ആ ചുവപ്പ് കാര്‍ഡ് തെറ്റ്; അര്‍ജന്റീന-സിറ്റ്‌സര്‍ലന്റ് മല്‍സരത്തില്‍ എംബോളോയ്ക്ക് റെഡ് കാര്‍ഡ് നല്‍കിയ തീരുമാനം റഫറിയുടെ പിഴവെന്ന് ഫുട്‌ബോള്‍ നിയമനിര്‍മാണ സമിതി

അര്‍ജന്റീനയ്‌ക്കെതിരായ വേള്‍ഡ് കപ്പ് ക്വാര്‍ട്ടര്‍ ഫൈനല്‍ മല്‍സരത്തില്‍ സ്വിറ്റ്‌സര്‍ലന്‍ഡ് ഫോര്‍വേഡ് ബ്രീല്‍ എംബോളോയ്ക്ക് റെഡ് കാര്‍ഡ് നല്‍കാന്‍ വാര്‍ (VAR) പ്രോട്ടോക്കോള്‍ ഉപയോഗിച്ചത് തെറ്റായ രീതിയിലെന്ന് ഫുട്‌ബോള്‍ നിയമനിര്‍മ്മാണ സമിതിയായ ഐ.എഫ്.എ.ബി (IFAB). എംബോളോയെ പുറത്താക്കിയത് ശരിയായ തീരുമാനമായിരുന്നില്ലെന്ന് സമിതി വ്യക്തമാക്കി.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

സ്വിറ്റ്‌സര്‍ലന്‍ഡ് 1-1ന് സമനില പിടിച്ചതിന് പിന്നാലെ 72-ാം മിനിറ്റിലാണ് ഡൈവിംഗ് ആരോപിച്ച് എംബോളോയ്ക്ക് രണ്ടാമത്തെ യെല്ലോ കാര്‍ഡും തുടര്‍ന്ന് റെഡ് കാര്‍ഡും ലഭിച്ചത്.
അര്‍ജന്റീന താരം ലിയാന്‍ഡ്രോ പരഡെസുമായുള്ള സമ്പര്‍ക്കത്തിനിടെ എംബോളോ മൈതാനത്ത് വീണ സംഭവത്തില്‍ റഫറി ജോവോ പിന്‍ഹെയ്‌റോ ആദ്യം പരഡെസിനാണ് മഞ്ഞക്കാര്‍ഡ് നല്‍കിയത്. എന്നാല്‍ വാര്‍ (VAR) പരിശോധനയ്ക്ക് ശേഷം ഈ തീരുമാനം മാറ്റുകയും, എംബോളോ ഫൗള്‍ അഭിനയിക്കുകയാണെന്ന് (simulation) കാണിച്ച് താരത്തിന് രണ്ടാം മഞ്ഞക്കാര്‍ഡും തുടര്‍ന്ന് ചുവപ്പ് കാര്‍ഡും നല്‍കി പുറത്താക്കുകയായിരുന്നു.

ഈ തീരുമാനം മത്സരത്തിന്റെ ഗതി തിരിച്ചുവിടുകയും എക്‌സ്ട്രാ ടൈമില്‍ അര്‍ജന്റീന 3-1ന് വിജയിക്കുകയും ചെയ്തു. ലയണല്‍ മെസ്സിയുടെ ടീമിന് അനുകൂലമായി റഫറിമാര്‍ തീരുമാനങ്ങള്‍ എടുക്കുന്നുവെന്ന വിമര്‍ശനങ്ങള്‍ക്കിടയിലാണ് ഈ സംഭവം ഉണ്ടായത്.

‘ആളെ മാറി കാര്‍ഡ് കാണിക്കുക’ (Mistaken Identity) എന്ന നിയമത്തിന്റെ പരിധിയില്‍ ഉള്‍പ്പെടുത്തിയാണ് വാര്‍ റഫറിമാര്‍ ഈ ഇടപെടല്‍ നടത്തിയത്. എന്നാല്‍ നിലവിലെ നിബന്ധനകള്‍ അനുസരിച്ച് തെറ്റ് ചെയ്ത കളിക്കാരന് പകരം മറ്റൊരാള്‍ക്ക് കാര്‍ഡ് നല്‍കുമ്പോള്‍ അത് തിരുത്താന്‍ മാത്രമാണ് ഈ നിയമം ഉപയോഗിക്കേണ്ടതെന്നും, ഫൗള്‍ നടന്നിട്ടുണ്ടോ ഇല്ലയോ എന്ന് പരിശോധിച്ച് കാര്‍ഡ് മാറ്റാന്‍ ഇത് ഉപയോഗിക്കാന്‍ കഴിയില്ലെന്നും ഐ.എഫ്.എ.ബി പ്രസ്താവനയില്‍ വ്യക്തമാക്കി.

അതേസമയം, ഭാവിയില്‍ ഇത്തരത്തിലുള്ള സംഭവങ്ങളില്‍ മാറ്റം വരുത്തുന്നത് സംബന്ധിച്ച ചര്‍ച്ചകള്‍ നടക്കുകയാണെന്നും നിയമസമിതി അറിയിച്ചു. മത്സരശേഷം സ്വിറ്റ്‌സര്‍ലന്‍ഡ് പരിശീലകന്‍ മുറാത് യാക്കിന്‍ റഫറിയുടെ തീരുമാനത്തിനെതിരെ കടുത്ത അമര്‍ഷം രേഖപ്പെടുത്തിയിരുന്നു. ‘ഫുട്‌ബോള്‍ അല്ല ഇന്ന് വിജയിച്ചത്, ഞങ്ങള്‍ക്ക് തിരിച്ചടിയായത് ഞങ്ങളുടെ ഭാഗത്തുനിന്നുള്ള പിഴവുകൊണ്ടല്ല,’ എന്നായിരുന്നു യാക്കിന്റെ പ്രതികരണം.

യു.ഇ.എഫ്.എ (UEFA) ഐ.എഫ്.എ.ബിയുടെ ഈ വിശദീകരണത്തെ സ്വാഗതം ചെയ്തു. വാര്‍ സംവിധാനം കളിയുടെ സ്വാഭാവികത തടസ്സപ്പെടുത്തുന്ന രീതിയില്‍ അനാവശ്യമായി ഇടപെടരുതെന്നും, തികച്ചും വ്യക്തമായ തെറ്റുകള്‍ ഉണ്ടാകുമ്പോള്‍ മാത്രം ഇടപെട്ടാല്‍ മതിയെന്നും യു.ഇ.എഫ്.എ റഫറിമാര്‍ക്ക് നിര്‍ദ്ദേശം നല്‍കിയിട്ടുണ്ട്.

Rules panel says sending Swiss player off in World Cup quarterfinals against Argentina was wrong

News Tag Live യുട്യൂബ് ചാനല്‍ Subscribe ചെയ്യുക