ഖത്തറില്‍ മെയ് 15, 16 തിയ്യതികളില്‍ ഇന്ത്യന്‍ കാര്‍ണിവല്‍; ഗായകന്‍ അനൂപ് ശങ്കര്‍ എത്തുന്നു

ഇന്ത്യയുടെ സമ്പന്നവും വൈവിധ്യപൂര്‍ണ്ണവുമായ സംസ്‌കാരത്തിന്റെ ആഘോഷമായ ”ഇന്ത്യന്‍ കാര്‍ണിവല്‍” 2025 മെയ് 15, 16 തീയതികളില്‍ വൈകുന്നേരം 4 മുതല്‍ രാത്രി 10 വരെ ഐഡിയല്‍ ഇന്ത്യന്‍ സ്‌കൂളില്‍ നടക്കും. (Indian Carnival to be held in Qatar on May 15th and 16th ) ഇന്ത്യന്‍ എംബസിക്കൊപ്പം ഇന്ത്യന്‍ കള്‍ച്ചറല്‍ സെന്റര്‍ (ഐസിസി) കൂടി ചേര്‍ന്നാണ് ഇത് അവതരിപ്പിക്കുന്നത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

പ്രശസ്ത ഗായകന്‍ അനൂപ് ശങ്കറും സംഘവും അവതരിപ്പിക്കുന്ന, സംഗീതവും വിനോദവും നിറഞ്ഞ ഒരു സായാഹ്നവും തത്സമയ സംഗീത കച്ചേരിയും പരിപാടിയുടെ ഒരു പ്രത്യേക ആകര്‍ഷണമായിരിക്കും.

പ്രതിദിനം 20,000-ത്തിലധികം ആളുകളെ പ്രതീക്ഷിക്കുന്ന ഐസിസി കാര്‍ണിവല്‍ 2025, ഈ വര്‍ഷത്തെ ഏറ്റവും വലിയ സാംസ്‌കാരിക പരിപാടികളില്‍ ഒന്നായിരിക്കും. ഇന്ത്യയും ഖത്തറും തമ്മിലുള്ള സൗഹൃദം പ്രോത്സാഹിപ്പിക്കുകയും ഇന്ത്യന്‍ പാരമ്പര്യങ്ങളും സംസ്‌കാരവും ആഘോഷിച്ചുകൊണ്ട് ഇന്ത്യന്‍ സമൂഹത്തെ ഒരുമിച്ച് കൊണ്ടുവരികയുമാണ് പരിപാടിയുടെ ലക്ഷ്യം.

ALSO READ: മേല്‍വസ്ത്രങ്ങള്‍ അഴിച്ച് അടിവസ്ത്രം മാത്രമിട്ട് ഇരിക്കാന്‍ ആവശ്യപ്പെട്ടു; സംവിധായകനെതിരേ ഗുരുതര ആരോപണവുമായി നടി

ലൈവ് ഓര്‍ക്കസ്ട്ര, ചെണ്ടമേളം, ഐസിസിയുടെ അനുബന്ധ സംഘടനകള്‍, ഇന്ത്യന്‍ സ്‌കൂളുകള്‍, സ്ഥാപനങ്ങള്‍ എന്നിവയിലെ പ്രതിഭാധനരായ കലാകാരന്മാരുടെ ഗ്രൂപ്പ് നൃത്തങ്ങള്‍ തുടങ്ങിയ വൈവിധ്യമാര്‍ന്ന പ്രകടനങ്ങള്‍ തുടങ്ങിയവ സന്ദര്‍ശകര്‍ക്ക് ആസ്വദിക്കാനാകും.

കേരളത്തിന്റെ തിരുവാതിരക്കളിയും ഗുജറാത്തിന്റെ ഗര്‍ബ (ഡാണ്ഡിയ) നൃത്തവും സംയോജിപ്പിച്ച് ഒരു പ്രത്യേക ഫ്യൂഷന്‍ ഡാന്‍സ് പെര്‍ഫോമന്‍സും ഉണ്ടായിരിക്കും. വിവിധ ഇന്ത്യന്‍ സംസ്ഥാനങ്ങളില്‍ നിന്നുള്ള സാംസ്‌കാരിക പവലിയനുകള്‍ ഇന്ത്യയുടെ വൈവിധ്യമാര്‍ന്ന പൈതൃകത്തിന്റെ മനോഹരമായ അനുഭവങ്ങള്‍ സന്ദര്‍ശകര്‍ക്ക് പ്രദാനം ചെയ്യും.

ഇന്ത്യയിലെ കേന്ദ്ര-സംസ്ഥാന സര്‍ക്കാരുകളുടെ സാമൂഹിക സേവന പരിപാടികളെക്കുറിച്ചുള്ള വിവരങ്ങള്‍ നല്‍കുന്നതിനായി ഒരു പ്രത്യേക പവലിയന്‍ ഉണ്ടായിരിക്കും. ഇന്ത്യന്‍ കരകൗശല വസ്തുക്കള്‍, പരമ്പരാഗത വസ്ത്രങ്ങള്‍, ആഭരണങ്ങള്‍ എന്നിവ വില്‍ക്കുന്ന സ്റ്റാളുകളുള്ള ഒരു സജീവമായ ബസാര്‍, ഇന്ത്യന്‍ വിഭവങ്ങള്‍ വാഗ്ദാനം ചെയ്യുന്ന ഒരു ഫുഡ് കോര്‍ട്ട് എന്നിവയും ഉണ്ടായിരിക്കും.

പരിപാടിയുടെ ഭാഗമായി, ഐസിസി അതിന്റെ പുതിയ ലോഗോ അവതരിപ്പിക്കുകയും ഐസിസി മൊബൈല്‍ ആപ്പ്, ഐസിസി പ്രിവിലേജ് കാര്‍ഡ് എന്നിവ പുറത്തിറക്കുകയും ചെയ്യും.

ഖത്തറില്‍ താമസിക്കുന്ന ഇന്ത്യന്‍ സമൂഹത്തിലെ ഏകദേശം 800,000 അംഗങ്ങളെ പ്രതിനിധീകരിക്കുന്ന ഈ പരിപാടി, ഇന്ത്യന്‍ സാംസ്‌കാരിക കേന്ദ്രവുമായി ബന്ധപ്പെട്ട വിവിധ കമ്മ്യൂണിറ്റി സംഘടനകളുടെ പൂര്‍ണ്ണ പിന്തുണയോടെയാണ് സംഘടിപ്പിക്കുന്നത്.