മുംബൈയിൽ തട്ടിക്കൊണ്ടുപോയ ആറുവയസ്സുകാരനെ ഒന്നരമണിക്കൂറിനകം കണ്ടുപിടിച്ച് പൊലീസ് നായ

മുംബൈയിൽ തട്ടിക്കൊണ്ടുപോയ ആറുവയസ്സുകാരനെ ഒന്നരമണിക്കൂറിനകം കണ്ടുപിടിച്ച് പൊലീസ് നായ. അന്ധേരിയിലെ അശോക് ന​ഗറിലെ വീടിനു മുന്നിൽ കളിച്ചുകൊണ്ടിരുന്ന ആറുവയസ്സുകാരനെയാണ് കഴിഞ്ഞദിവസം അജ്ഞാതൻ തട്ടിക്കൊണ്ടുപോയത്. കുട്ടിയെ കാണാതെ വന്നതോടെ കുടംബം പൊലീസിൽ പരാതി നൽകുകയായിരുന്നു. തുടർന്ന് പൊലീസ് സ്ഥലത്തെത്തി പരിശോധന നടത്തി.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

പ്രദേശത്തൊരിടത്തും സിസിടിവി ഇല്ലാത്തത് അന്വേഷണത്തിന് തടസ്സമായി. ഈ സമയമാണ് വീട്ടുകാർ കുട്ടി ധരിച്ച ശേഷം മാറിയിട്ട ടീഷർട്ടിന്റെ കാര്യം പറയുന്നത്. ഇതോടെ ഡോബർമാൻ ഇനമായ പൊലീസ് നായ ലിയോയെ അന്വേഷണസംഘം സ്ഥലത്തെത്തിച്ചു. ഈ വസ്ത്രം പൊലീസ് ലിയോയെ കൊണ്ട് മണപ്പിച്ചു. ലിയോ ടീ ഷർട്ടിന്റെ മണം പിടിച്ച് ഓടിപ്പോവുകയും 500 മീറ്റർ അകലെ നിന്ന് കുട്ടിയെ കണ്ടെത്തുകയായിരുന്നു. പൊലീസ് പരിശോധന ഭയന്ന് കുട്ടിയെ ഉപേക്ഷിച്ച് അക്രമി കടന്നുകളയുകയായിരുന്നുവെന്നാണ് നി​ഗമനം.