13
Oct 2026
Tue
ന്യൂഡല്‍ഹി: കേന്ദ്ര ഭരണകൂടത്തിന്റെയും തെരഞ്ഞെടുപ്പ് കമ്മീഷന്റെയും ജനാധിപത്യവിരുദ്ധ നടപടികള്‍ക്കെതിരെ പ്രക്ഷോഭം കൂടുതല്‍ തീവ്രമാക്കാന്‍ രാജ്യതലസ്ഥാനത്ത് ഇന്ത്യ (INDIA) മുന്നണി നേതാക്കളുടെ നിര്‍ണ്ണായക തീരുമാനം. ഏത് ഘട്ടത്തിലും പ്രക്ഷോഭത്തിന് ആഹ്വാനം ഉണ്ടാകാമെന്നും, വെറും 24 മണിക്കൂറിനുള്ളില്‍ അണികളെ അണിനിരത്താന്‍ എല്ലാ രാഷ്ട്രീയ പാര്‍ട്ടികളും സന്നദ്ധരായിരിക്കണമെന്നും ലോക്സഭാ പ്രതിപക്ഷ നേതാവ് രാഹുല്‍ ഗാന്ധി നിര്‍ദ്ദേശം നല്‍കി.
 |
|
ചൊവ്വാഴ്ച സുനേരി ബാഗിലെ ഔദ്യോഗിക വസതിയില്‍ രാഹുല്‍ ഗാന്ധി സംഘടിപ്പിച്ച ചായസല്‍ക്കാരത്തില്‍ സംസാരിക്കുകയായിരുന്നു അദ്ദേഹം. കേന്ദ്ര സര്‍ക്കാര്‍ എന്ത് നിലപാട് സ്വീകരിച്ചാലും ഭരണഘടന സംരക്ഷിക്കാനുള്ള ജനകീയ പ്രതിരോധം തുടരുമെന്ന് യോഗത്തിന് ശേഷമുള്ള സംയുക്ത വാര്‍ത്താസമ്മേളനത്തില്‍ നേതാക്കള്‍ പ്രഖ്യാപിച്ചു.
ചായസല്‍ക്കാരത്തില്‍ നേതാക്കളുടെ വന്‍നിര; ജന്തര്‍മന്തര്‍ വിജ്ഞാപനത്തിനെതിരെ അമര്‍ഷം
മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിന്റെ രാജി ആവശ്യപ്പെട്ടും, വോട്ടര്‍പട്ടിക ക്രമക്കേടുകള്‍ അന്വേഷിക്കണം എന്ന് ആവശ്യപ്പെട്ടും നടത്തുന്ന തുടര്‍സമരങ്ങള്‍ ആസൂത്രണം ചെയ്യാനാണ് രാഹുല്‍ ഗാന്ധി ചായസല്‍ക്കാരം വിളിച്ചുചേര്‍ത്തത്.
എ.ഐ.സി.സി അധ്യക്ഷന്‍ മല്ലികാര്‍ജുന്‍ ഖാര്‍ഗെ, സി.പി.പി അധ്യക്ഷ സോണിയ ഗാന്ധി, ആര്‍.ജെ.ഡി നേതാക്കളായ തേജസ്വി യാദവ്, മനോജ് ഝാ, സി.പി.ഐ (എം) ജനറല്‍ സെക്രട്ടറി എം.എ. ബേബി, സി.പി.ഐ ജനറല്‍ സെക്രട്ടറി ഡി. രാജ, തൃണമൂല്‍ കോണ്‍ഗ്രസ് എം.പിമാരായ മഹുവ മൊയ്ത്ര, സാഗരിക ഘോഷ്, സമാജ്വാദി പാര്‍ട്ടി നേതാക്കള്‍, വിദ്യാര്‍ത്ഥി പ്രതിനിധികളായ നെഹ ബോറ (AISA) തുടങ്ങി പ്രമുഖരുടെ വന്‍നിര പങ്കെടുത്തു.
ഡല്‍ഹി പോലീസ് അടിയന്തിരമായി ജന്തര്‍മന്തറിനെ സമരവേദി എന്ന പദവിയില്‍ നിന്നും ഒഴിവാക്കി വിജ്ഞാപനമിറക്കിയ കേന്ദ്ര നടപടിയെ നേതാക്കള്‍ ഒന്നടങ്കം അപലപിച്ചു. തോല്‍വി ഭയന്നാണ് ഭരണകൂടം ഇത്തരം വിലകുറഞ്ഞ നടപടികള്‍ സ്വീകരിക്കുന്നതെന്ന് തേജസ്വി യാദവും ഡി. രാജയും കുറ്റപ്പെടുത്തി. വരും ദിവസങ്ങളിലെ ഇന്ത്യ മുന്നണിയുടെ പ്രക്ഷോഭ മാര്‍ച്ചുകള്‍ ജന്തര്‍മന്തറിലേക്ക് തന്നെയായിരിക്കുമെന്നും മുന്നണി പ്രഖ്യാപിച്ചു.
‘വല മുറുകുകയാണ്, മോദിയും അമിത് ഷായും വിചാരണ നേരിടേണ്ടി വരും!’
വാര്‍ത്താസമ്മേളനത്തില്‍ കേന്ദ്ര സര്‍ക്കാരിനെതിരെ രാഹുല്‍ ഗാന്ധി കടുത്ത ഭാഷയിലാണ് ആഞ്ഞടിച്ചത്:
‘ഭരണഘടനയെ തകര്‍ത്ത് എളുപ്പത്തില്‍ രക്ഷപ്പെടാമെന്ന് ആരും കരുതേണ്ട. വോട്ട് മോഷണത്തിന് പിന്നില്‍ പ്രവര്‍ത്തിച്ച പ്രധാന സൂത്രധാരന്‍ നരേന്ദ്ര മോദിയും അത് നടപ്പിലാക്കിയ അമിത് ഷായും ഗ്യാനേഷ് കുമാറും മനസ്സിലാക്കേണ്ട ഒരു കാര്യമുണ്ട് നിങ്ങള്‍ക്ക് ചുറ്റും നിയമത്തിന്റെ വല മുറുകുകയാണ്! എത്ര വലിയ പദവിയിലുള്ളവരായാലും നിങ്ങളെല്ലാവരും വിചാരണ നേരിടേണ്ടി വരും. ജനങ്ങളുടെ പ്രതിരോധം വിജയം കാണുക തന്നെ ചെയ്യും!’ രാഹുല്‍ ഗാന്ധി വ്യക്തമാക്കി.
എം.എ. ബേബിയും, ശിവസേന (യു.ബി.ടി) എം.പി സഞ്ജയ് റാവത്തും, എന്‍.സി.പി (എസ്.പി) എം.പി സുപ്രിയ സുലെയും സര്‍ക്കാരിന്റെ ജനാധിപത്യ വിരുദ്ധ നടപടികളെയും പോലീസിന്റെ അടിച്ചമര്‍ത്തലുകളെയും രൂക്ഷമായി വിമര്‍ശിച്ചു.
നവംബറില്‍ റാംലീലാ മൈതാനിയില്‍ ‘മോക്ക് പാര്‍ലമെന്റ്’; ഗ്യാനേഷ് കുമാറിനെ ഇംപീച്ച് ചെയ്യും!
ചായസല്‍ക്കാരത്തിനിടയില്‍ ഉയര്‍ന്നുവന്ന പ്രധാന നിര്‍ദ്ദേശങ്ങളിലൊന്ന് നവംബര്‍ ആദ്യവാരം ഡല്‍ഹി റാംലീലാ മൈതാനിയില്‍ വെച്ച് ഇന്ത്യ മുന്നണിയുടെ മഹാറാലി സംഘടിപ്പിക്കുക എന്നതാണ്.
റാലിയില്‍ വെച്ച് പ്രതിപക്ഷ എം.പിമാരും നേതാക്കളും ചേര്‍ന്ന് ഒരു ‘മോക്ക് പാര്‍ലമെന്റ് സെഷന്‍’ (Mock Parliament Session) ചേരുകയും, അവിടെ വെച്ച് ജനങ്ങളുടെ പേരില്‍ മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനെ ഇംപീച്ച് (Impeach) ചെയ്യുന്ന പ്രതീകാത്മക നടപടികള്‍ നടത്തുകയും ചെയ്യും. സുപ്രീം കോടതിയുടെ പരിഗണനയിലുള്ള ഹര്‍ജിയില്‍ വരുന്ന വിധിക്കനുസരിച്ച് അന്തിമ സമരരേഖയ്ക്ക് നേതാക്കള്‍ രൂപം നല്‍കും.
Tags: Rahul Gandhi Tea Party Opposition Leaders, INDIA Bloc Jantar Mantar Protest, Gyanesh Kumar Resignation Demand, Mock Parliament Session Ramlila Maidan, National News Malayalam, Delhi Politics Malayalam, Rahul Gandhi Press Conference
News Tag Live യുട്യൂബ് ചാനല്‍ Subscribe ചെയ്യുക
Latest News
Trending
More Stories
All Rights Reserved © 2026