എസ്ബിഐ ഉപഭോക്താക്കളുടെ 3,897 രേഖകൾ ഡാർക്ക് വെബിൽ

രാജ്യത്തെ ഏറ്റവും വലിയ പൊതുമേഖലാ ബാങ്കായ സ്റ്റേറ്റ് ബാങ്ക് ഓഫ് ഇന്ത്യയുടെ (എസ്ബിഐ) ഉപഭോക്തൃ വിവരങ്ങൾ ഡാർക്ക് വെബിൽ കണ്ടെത്തിയതായി ബാങ്ക് സ്ഥിരീകരിച്ചു. വ്യക്തിഗത വിവരങ്ങൾ ഉൾപ്പെടുന്ന 3,897 ഉപഭോക്തൃ രേഖകളാണ് ചോർന്നതായി സംശയിക്കുന്നത്. എന്നാൽ ബാങ്കിന്റെ പ്രധാന പ്രവർത്തനങ്ങളെയോ സാമ്പത്തിക നിലയെയോ ബിസിനസ് തുടർച്ചയെയോ സംഭവം ബാധിച്ചിട്ടില്ലെന്ന് എസ്ബിഐ വ്യക്തമാക്കി.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ഒക്ടോബർ 16ന് ത്രെറ്റ് ഇന്റലിജൻസ് സേവനദാതാവ്, ഡിഫൻസ് സൈബർ ഏജൻസി, ഇന്ത്യൻ കമ്പ്യൂട്ടർ എമർജൻസി റെസ്‌പോൺസ് ടീം (CERT-In) എന്നിവരിൽനിന്ന് വിവരങ്ങൾ ചോർന്നിരിക്കാമെന്ന മുന്നറിയിപ്പ് ലഭിച്ചതായി ബാങ്ക് അറിയിച്ചു. ഡാർക്ക് വെബിൽ കണ്ടെത്തിയ ഏകദേശം 3.75 ലക്ഷം രേഖകളിൽ പ്രാഥമിക പരിശോധന നടത്തിയപ്പോഴാണ് വ്യക്തിഗത വിവരങ്ങളടങ്ങിയ 3,897 രേഖകൾ തിരിച്ചറിഞ്ഞത്.

ഉപഭോക്താക്കളുടെ പേര്, രജിസ്റ്റർ ചെയ്ത മൊബൈൽ നമ്പർ, ജനനത്തീയതി, ലിംഗം, ഇ-മെയിൽ വിലാസം, താമസ വിലാസം എന്നിവ ചോർന്ന രേഖകളിൽ ഉൾപ്പെട്ടിട്ടുണ്ടെന്നാണ് റിപ്പോർട്ട്. ബ്രാഞ്ച് വിവരങ്ങൾ, ഉപഭോക്തൃ തിരിച്ചറിയൽ രേഖകൾ, വായ്പകളുമായും മറ്റ് ഇടപാടുകളുമായും ബന്ധപ്പെട്ട ചില വിവരങ്ങളും രേഖകളിലുണ്ടെന്നാണ് സൂചന.

അതേസമയം, ബാങ്കിന്റെ പ്രധാന ബാങ്കിങ് സംവിധാനങ്ങൾ സാധാരണ നിലയിൽ പ്രവർത്തിക്കുന്നുണ്ടെന്നും ഉപഭോക്തൃ സേവനങ്ങൾക്ക് തടസ്സമില്ലെന്നും എസ്ബിഐ വ്യക്തമാക്കി. സൈബർ സുരക്ഷാ സംവിധാനങ്ങൾ സജീവമാക്കിയതായും സംഭവത്തെക്കുറിച്ച് വിശദമായ അന്വേഷണം നടത്തിവരികയാണെന്നും ബാങ്ക് അറിയിച്ചു. ചോർന്ന വിവരങ്ങളുടെ ആധികാരികത, ഉറവിടം, വ്യാപ്തി, ഉപഭോക്താക്കൾക്കുണ്ടാകാവുന്ന അപകടസാധ്യതകൾ എന്നിവയും അന്വേഷണവിധേയമാണ്.

ഹാക്കർമാരുടെ അവകാശവാദം

ഒക്ടോബർ 19ന് സൈബർ ആക്രമണത്തെക്കുറിച്ച് ഇന്ത്യ ടുഡേ ടെക് റിപ്പോർട്ട് ചെയ്തിരുന്നു. ‘Siriusim’ എന്ന പേരിൽ തിരിച്ചറിഞ്ഞ അജ്ഞാത ഹാക്കർ സംഘം 3.75 ലക്ഷം എസ്ബിഐ ഉപഭോക്താക്കളുടെ വിവരങ്ങൾ കൈവശപ്പെടുത്തിയതായി BreachForums എന്ന ഡാർക്ക് വെബ് ഫോറത്തിൽ അവകാശപ്പെട്ടതായാണ് റിപ്പോർട്ട്. എന്നാൽ ആക്രമണത്തിന് പിന്നിൽ ഈ സംഘമാണെന്ന് എസ്ബിഐ സ്ഥിരീകരിച്ചിട്ടില്ല.

ബാങ്കിങ് മേഖലയിലെ സൈബർ സുരക്ഷയെക്കുറിച്ചുള്ള ആശങ്കകൾ ശക്തമാകുന്നതിനിടെയാണ് സംഭവം. ജൂലൈയിൽ ബാങ്ക് ഓഫ് ബറോഡയുമായി ബന്ധപ്പെട്ട് ഒരു ടെറാബൈറ്റ് ഉപഭോക്തൃ വിവരങ്ങൾ ചോർന്നതായി റിപ്പോർട്ടുകൾ പുറത്തുവന്നിരുന്നു.

ALSO READ:മക്കയിൽ കനത്ത മഴയും മിന്നൽ പ്രളയവും: ഒഴുക്കിൽപ്പെട്ട് കുട്ടി മരിച്ചു; കാണാതായ കുട്ടിക്കായി തിരച്ചിൽ ശക്തമാക്കി സൗദി സിവിൽ ഡിഫൻസ്!

News Tag Live യുട്യൂബ് ചാനല്‍ Subscribe ചെയ്യുക