ത്താനും ദേശീയഗാനം ആലപിക്കാനും 11 പേര്‍ അടങ്ങുന്ന സംഘത്തിന് മാത്രം നിയന്ത്രിതമായി സൗകര്യമൊരുക്കാമെന്നുമാണ് ഡല്‍ഹി ഡെപ്യൂട്ടി പൊലീസ് കമ്മീഷണര്‍ നേഹ യാദവ് വാര്‍ത്താസമ്മേളനത്തില്‍ അറിയിച്ചത്.
നിരോധനാജ്ഞ ലംഘിച്ച് എത്തുന്നവര്‍ക്കെതിരെ കടുത്ത നിയമനടപടികള്‍ സ്വീകരിക്കുമെന്നും പൊലീസ് മുന്നറിയിപ്പ് നല്‍കി.
പ്രതിപക്ഷ പിന്തുണയും അഭിജീത് ദിപ്‌കെയുടെ വെല്ലുവിളിയും
ഡല്‍ഹിയില്‍ നടക്കുന്ന ജനകീയ പ്രക്ഷോഭങ്ങള്‍ക്ക് ആം ആദ്മി പാര്‍ട്ടി (AAP), കോണ്‍ഗ്രസ്, സി.പി.ഐ (എം) തുടങ്ങിയ പ്രമുഖ പ്രതിപക്ഷ പാര്‍ട്ടികളും വിദ്യാര്‍ത്ഥി സംഘടനകളും പിന്തുണ പ്രഖ്യാപിച്ചിട്ടുണ്ട്. ഡല്‍ഹിയെ പൂര്‍ണ്ണമായി അടച്ചിടാന്‍ സര്‍ക്കാരിന് കഴിയില്ലെന്നും, ജനാധിപത്യപരമായ പ്രതിഷേധങ്ങളില്‍ നിന്ന് പിന്നോട്ടില്ലെന്നും സി.ജെ.പി തലവന്‍ അഭിജീത് ദിപ്‌കെ വ്യക്തമാക്കിക്കഴിഞ്ഞു.
മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനെ സംരക്ഷിക്കാനാണ് കേന്ദ്ര സര്‍ക്കാരും പൊലീസും ശ്രമിക്കുന്നതെന്ന് അദ്ദേഹം ആരോപിച്ചു. അതിനിടെ, വോട്ടര്‍പട്ടിക അട്ടിമറിക്കെതിരെ ‘ഇന്ത്യ’ മുന്നണി സമര്‍പ്പിച്ച ഹര്‍ജിയില്‍ സുപ്രീം കോടതി തെരഞ്ഞെടുപ്പ് കമ്മീഷന് നോട്ടീസ് അയച്ചിട്ടുണ്ട്. മുംബൈയിലെ ആസാദ് മൈതാനത്ത് പ്രതിഷേധിക്കാന്‍ അനുമതി നല്‍കിയപ്പോള്‍, തലസ്ഥാനത്ത് കടുത്ത അടിച്ചമര്‍ത്തലാണ് നടക്കുന്നതെന്ന് നേതാക്കള്‍ ആരോപിക്കുന്നു.
Tags: Delhi Connaught Place Protest, Cockroach Janta Party CJP, Abhijeet Dipke Tiranga March, BNSS Section 163 Delhi Police, Special Intensive Revision Protest, National News Malayalam, Political News Malayalam
News Tag Live യുട്യൂബ് ചാനല്‍ Subscribe ചെയ്യുക
Latest News
Trending
More Stories
All Rights Reserved © 2026