കശ്മീരിൽ പ്രായപൂർത്തിയാകാത്ത പെൺകുട്ടി പ്രസവത്തിനിടെ മരിച്ച സംഭവത്തിൽ സ്കൂൾ മേധാവിയും ഡോക്ടർമാരും ഉൾപ്പെടെ 15 പേർ പ്രതികൾ

ജമ്മു കശ്മീരിലെ കിഷ്ത്വാറിൽ പ്രായപൂർത്തിയാകാത്ത പെൺകുട്ടി പ്രസവത്തിനിടെ മരിച്ച സംഭവത്തിൽ സർക്കാർ സ്കൂളിലെ ഹെഡ്മാസ്റ്ററും ഡോക്ടർമാരും ആശുപത്രി ജീവനക്കാരും ഉൾപ്പെടെ 15 പേർക്കെതിരെ കുറ്റപത്രം. പെൺകുട്ടിയെ ലൈംഗികമായി ചൂഷണം ചെയ്തെന്നും ഗർഭധാരണ വിവരം പുറത്തറിയാതിരിക്കാൻ ശ്രമിച്ചെന്നും ആരോപിക്കപ്പെടുന്ന സ്കൂൾ ഹെഡ്മാസ്റ്റർ ഖാലിദ് ഹുസൈനാണ് കേസിലെ പ്രധാന പ്രതി.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ജമ്മു കശ്മീർ പൊലീസിന്റെ ക്രൈം ബ്രാഞ്ച് സമർപ്പിച്ച ആയിരത്തിലധികം പേജുള്ള കുറ്റപത്രത്തിലാണ് ഞെട്ടിക്കുന്ന വിവരങ്ങളുള്ളത്. സർക്കാർ സ്കൂളിലെ ഹെഡ്മാസ്റ്റർ, രണ്ട് ഡോക്ടർമാർ, ജില്ലാ ആശുപത്രിയിലെ രണ്ട് ജീവനക്കാർ, പ്രാദേശിക സമുദായ നേതാവ് എന്നിവരടക്കം 15 പേരാണ് പ്രതിപ്പട്ടികയിലുള്ളത്.

ഗർഭധാരണം മറച്ചുവെക്കാൻ ശ്രമം

പെൺകുട്ടിയുടെ ഗർഭധാരണം മരണത്തിന് പത്ത് ദിവസം മുമ്പ് പ്രാഥമികാരോഗ്യ കേന്ദ്രത്തിൽ കണ്ടെത്തിയിരുന്നുവെന്നാണ് അന്വേഷണ സംഘത്തിന്റെ കണ്ടെത്തൽ. എന്നാൽ വിവരം പൊലീസിൽ അറിയിക്കാതിരിക്കാൻ ഖാലിദ് ഹുസൈൻ ഇടപെട്ടതായും ബന്ധുക്കളുടെയും മറ്റ് ചിലരുടെയും സഹായത്തോടെ വിഷയം ഒത്തുതീർപ്പാക്കാൻ ശ്രമിച്ചതായും കുറ്റപത്രത്തിൽ പറയുന്നു.

പ്രായപൂർത്തിയാകാത്ത പെൺകുട്ടിയുടെ ഗർഭധാരണ വിവരം പൊലീസിൽ അറിയിക്കാത്തതിന് ഡോക്ടർ രേഖ ശർമ, ഡോക്ടർ ഷഫ്ഖാത് ഷബീർ ഭവാനി, പ്രാദേശിക സമുദായ നേതാവ് മൻസൂർ അഹമ്മദ് എന്നിവർക്കെതിരെയും പോക്സോ നിയമപ്രകാരം കുറ്റം ചുമത്തിയിട്ടുണ്ട്.

പെൺകുട്ടിയുടെ പിതാവിനെ സാമൂഹികമായി ഒറ്റപ്പെടുത്തുമെന്ന് ഭീഷണിപ്പെടുത്തി പൊലീസിനെ സമീപിക്കുന്നതിൽനിന്ന് പിന്തിരിപ്പിച്ചെന്നും ‘റാസി-നാമ’ എന്ന ഒത്തുതീർപ്പ് രേഖയിൽ ഒപ്പിടാൻ നിർബന്ധിച്ചെന്നും കുറ്റപത്രം ആരോപിക്കുന്നു. ഈ രേഖ അന്വേഷണ സംഘം വീണ്ടെടുത്തതായും ഫോറൻസിക് പരിശോധനയിൽ അതിന്റെ ആധികാരികത സ്ഥിരീകരിച്ചതായും റിപ്പോർട്ടിൽ പറയുന്നു.

ഗർഭച്ഛിദ്ര ശ്രമം പാളി; പെൺകുട്ടി മരിച്ചു

ഗർഭധാരണം അവസാനിപ്പിക്കാൻ ജില്ലാ ആശുപത്രിയിലെ ജീവനക്കാരുടെ സഹായം പണം നൽകി തേടിയതായും കുറ്റപത്രത്തിലുണ്ട്. ഓഗസ്റ്റ് 19-ന് പെൺകുട്ടിയെ ആശുപത്രിയിലെത്തിച്ചപ്പോൾ പ്രായം തിരുത്തി പ്രായപൂർത്തിയായ വ്യക്തിയാണെന്ന് രേഖപ്പെടുത്തിയതായും അന്വേഷണ സംഘം ആരോപിക്കുന്നു.

ഗർഭച്ഛിദ്രത്തിനുള്ള ശ്രമങ്ങൾ പരാജയപ്പെട്ടതോടെ പെൺകുട്ടിയുടെ ആരോഗ്യനില വഷളായി. തുടർന്ന് ദോഡയിലെ ഗവൺമെന്റ് മെഡിക്കൽ കോളജിലേക്ക് മാറ്റി. നില ഗുരുതരമായതിനാൽ ജമ്മുവിലെ ഗവൺമെന്റ് മെഡിക്കൽ കോളജിലേക്ക് കൊണ്ടുപോകാൻ ഡോക്ടർമാർ നിർദേശിച്ചു. എന്നാൽ യാത്രയ്ക്കിടെ ഉധംപൂരിൽ വെച്ച് പെൺകുട്ടി മരിച്ചു. പ്രസവത്തിൽ ചാപിള്ളയും ജനിച്ചിരുന്നു.

തെളിവുകൾ നശിപ്പിക്കാനുള്ള ശ്രമത്തിന്റെ ഭാഗമായി പെൺകുട്ടിയെ കൊണ്ടുപോയ വാഹനം കഴുകിയതായും കുറ്റപത്രത്തിൽ ആരോപിക്കുന്നു.

15 പേർ പ്രതികൾ; ഡിഎൻഎ പരിശോധനാ ഫലം കാത്തിരിക്കുന്നു

ജില്ലാ ആശുപത്രിയിലെ ജീവനക്കാരായ സോണിക പരിഹാർ, സരീന ബീഗം, മറ്റൊരു സ്കൂളിലെ അധ്യാപകൻ അബ്ദുൽ ലത്തീഫ് ഭണ്ഡായി, ആശുപത്രി പരിസരത്ത് അനധികൃതമായി മെഡിക്കൽ ഷോപ്പ് നടത്തിയിരുന്നതായി ആരോപിക്കപ്പെടുന്ന ഹാറൂൺ റാഷിദ് മിർ എന്നിവരും പ്രതികളാണ്.

ഖാലിദ് ഹുസൈന്റെ ബന്ധുക്കളും സഹായികളുമായ താരിഖ് ഹുസൈൻ, ഫാറൂഖ് അഹമ്മദ്, ഗുലാം ഖാദിർ ഷെയ്ഖ്, നൂർ ദിൻ, പീർ ബക്ഷ്, മുഹമ്മദ് ഇസ്ഹാഖ് എന്നിവരെയും കുറ്റപത്രത്തിൽ ഉൾപ്പെടുത്തിയിട്ടുണ്ട്. റിയാസ് എന്ന ഡ്രൈവറെ ഇതുവരെ അറസ്റ്റ് ചെയ്തിട്ടില്ല. മൂന്ന് പ്രതികൾ ജാമ്യത്തിലാണെന്നും മറ്റുള്ളവർ ജയിലിലാണെന്നും റിപ്പോർട്ടിൽ പറയുന്നു.

പെൺകുട്ടിയുടെയും ചാപിള്ളയുടെയും ഖാലിദ് ഹുസൈന്റെയും സഹോദരന്മാരിൽ ഒരാളുടെയും ഡിഎൻഎ സാമ്പിളുകളുടെ പരിശോധനാഫലം ലഭിക്കാനുണ്ട്. ഫലം ലഭിച്ചശേഷം അനുബന്ധ കുറ്റപത്രം സമർപ്പിക്കുമെന്ന് അന്വേഷണ ഉദ്യോഗസ്ഥർ അറിയിച്ചു.

ALSO READ:മണിപ്പൂരിൽ നാല് പേർ കൊല്ലപ്പെട്ടു, മുഖ്യമന്ത്രിയുടെ വസതിക്ക് മുന്നിൽ മൃതദേഹങ്ങളുമായി പ്രതിഷേധം

News Tag Live യുട്യൂബ് ചാനല്‍ Subscribe ചെയ്യുക