‘ഞാന്‍ ഭഗവാന്‍ ശിവന്‍’; പാമ്പിനെ വെല്ലുവിളിച്ച് സാഹസം കാണിച്ച യുവാവ് അതേ പാമ്പിന്‍റെ കടിയേറ്റു മരിച്ചു

ദിയോറിയ: പാമ്പിനൊപ്പം കളിച്ച് അതിനെ വെല്ലുവിളിച്ച് വീഡിയോ ചിത്രീകരിക്കുന്നതിനിടെ യുവാവ് അതേ പാമ്പിന്‍റെ കടിയേറ്റു മരിച്ചു. 22കാരനായ രോഹിത് ജയ്‍സ്വാളാണ് മരിച്ചത്. ഉത്തര്‍പ്രദേശിലെ ദിയോറിയ ജില്ലയിലാണ് സംഭവം.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

അഹിരൗലി ഗ്രാമത്തിൽ നിന്നുള്ള രോഹിത് മദ്യലഹരിയിലായിരുന്നുവെന്നാണ് റിപ്പോര്‍ട്ട്. താന്‍ ഭഗവാന്‍ ശിവനാണെന്ന് പറഞ്ഞ് തന്നെ കടിക്കാന്‍ രോഹിത് പാമ്പിനെ വെല്ലുവിളിക്കുകയായിരുന്നു. പാമ്പിനെ എടുത്ത് കൈയിലും കഴുത്തിലും ചുറ്റുകയും ചെയ്തു. കടിക്കാനായി ഇയാള്‍ സ്വന്തം നാവു പോലും പാമ്പിനു നേരെ നീട്ടിക്കൊടുത്തു. സിഗരറ്റ് വലിക്കുന്നതിനിടെ പാമ്പിനെ കൈകൊണ്ട് അടിക്കുന്നതും വീഡിയോയിൽ കാണാം. ശംഖുവരയന്‍ വിഭാഗത്തില്‍പെടുന്ന പാമ്പ് കടിച്ചതാണ് രോഹിതിന്‍റെ മരണത്തിലേക്ക് നയിച്ചത്.

പാമ്പുകടിയേറ്റാണ് മരണം സംഭവിച്ചതെന്ന വിവരം ലഭിച്ചതിനെ തുടർന്ന് മൃതദേഹം പോസ്റ്റ്‌മോർട്ടത്തിന് അയച്ചതായി ഖുഖുണ്ടു പൊലീസ് സ്റ്റേഷന്‍റെ ചുമതലയുള്ള സന്തോഷ് കുമാർ സിങ് പറഞ്ഞു. ആറ് മക്കളില്‍ ഇളയവനായ ജയ്സ്വാൾ അവിവാഹിതനാണ്. മാതാപിതാക്കൾ സിലിഗുരിയിലാണ് താമസം. മറ്റ് സഹോദരന്മാർ ഗ്രാമത്തിന് പുറത്ത് ജോലി ചെയ്യുകയാണ്.