19
Nov 2026
Thu
19 Nov 2026 Thu
Ariyil shukoor murder case verdict

പ്രമാദമായ അരിയില്‍ ഷുക്കൂര്‍ വധക്കേസില്‍ സിപിഎം സംസ്ഥാന സെക്രട്ടേറിയറ്റ് അംഗം പി ജയരാജനും സംസ്ഥാന സമിതി അംഗം ടിവി രാജേഷും കുറ്റവിമുക്തര്‍. സിപിഎം സംസ്ഥാന സെക്രട്ടറി എം.വി. ഗോവിന്ദന്റെ മകന്‍ ശ്യാംജിത്തിനെയും എറണാകുളം പ്രത്യേക സിബിഐ കോടതി വെറുതെ വിട്ടു. 31 പ്രതികളില്‍ 18 പേരെയാണ് വെറുതെ വിട്ടത്. 13 പേര്‍ കുറ്റക്കാരാണെന്നും കോടതി വിധിച്ചു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ഒന്നാം പ്രതി കെ വി സുമേഷ്, മൂന്നാം പ്രതി അനൂപ്, ഏഴാം പ്രതി പവിത്രൻ, ഒമ്പതാം പ്രതി മനോഹരൻ, പത്താം പ്രതി ദിനേശൻ എന്നിവരാണ് കുറ്റക്കാർ.

കേരള രാഷ്ട്രീയത്തില്‍ വലിയ കോളിളക്കം സൃഷ്ടിച്ച അരിയില്‍ അബ്ദുല്‍ ഷുക്കൂര്‍ വധക്കേസില്‍ 14 വര്‍ഷത്തിന് ശേഷം എറണാകുളം പ്രത്യേക സിബിഐ കോടതി വിധി പ്രസ്താവിച്ചത്. കണ്ണൂര്‍ അരിയിലെ എംഎസ്എഫ് നേതാവും യൂത്ത് ലീഗ് പ്രവര്‍ത്തകനുമായ 23-കാരന്‍ ഷുക്കൂറിനെ മണിക്കൂറുകളോളം തടങ്കലില്‍ വെച്ച്, ഫോട്ടോ എടുത്ത് ആളെ ഉറപ്പാക്കിയ ശേഷം ‘പാര്‍ട്ടി കോടതി’ വിധി നടപ്പാക്കി കൊലപ്പെടുത്തിയെന്നാണ് കേസ്.

സിപിഎം സംസ്ഥാന സെക്രട്ടേറിയറ്റ് അംഗം പി. ജയരാജന്‍, സംസ്ഥാന സമിതി അംഗം ടി.വി. രാജേഷ് എന്നിവരടക്കം 33 പ്രതികളാണ് കേസിലുള്ളത്. ഇതില്‍ രണ്ട് പേര്‍ വിചാരണയ്ക്കിടെ മരിച്ചതിനാല്‍ ബാക്കിയുള്ള 31 പ്രതികള്‍ക്കുള്ള വിധിയാണ് കോടതി പ്രഖ്യാപിച്ചത്.

എസ്എംഎസ് വഴി ഫോട്ടോ അയച്ച് ആളെ ഉറപ്പാക്കി; 2012-ലെ ആ ക്രൂരകൊലപാതകം
2012 ഫെബ്രുവരി 20-നായിരുന്നു കണ്ണൂര്‍ കണ്ണപുരം കീഴറയിലെ വള്ളുവന്‍കടവ് ചുള്ളിയോട് വയലില്‍ വെച്ച് ഷുക്കൂര്‍ കൊല്ലപ്പെട്ടത്. അന്ന് സിപിഎം കണ്ണൂര്‍ ജില്ലാ സെക്രട്ടറിയായിരുന്ന പി. ജയരാജനും എംഎല്‍എയായിരുന്ന ടി.വി. രാജേഷും സഞ്ചരിച്ച വാഹനവ്യൂഹം തടഞ്ഞുനിര്‍ത്തി മുസ്ലിം ലീഗ് പ്രവര്‍ത്തകര്‍ ആക്രമിച്ചതിന്റെ പ്രതികാരമായാണ് കൊലപാതകം നടന്നതെന്നാണ് സിബിഐ കണ്ടെത്തല്‍.

ആക്രമണത്തിന് പിന്നാലെ ഷുക്കൂറിനെയും സുഹൃത്ത് സക്കറിയ അയ്യൂബിനെയും സിപിഎം പ്രവര്‍ത്തകര്‍ പിടികൂടി തടങ്കലില്‍ വെച്ചു. തുടര്‍ന്ന് ഇവരുടെ ചിത്രങ്ങള്‍ മൊബൈല്‍ ഫോണില്‍ പകര്‍ത്തി എസ്എംഎസ് വഴി അയച്ചുനല്‍കി ആക്രമണത്തില്‍ പങ്കെടുത്തവര്‍ തന്നെയെന്ന് ഉറപ്പിച്ച ശേഷമാണ് ക്രൂരമായി വെട്ടിക്കൊലപ്പെടുത്തിയത്. സംഭവസ്ഥലത്തുവെച്ചുതന്നെ ഷുക്കൂര്‍ മരിക്കുകയും സക്കറിയയ്ക്ക് ഗുരുതരമായി പരിക്കേല്‍ക്കുകയും ചെയ്തു.

ആശുപത്രി മുറിയിലെ ഗൂഢാലോചന; സാക്ഷികളുടെ അസാന്നിധ്യം നിര്‍ണ്ണായകം

തളിപ്പറമ്പിലെ ഡിവൈഎഫ്ഐ പ്രവര്‍ത്തകരായിരുന്ന കെ.വി. സുമേഷ്, പി. ഗണേഷന്‍ എന്നിവരാണ് കേസിലെ ഒന്നും രണ്ടും പ്രതികള്‍. സി.എന്‍. മോഹനന്‍ 11-ാം പ്രതിയും, സിപിഎം സംസ്ഥാന സെക്രട്ടറി എം.വി. ഗോവിന്ദന്റെ മകന്‍ ശ്യാംജിത്ത് കേസിലെ മറ്റൊരു പ്രതിയുമാണ്.

കേസില്‍ 32-ാം പ്രതിയാണ് പി. ജയരാജന്‍, 33-ാം പ്രതി ടി.വി. രാജേഷ്. ആക്രമണത്തിന് പിന്നാലെ പി. ജയരാജനെ പ്രവേശിപ്പിച്ച തളിപ്പറമ്പ് സഹകരണ ആശുപത്രിയിലെ 315-ാം നമ്പര്‍ മുറിയില്‍ വെച്ച് ഇരുവരും ചേര്‍ന്ന് ഗൂഢാലോചന നടത്തിയാണ് കൊലപാതകം ആസൂത്രണം ചെയ്തതെന്നാണ് സിബിഐ കുറ്റപത്രത്തില്‍ പറയുന്നത്.

നിര്‍ണ്ണായക സാക്ഷികള്‍ ഹാജരായില്ല: 17 മാസം നീണ്ട വിചാരണയില്‍ സിബിഐ കുറ്റപത്രത്തിലെ 81 സാക്ഷികളില്‍ 41 പേരെയാണ് വിസ്തരിച്ചത്. 238 രേഖകളും 21 തൊണ്ടിമുതലുകളും ഹാജരാക്കി.

എന്നാല്‍, ആശുപത്രി മുറിയിലെ ഗൂഢാലോചനയില്‍ പി. ജയരാജന്റെയും ടി.വി. രാജേഷിന്റെയും പങ്ക് തെളിയിക്കാന്‍ പൊലീസിന് മൊഴി നല്‍കിയിരുന്ന പ്രധാന സാക്ഷികള്‍ (ചിലര്‍ വിദേശത്തായതിനാല്‍) കോടതിയില്‍ ഹാജരായി മൊഴി നല്‍കിയിരുന്നില്ല. ഇതാണ് സിബിഐയുടെ ഗൂഢാലോചന വാദങ്ങളെ ബാധിച്ചത്.

സക്കറിയയുടെ മൊഴി: പരിക്കേറ്റ ദൃക്‌സാക്ഷി സക്കറിയ കോടതിയില്‍ വെച്ച് 23 പ്രതികളെ തിരിച്ചറിഞ്ഞിരുന്നു. സക്കറിയയുടെ മൊഴിയും വൂണ്ട് സര്‍ട്ടിഫിക്കറ്റും സംഭവസ്ഥലത്തുനിന്ന് ലഭിച്ച രക്തക്കറയും പ്രോസിക്യൂഷന്‍ പ്രധാന തെളിവുകളായി ചൂണ്ടിക്കാട്ടിയിട്ടുണ്ട്.

ഉമ്മയുടെ നിയമപോരാട്ടവും സിബിഐ അന്വേഷണവും

ലോക്കല്‍ പൊലീസിന്റെ അന്വേഷണത്തില്‍ തൃപ്തിയില്ലാതിരുന്ന ഷുക്കൂറിന്റെ മാതാവ് പി.സി. ആത്തിക്ക നല്‍കിയ ഹര്‍ജിയിലാണ് 2016 ഫെബ്രുവരി എട്ടിന് കേരള ഹൈക്കോടതി കേസ് സിബിഐക്ക് വിട്ടത്. പൊലീസിന്റെ അന്വേഷണത്തെയും സിപിഎമ്മിനെയും രൂക്ഷമായി വിമര്‍ശിച്ചുകൊണ്ടായിരുന്നു ജസ്റ്റിസ് ബി. കെമാല്‍ പാഷയുടെ ഉത്തരവ്. 2019 ഫെബ്രുവരി 11-ന് സിബിഐ കുറ്റപത്രം സമര്‍പ്പിച്ചു. കുറ്റക്കാരെന്ന് കണ്ടെത്തുന്ന പ്രതികള്‍ക്ക് നിയമം അനുശാസിക്കുന്ന പരമാവധി ശിക്ഷ നല്‍കണമെന്നാണ് പ്രോസിക്യൂഷന്‍ ആവശ്യപ്പെട്ടിരുന്നത്.

Tags: Ariyil Shukoor Murder Case, Kochi CBI Court Verdict, P Jayarajan, TV Rajesh, Kannur Political Murder, MSF Worker Shukoor, CPM Kerala, Kerala News Malayalam, Malayalam News

News Tag Live യുട്യൂബ് ചാനല്‍ Subscribe ചെയ്യുക