പ്രണയബന്ധത്തിന്റെ പേരിൽ 31കാരനെ മരത്തിൽ കെട്ടിയിട്ട് തല്ലിക്കൊന്നു

പ്രണയബന്ധത്തിന്റെ പേരിൽ 31കാരനെ പുളിമരത്തിൽ കെട്ടിയിട്ട് തല്ലിക്കൊന്നു. ഗുജറാത്തിലെ മെഹ്സാന ജില്ലയിലെ ഖേരാലു താലൂക്കിലെ തംഗാന ഗ്രാമത്തിലാണ് സംഭവം. സിദ്ധ്പൂർ സ്വദേശിയും ചോളമണ്ഡലം ഇൻവെസ്റ്റ്‌മെന്റ് ആൻഡ് ഫിനാൻസ് കമ്പനിയിൽ ക്രെഡിറ്റ് മാനേജരായി ജോലി ചെയ്തിരുന്ന രഞ്ജീത്‌ജി ചതുർജി ഠാക്കോറാണ് മരിച്ചത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

കഴിഞ്ഞ രണ്ട് വർഷമായി തംഗാന സ്വദേശിനിയായ യുവതിയുമായി രഞ്ജീത്‌ജി പ്രണയത്തിലായിരുന്നുവെന്നാണ് പൊലീസ് പറയുന്നത്. ചൊവ്വാഴ്ച ജോലിക്കായി മോട്ടോർ സൈക്കിളിൽ വീട്ടിൽനിന്ന് ഇറങ്ങിയ ഇയാൾ യുവതിയെ കാണാൻ തംഗാനയിലെത്തിയതായാണ് വിവരം. തുടർന്ന് യുവതിയുടെ കുടുംബാംഗങ്ങൾ ഇയാളെ പിടികൂടിയെന്നാണ് പരാതി.

സംഭവമറിഞ്ഞ് രഞ്ജീത്‌ജിയുടെ പിതാവ് ചതുർജി ബദ്സംഗ്ജി ഠാക്കോറും ബന്ധുക്കളും തംഗാനയിലെത്തി. യുവതിയുടെ വീട്ടിൽ പുളിമരത്തിന് താഴെ ഇരുമ്പുകട്ടിലിൽ കിടത്തിയ നിലയിലാണ് മൃതദേഹം കണ്ടെത്തിയത്. ശരീരത്തിന്റെ പുറംഭാഗം, കഴുത്ത്, കാൽമുട്ടുകൾ എന്നിവിടങ്ങളിൽ ഗുരുതരമായ പരുക്കുകളും ചതവുകളും ഉണ്ടായിരുന്നുവെന്നാണ് പരാതിയിൽ പറയുന്നത്.

രഞ്ജീത്‌ജിയുടെ കൈകാലുകൾ കയർ ഉപയോഗിച്ച് കെട്ടിയശേഷം വടികളും വടിക്കഷണങ്ങളും ഉപയോഗിച്ച് മർദിച്ചെന്നാണ് പിതാവിന്റെ പരാതിയിലുള്ളത്. യുവതിയുടെ അമ്മ ഹൻസാബെൻ, മകൻ ഹിതേഷ്‌ജി, ബന്ധുവായ ഭേമാജി എന്നിവർ ചേർന്നാണ് ആക്രമിച്ചതെന്നാണ് ആരോപണം. പിന്നീട് സാക്രി ഗ്രാമവാസിയായ രാമാജി കേശാജി ഠാക്കോറിനെയും സ്ഥലത്തേക്ക് വിളിച്ചുവരുത്തി ഇയാളും മർദനത്തിൽ പങ്കെടുത്തതായി പരാതിയിൽ പറയുന്നു.

മർദനത്തിനിടെ ബോധരഹിതനായ രഞ്ജീത്‌ജി പരുക്കുകളെത്തുടർന്ന് മരിച്ചതായാണ് പരാതി. മരണശേഷം മൃതദേഹം കട്ടിലിൽ കിടത്തിയെന്നും യുവതിയെ ചിലർ സ്ഥലത്തുനിന്ന് കൊണ്ടുപോയെന്നും പരാതിയിലുണ്ട്.

വിവരമറിഞ്ഞ് സ്ഥലത്തെത്തിയ പൊലീസ് മൃതദേഹം കസ്റ്റഡിയിലെടുത്ത് പോസ്റ്റ്‌മോർട്ടം ഉൾപ്പെടെയുള്ള നടപടികൾ ആരംഭിച്ചു. പിതാവിന്റെ പരാതിയിൽ ഹൻസാബെൻ ഠാക്കോർ, ഹിതേഷ്‌ജി ഠാക്കോർ, ഭേമാജി ഠാക്കോർ, രാമാജി കേശാജി ഠാക്കോർ എന്നിവർക്കെതിരെ ഖേരാലു പൊലീസ് കേസെടുത്തു. സംഭവത്തിൽ അന്വേഷണം തുടരുകയാണ്.

ALSO READ:സ്‌കൂള്‍ വിദ്യാര്‍ത്ഥിനിക്ക് നേരെ ബസില്‍ ലൈംഗികാതിക്രമം; കണ്ടക്ടര്‍ ‘പോക്‌സോ’ കേസില്‍ അറസ്റ്റില്‍; മുന്‍പും പിടിവീണയാള്‍!

News Tag Live യുട്യൂബ് ചാനല്‍ Subscribe ചെയ്യുക