മൈസൂരുവില്‍ ബെംഗളൂരു-കോഴിക്കോട് ബസും ലോറിയും കൂട്ടിയിടിച്ച് വന്‍ അപകടം; കോഴിക്കോട് സ്വദേശി ഉള്‍പ്പെടെ 4 മരണം, 30 പേര്‍ക്ക് പരിക്ക്!

മൈസൂരു / കോഴിക്കോട്: ബെംഗളൂരുവില്‍ നിന്ന് കോഴിക്കോട്ടേക്ക് വരികയായിരുന്ന സ്വകാര്യ സ്ലീപ്പര്‍ ബസ് ചരക്കുലോറിയുമായി കൂട്ടിയിടിച്ച് ദാരുണ അപകടം. കര്‍ണാടകയിലെ മൈസൂരു പെരിയപട്ടണയ്ക്ക് സമീപം വെള്ളിയാഴ്ച പുലര്‍ച്ചെ 3:45-ഓടെയാണ് നാടിനെ നടുക്കിയ അപകടം അരങ്ങേറിയത്. അപകടത്തില്‍ കോഴിക്കോട് ബേപ്പൂര്‍ സ്വദേശി ഉള്‍പ്പെടെ നാല് പേര്‍ കൊല്ലപ്പെട്ടു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

‘കാവേരി’ എന്ന എസി സ്ലീപ്പര്‍ ബസാണ് എതിര്‍ദിശയില്‍ വന്ന ചരക്കുലോറിയുമായി നേര്‍ക്കുനേര്‍ കൂട്ടിയിടിച്ചത്. ഇടിയുടെ ആഘാതത്തില്‍ ബസിന്റെ മുന്‍ഭാഗം പൂര്‍ണ്ണമായും തകര്‍ന്നു.

പുലര്‍ച്ചെ 3.45-ന് ദുരന്തം; 30-ഓളം യാത്രക്കാര്‍ക്ക് പരിക്ക്

ബെംഗളൂരുവില്‍ നിന്നും കേരളത്തിലേക്ക് വരികയായിരുന്ന യാത്രക്കാര്‍ ഉറങ്ങിക്കിടക്കുന്ന സമയത്താണ് ദാരുണമായ അപകടമുണ്ടായത്. ബസിലും ലോറിയിലുമുണ്ടായിരുന്ന നാല് പേരാണ് സംഭവസ്ഥലത്തും ആശുപത്രിയിലേക്കുള്ള വഴിമധ്യേയുമായി മരണപ്പെട്ടത്. മരണപ്പെട്ടവരില്‍ ഒരാള്‍ കോഴിക്കോട് ബേപ്പൂര്‍ സ്വദേശിയാണെന്ന് തിരിച്ചറിഞ്ഞിട്ടുണ്ട്. മറ്റുള്ളവരുടെ വിവരങ്ങള്‍ പൊലീസ് ശേഖരിച്ചു വരികയാണ്.അപകടത്തില്‍ ബസിലുണ്ടായിരുന്ന മുപ്പതോളം യാത്രക്കാര്‍ക്ക് പരിക്കേറ്റിട്ടുണ്ട്.

സാരമായി പരിക്കേറ്റവരെ പെരിയപട്ടണ സര്‍ക്കാര്‍ ആശുപത്രിയിലും മൈസൂരുവിലെ മറ്റ് സ്വകാര്യ ആശുപത്രികളിലും പ്രവേശിപ്പിച്ചു. മരിച്ചവരുടെ മൃതദേഹങ്ങള്‍ പെരിയപട്ടണ സര്‍ക്കാര്‍ ആശുപത്രി മോര്‍ച്ചറിയിലേക്ക് മാറ്റി.

രക്ഷാപ്രവര്‍ത്തനം നടത്തി നാട്ടുകാരും പൊലീസും

വലിയ ശബ്ദം കേട്ട് ഓടിയെത്തിയ നാട്ടുകാരും പെരിയപട്ടണ പൊലീസും ചേര്‍ന്ന് വളരെ പ്രയാസപ്പെട്ടാണ് അപകടത്തില്‍പ്പെട്ട വാഹനങ്ങള്‍ക്കിടയില്‍ കുടുങ്ങിക്കിടന്ന യാത്രക്കാരെ പുറത്തെടുത്തത്. ഡ്രൈവര്‍ ഉറങ്ങിപ്പോയതാണോ അതോ അമിതവേഗതയാണോ അപകടത്തിന് കാരണമെന്നതിനെക്കുറിച്ച് പെരിയപട്ടണ പൊലീസ് കേസ് രജിസ്റ്റര്‍ ചെയ്ത് അന്വേഷണം ആരംഭിച്ചിട്ടുണ്ട്.

Tags: Mysuru Bus Accident, Periyapatna Bus Lorry Collision, Kaveri Sleeper Bus Accident, Kozhikode Beypore Native Dead, Mysore Road Accident Malayalam, Kerala News Malayalam, National News Malayalam

News Tag Live യുട്യൂബ് ചാനല്‍ Subscribe ചെയ്യുക