ഗസ വിഷയത്തില്‍ ജൂറിയുടെ പരാമര്‍ശത്തില്‍ ‘ഞെട്ടല്‍’; ബെര്‍ലിന്‍ ചലച്ചിത്ര മേളയില്‍ നിന്ന് അരുന്ധതി റോയ് പിന്മാറി

ഗസയില്‍ ഇസ്രായേല്‍ നടത്തുന്ന വംശഹത്യയെക്കുറിച്ച് ബെര്‍ലിന്‍ അന്താരാഷ്ട്ര ചലച്ചിത്ര മേളയിലെ ജൂറി അംഗങ്ങള്‍ നടത്തിയ ‘മനസാക്ഷിക്ക് നിരക്കാത്ത പ്രസ്താവനകളില്‍’ പ്രതിഷേധിച്ച് താന്‍ മേളയില്‍ നിന്ന് പിന്മാറുകയാണെന്ന് ഇന്ത്യന്‍ എഴുത്തുകാരി അരുന്ധതി റോയ് പ്രഖ്യാപിച്ചു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ഇന്ത്യയിലെ ‘ദി വയര്‍’ (The Wire) പത്രത്തില്‍ എഴുതിയ ലേഖനത്തിലാണ് അരുന്ധതി റോയ് നിലപാട് വ്യക്തമാക്കിയത്. പ്രശസ്ത സംവിധായകന്‍ വിം വെന്‍ഡേഴ്സ് ഉള്‍പ്പെടെയുള്ള ബെര്‍ലിനാലെ ജൂറി അംഗങ്ങള്‍ ‘കല രാഷ്ട്രീയമാകരുത്’ എന്ന് നടത്തിയ പരാമര്‍ശങ്ങള്‍ തന്നെ അമ്പരപ്പിച്ചുവെന്ന് അവര്‍ പറഞ്ഞു.

‘മാനവികതയ്ക്കെതിരായ ഒരു കുറ്റം നമ്മുടെ മുന്നില്‍ തത്സമയം നടക്കുമ്പോള്‍ പോലും, അതിനെക്കുറിച്ചുള്ള സംഭാഷണങ്ങളെ അടിച്ചമര്‍ത്താനുള്ള ഒരു വഴിയാണിത്,’ ‘ഗോഡ് ഓഫ് സ്‌മോള്‍ തിങ്ങ്‌സ്’ ഉള്‍പ്പെടെയുള്ള നോവലുകളുടെയും ലേഖനങ്ങളുടെയും രചയിതാവായ അരുന്ധതി റോയ് എഴുതി. ‘ഞാന്‍ ഞെട്ടിയിരിക്കുകയാണ്, എനിക്ക് അറപ്പാണ് തോന്നുന്നത്. ഗസയിലെ യുദ്ധം നിര്‍ത്താന്‍ കലാകാരന്മാരും എഴുത്തുകാരും ചലച്ചിത്ര പ്രവര്‍ത്തകരും തങ്ങളുടെ കഴിവിന്റെ പരമാവധി ശ്രമിക്കണമെന്നാണ് ഞാന്‍ വിശ്വസിക്കുന്നത്,’ അവര്‍ കൂട്ടിച്ചേര്‍ത്തു.

‘എനിക്ക് ഇത് വ്യക്തമായി പറയണം, ഗസയില്‍ സംഭവിച്ചതും തുടരുന്നതും ഇസ്രായേല്‍ ഭരണകൂടം ഫലസ്തീന്‍ ജനതയ്ക്ക് നേരെ നടത്തുന്ന വംശഹത്യയാണ്. ഈ യുദ്ധത്തിന് അമേരിക്കയുടെയും ജര്‍മ്മനിയുടെയും മറ്റ് പല യൂറോപ്യന്‍ രാജ്യങ്ങളുടെയും പിന്തുണയും ഫണ്ടിംഗും ഉണ്ട്, ഇത് അവരെ ഈ കുറ്റകൃത്യത്തില്‍ പങ്കാളികളാക്കുന്നു,’ അവര്‍ കുറിച്ചു.

വ്യാഴാഴ്ച നടന്ന ഫെസ്റ്റിവല്‍ ഉദ്ഘാടന പാനലിനിടെ, ഗസയിലെ വംശഹത്യയ്ക്ക് ജര്‍മ്മന്‍ സര്‍ക്കാര്‍ നല്‍കുന്ന പിന്തുണയെക്കുറിച്ചും മനുഷ്യാവകാശ പ്രശ്‌നങ്ങളിലെ ‘വിവേചനപരമായ സമീപനത്തെക്കുറിച്ചും’ ഒരു പത്രപ്രവര്‍ത്തകന്‍ ജൂറി അംഗങ്ങളോട് ചോദിച്ചിരുന്നു. ഇതിന് മറുപടിയായി, ഏഴംഗ ജൂറിയുടെ അധ്യക്ഷനായ ജര്‍മ്മന്‍ ചലച്ചിത്രകാരന്‍ വിം വെന്‍ഡേഴ്സ് പറഞ്ഞത്, ചലച്ചിത്ര പ്രവര്‍ത്തകര്‍ ‘രാഷ്ട്രീയത്തില്‍ നിന്ന് മാറിനില്‍ക്കണം’ എന്നാണ്.

‘പൂര്‍ണ്ണമായും രാഷ്ട്രീയത്തിന് വേണ്ടിയുള്ള സിനിമകളാണ് നമ്മള്‍ നിര്‍മ്മിക്കുന്നതെങ്കില്‍, നമ്മള്‍ രാഷ്ട്രീയത്തിന്റെ മേഖലയിലേക്ക് കടക്കുകയാണ്. എന്നാല്‍ നമ്മള്‍ രാഷ്ട്രീയത്തിന് ഒരു ബദല്‍ ശക്തിയാണ്. രാഷ്ട്രീയത്തിന്റെ വിപരീതമാണ നമ്മള്‍. നമ്മള്‍ ജനങ്ങളുടെ കാര്യമാണ് നോക്കേണ്ടത്, രാഷ്ട്രീയക്കാരുടെ ജോലിയല്ല ചെയ്യേണ്ടത്,’ വെന്‍ഡേഴ്സ് പറഞ്ഞു.

മറ്റൊരു ജൂറി അംഗമായ പോളിഷ് ചലച്ചിത്ര നിര്‍മ്മാതാവ് എവ പുഷിന്‍സ്‌ക ഈ ചോദ്യം ചോദിക്കുന്നത് അല്‍പ്പം ‘അനീതിയാണ്’ എന്നാണ് അഭിപ്രായപ്പെട്ടത്. സര്‍ക്കാരുകള്‍ ഇസ്രായേലിനെയോ ഫലസ്തീനെയോ പിന്തുണയ്ക്കുന്നതിന് ചലച്ചിത്ര പ്രവര്‍ത്തകര്‍ ഉത്തരവാദികളാകില്ലെന്ന് അവര്‍ പറഞ്ഞു. ‘വംശഹത്യ നടക്കുന്ന മറ്റ് പല യുദ്ധങ്ങളുമുണ്ട്, നമ്മള്‍ അതിനെക്കുറിച്ചൊന്നും സംസാരിക്കാറില്ലല്ലോ,’ എന്നും പുഷിന്‍സ്‌ക കൂട്ടിച്ചേര്‍ത്തു.

ഫെബ്രുവരി 12 മുതല്‍ 22 വരെ നടക്കുന്ന മേളയില്‍ അരുന്ധതി റോയ് പങ്കെടുക്കേണ്ടതായിരുന്നു. അവര്‍ തിരക്കഥയെഴുതിയ 1989-ലെ ‘ഇന്‍ വിച്ച് ആനി ഗിവ്‌സ് ഇറ്റ് ദോസ് വണ്‍സ്’ (In Which Annie Gives It Those Ones) എന്ന ചിത്രം ക്ലാസിക് വിഭാഗത്തിലേക്ക് തിരഞ്ഞെടുക്കപ്പെട്ടിരുന്നു.

അമേരിക്ക കഴിഞ്ഞാല്‍ ഇസ്രായേലിലേക്ക് ഏറ്റവും കൂടുതല്‍ ആയുധങ്ങള്‍ കയറ്റുമതി ചെയ്യുന്ന രാജ്യങ്ങളില്‍ ഒന്നായ ജര്‍മ്മനി, ഫലസ്തീനികള്‍ക്ക് ഐക്യദാര്‍ഢ്യം പ്രകടിപ്പിക്കുന്നവരെ തടയാന്‍ കര്‍ശനമായ നടപടികളാണ് സ്വീകരിച്ചു വരുന്നത്.

2024-ല്‍, അഞ്ഞൂറിലധികം അന്താരാഷ്ട്ര കലാകാരന്മാരും ചലച്ചിത്ര പ്രവര്‍ത്തകരും എഴുത്തുകാരും ജര്‍മ്മന്‍ സര്‍ക്കാര്‍ ഫണ്ട് നല്‍കുന്ന സാംസ്‌കാരിക സ്ഥാപനങ്ങളുമായി സഹകരിക്കുന്നത് നിര്‍ത്താന്‍ ആഹ്വാനം ചെയ്തിരുന്നു. അഭിപ്രായസ്വാതന്ത്ര്യത്തെ, പ്രത്യേകിച്ച് ഫലസ്തീന്‍ ഐക്യദാര്‍ഢ്യത്തെ അടിച്ചമര്‍ത്തുന്ന ജര്‍മ്മനിയുടെ നയങ്ങളില്‍ പ്രതിഷേധിച്ചായിരുന്നു ഇത്. ‘ഇസ്രായേലിന് ജര്‍മ്മനി നല്‍കുന്ന അചഞ്ചലമായ പിന്തുണയെ ചോദ്യം ചെയ്യുന്ന സാംസ്‌കാരിക പ്രവര്‍ത്തകരെ കണ്ടെത്തി പുറത്താക്കാന്‍ സാംസ്‌കാരിക സ്ഥാപനങ്ങള്‍ സോഷ്യല്‍ മീഡിയയും ഹര്‍ജികളും നിരീക്ഷിക്കുകയാണ്,’ ഈ ഉദ്യമത്തിന്റെ സംഘാടകര്‍ പറഞ്ഞു.