സിജെപി നേതാക്കൾക്ക് വീണ്ടും തിരിച്ചടി; സൗരവ് ദാസിന്റെയും അശുതോഷ് റങ്കയുടെയും ജുഡീഷ്യൽ കസ്റ്റഡി നീട്ടി

ന്യൂഡൽഹി: ജന്തർ മന്തർ അതിക്രമിച്ചു കയറിയെന്ന കേസിൽ കോക്രോച്ച് ജനതാ പാർട്ടി (സി.ജെ.പി) നേതാക്കളായ സൗരവ് ദാസിന്റെയും അശുതോഷ് റങ്കയുടെയും ജുഡീഷ്യൽ കസ്റ്റഡി രണ്ട് ദിവസത്തേക്ക് കൂടി നീട്ടി. തിങ്കളാഴ്ചയാണ് മന്ദിർ മാർഗ് പൊലീസ് സ്റ്റേഷനിലെ സ്പെഷ്യൽ എക്സിക്യൂട്ടീവ് മജിസ്ട്രേറ്റ് (എസ്.ഇ.എം) കസ്റ്റഡി നീട്ടിയത്. അഞ്ച് ദിവസത്തെ കസ്റ്റഡി കാലാവധി അവസാനിച്ചതിനെത്തുടർന്ന് ഇരുവരെയും കോടതിയിൽ ഹാജരാക്കിയിരുന്നു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

കസ്റ്റഡി നീട്ടണമെന്ന് ഡൽഹി പൊലീസ് ആവശ്യപ്പെട്ടപ്പോൾ, കൂടുതൽ കാലം തടങ്കലിൽ വെക്കേണ്ടതിന്റെ ആവശ്യകതയെ ചോദ്യം ചെയ്ത് സി.ജെ.പിയുടെ നിയമകാര്യ വിഭാഗം മേധാവി രത്ന സിങ് രംഗത്തെത്തി. കേസിൽ പ്രോസിക്യൂഷൻ നിയമപരമായ വാദങ്ങൾ അവതരിപ്പിച്ചില്ലെന്നും അനുമാനങ്ങൾ മാത്രമാണ് ഉന്നയിച്ചതെന്നും അവർ ആരോപിച്ചു.

കോടതിയുടെ നടപടികൾ സമയം പാഴാക്കുന്നതാണെന്ന് എക്സിലെ കുറിപ്പിൽ രത്ന സിങ് വിമർശിച്ചു. ഇരുവരെയും വിട്ടയക്കണമെന്നും അവർ ആവശ്യപ്പെട്ടു.

ഒക്ടോബർ 13-ന് ജന്തർ മന്തറിലെ പ്രതിഷേധ സ്ഥലത്തേക്ക് സ്വകാര്യവ്യക്തികളുടെ ഉടമസ്ഥതയിലുള്ള സ്ഥലത്തിലൂടെ കടന്നുകയറിയെന്നും ഔദ്യോഗിക കൃത്യനിർവഹണത്തിന് പൊലീസിനെ തടസ്സപ്പെടുത്തിയെന്നും ആരോപിച്ചാണ് സൗരവ് ദാസ്, അശുതോഷ് റങ്ക, പാർട്ടി അംഗം അജിങ്ക്യ ഷിൻഡെ എന്നിവരടക്കം 14 പേരെ കസ്റ്റഡിയിലെടുത്തത്. തുടർന്ന് ഒക്ടോബർ 14-ന് ദാസിനെയും റങ്കയെയും അഞ്ച് ദിവസത്തെ ജുഡീഷ്യൽ കസ്റ്റഡിയിൽ വിട്ടു.

നിയമലംഘനങ്ങൾ ആവർത്തിക്കാനും മറ്റുള്ളവരെ അതിന് പ്രേരിപ്പിക്കാനും സാധ്യതയുണ്ടെന്ന ആശങ്ക ചൂണ്ടിക്കാട്ടിയാണ് കസ്റ്റഡി നീട്ടാൻ പൊലീസ് ആവശ്യപ്പെട്ടത്. അതേസമയം, ഷിൻഡെയെ വ്യക്തിഗത ബോണ്ടിൽ വിട്ടയക്കുകയും ആറുമാസത്തേക്ക് സമാധാനവും നല്ല പെരുമാറ്റവും പാലിക്കണമെന്ന് നിർദേശിക്കുകയും ചെയ്തു.

വോട്ടർപട്ടികയിലെ സ്പെഷ്യൽ ഇന്റൻസീവ് റിവിഷനിൽ (എസ്.ഐ.ആർ) ക്രമക്കേടുകൾ നടന്നെന്നാരോപിച്ചാണ് സി.ജെ.പി പ്രവർത്തകർ തിരഞ്ഞെടുപ്പ് കമ്മീഷനെതിരെ പ്രതിഷേധിച്ചത്. മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെയും മുദ്രാവാക്യങ്ങൾ ഉയർത്തിയിരുന്നു.

ഒക്ടോബർ 10-ലെ പ്രതിഷേധവുമായി ബന്ധപ്പെട്ട കേസിൽ സി.ജെ.പി സ്ഥാപകൻ അഭിജീത് ദീപ്കെ, സൗരവ് ദാസ്, അശുതോഷ് റങ്ക എന്നിവർ നേരത്തേ 50,000 രൂപയുടെ ബോണ്ട് സമർപ്പിച്ചാണ് ജാമ്യത്തിൽ പുറത്തിറങ്ങിയത്. ഒരു വർഷത്തേക്ക് സമാധാനലംഘനവുമായി ബന്ധപ്പെട്ട കേസുകളിൽ ഉൾപ്പെടരുതെന്ന വ്യവസ്ഥയും അന്ന് ഏർപ്പെടുത്തിയിരുന്നു.

അതേസമയം, ഡൽഹി പൊലീസ് ഒക്ടോബർ 12 മുതൽ ജന്തർ മന്തറിനെ ഔദ്യോഗിക പ്രതിഷേധ വേദികളുടെ പട്ടികയിൽനിന്ന് ഒഴിവാക്കിയിരുന്നു. പുതിയ മാർഗനിർദേശങ്ങൾ പ്രകാരം രാംലീല മൈതാനം, ബുരാരി മൈതാനം, കിഴക്കൻ ഡൽഹിയിലെ സി.ബി.ഡി മൈതാനം എന്നിവയാണ് പകരം പ്രതിഷേധ വേദികളായി നിശ്ചയിച്ചിരിക്കുന്നത്.

ALSO READ:കശ്മീരിൽ പ്രായപൂർത്തിയാകാത്ത പെൺകുട്ടി പ്രസവത്തിനിടെ മരിച്ച സംഭവത്തിൽ സ്കൂൾ മേധാവിയും ഡോക്ടർമാരും ഉൾപ്പെടെ 15 പേർ പ്രതികൾ

News Tag Live യുട്യൂബ് ചാനല്‍ Subscribe ചെയ്യുക