‘പാലക്കാടൻ നൈറ്റ്’ ഇന്ന് ജിദ്ദ ഇന്ത്യൻ കോൺസുലേറ്റിൽ

ജിദ്ദ: ജിദ്ദയിലെ പാലക്കാട്‌ ജില്ലാ കൂട്ടായ്മയുടെ ഒന്നാം വാർഷിക ആഘോഷത്തിന്റെ ഭാഗമായി സംഘടിപ്പിക്കുന്ന ‘പാലക്കാടൻ നൈറ്റ്’ ഇന്ന് വെള്ളിയാഴ്ച കേരളപ്പിറവി ദിനത്തിൽ ജിദ്ദ ഇന്ത്യൻ കോൺസുലേറ്റ് അങ്കണത്തിൽ വൈകീട്ട് ആറ് മുതൽ അരങ്ങേറും. കൂട്ടായ്മയുടെ ലോഗോ പ്രകാശനവും ചടങ്ങിൽ നടക്കുമെന്ന് ഭാരവാഹികൾ അറിയിച്ചു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

പുതുതലമുറയിലെ ഏറ്റവും ശ്രദ്ധേയരും സിനിമാ പിന്നണി ഗായകരുമായ ഹനാൻ ഷാ, ശിഖ പ്രഭാകരൻ, ഇഹ്സാൻ (ഈച്ചൂ) തുടങ്ങിയ കലാകാരൻമാർ പങ്കെടുക്കുന്ന വാർഷികാഘോഷ പരിപാടിയിൽ റിയാദ് ടാക്കീസ് അവതരിപ്പിക്കുന്ന ശിങ്കാരി മേളവും ഉണ്ടായിരിക്കും. ജിദ്ദയിലെ അക്കാദമികളായ ഗുഡ് ഹോപ്‌, ഫിനോം ടീമുകളുടെ നൃത്തങ്ങൾ, പാലക്കാടൻ കലാരൂപങ്ങളായ കന്യാർക്കളി, കൊയ്ത്തു പാട്ട്, പുള്ളുവൻ പാട്ട്, കുംഭക്കളി, പൂതനും തറയും, മയിലാട്ടം തുടങ്ങിയ കലാ ഇനങ്ങളും പരിപാടിയിൽ അവതരിപ്പിക്കും.

ആയിരത്തോളം കലാസ്വാദകർ എത്തുമെന്ന് പ്രതീക്ഷിക്കുന്ന പരിപാടിയിലേക്ക് പ്രവേശനം സൗജന്യമാണ്. നേരത്തെ എത്തുന്നവർക്കായിരിക്കും മുൻഗണന എന്നും കോൺസുലേറ്റ് അങ്കണത്തിൽ ഉൾകൊള്ളാൻ കഴിയുന്നതിനപ്പുറം ആളുകളെത്തിയാൽ അകത്തേക്ക് പ്രവേശനം സാധ്യമായിരിക്കില്ലെന്നും ഭാരവാഹികൾ അറിയിച്ചു.
2023 സപ്തംബർ ഒന്നിനാണ് ജിദ്ദയിലെ പാലക്കാട് ജില്ലക്കാരുടെ കൂട്ടായ്‌മ രൂപം കൊണ്ടത്.

ജില്ലയിലുള്ള ബുദ്ധിമുട്ടനുഭവിക്കുന്ന പ്രവാസികളെ സഹായിക്കുന്നതിനും, അവരുടെ ഉന്നമനത്തിനും പ്രാധാന്യം നൽകികൊണ്ടാണ് കൂട്ടായ്‌മ പ്രവർത്തിക്കുന്നത്. തൊഴിൽ രഹിതർക്ക് ജോലി കണ്ടെത്താൻ സഹായിക്കുക, ചികിത്സയിലുള്ളവർക്ക് ആവശ്യമെങ്കിൽ മരുന്ന് എത്തിച്ചു കൊടുക്കുക, താമസ സൗകര്യമില്ലാത്തവർക്ക് വേണ്ട സൗകര്യങ്ങൾ ചെയ്ത് കൊടുക്കുക, ഭക്ഷണത്തിന് ബുദ്ധിമുട്ടുന്നവർക്ക് ഭക്ഷണം എത്തിച്ചു കൊടുക്കുക, നാട്ടിലേക്ക് പോകാൻ ബുദ്ധിമുട്ടുന്നവർക്ക് വേണ്ട സഹായങ്ങൾ ലഭ്യമാക്കുക പോലുള്ള പ്രവർത്തനങ്ങളാണ് കൂട്ടായ്മക്ക് കീഴിൽ നടന്നുവരുന്നത്

എട്ടംഗ ഉപദേശക സമിതിയും 37 അംഗങ്ങളുൾപ്പെടുന്ന കമ്മറ്റിക്കും പുറമെ കൂട്ടായ്മക്ക് കീഴിൽ വിവിധ സബ് കമ്മറ്റികളും വിപുലമായ വനിതാ വിങും നിലവിലുണ്ട്. കൂട്ടായ്മയിൽ അംഗമാവാൻ ആഗ്രഹിക്കുന്ന ജിദ്ദയിലെ പാലക്കാട് ജില്ലക്കാർക്ക് 0507592949 (അബ്ദുൽ അസീസ് പട്ടാമ്പി), 0502508324 (ജിദേശ് കുന്നത്ത്), 0508659343 (മുജീബ് തൃത്താല) എന്നീ നമ്പറുകളിൽ ബന്ധപ്പെടാവുന്നതാണെന്ന് ഭാരവാഹികൾ പറഞ്ഞു.

പ്രസിഡന്റ് അബ്ദുൽ അസീസ് പട്ടാമ്പി, ജനറൽ സെക്രട്ടറി ജിദേശ് കുന്നത്ത്, വൈസ് പ്രസിഡന്റ് മുജീബ് തൃത്താല, ജോയിന്റ് സെക്രട്ടറി എൻജിനീയർ റഷീദ് കൂറ്റനാട്, ഇവന്റ് കൺവീനർ നവാസ് മേപ്പറമ്പ്, മീഡിയ കൺവീനർ മുജീബ് മൂത്തേടത്ത്, ഫൈനാൻസ് കൺട്രോളർ നാസർ വിളയൂർ, വെൽഫെയർ കൺവീനർ ഷൗക്കത്ത് പനമണ്ണ എന്നിവർ വാർത്താസമ്മേളനത്തിൽ പങ്കെടുത്തു.