ഇറാനിലെ സര്‍ക്കാര്‍ സ്ഥാപനങ്ങള്‍ പിടിച്ചെടുക്കാന്‍ പ്രതിഷേധക്കാരോട് ആഹ്വാനം ചെയ്ത് ട്രംപ്; എല്ലാ ചര്‍ച്ചകളും റദ്ദാക്കി

ഇറാന്‍ ഉദ്യോഗസ്ഥരുമായുള്ള എല്ലാ കൂടിക്കാഴ്ചകളും റദ്ദാക്കിയതായി അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. രാജ്യത്തെ സര്‍ക്കാര്‍ സ്ഥാപനങ്ങള്‍ പിടിച്ചെടുക്കാന്‍ ട്രംപ് പ്രതിഷേധക്കാരോട് ആഹ്വാനം ചെയ്തു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ചൊവ്വാഴ്ച പുറത്തിറക്കിയ സോഷ്യല്‍ മീഡിയ പോസ്റ്റില്‍, കൂടുതല്‍ വിവരങ്ങള്‍ വെളിപ്പെടുത്താതെ ‘സഹായം ഉടന്‍ എത്തും’ എന്ന് ട്രംപ് പറഞ്ഞു. കഴിഞ്ഞ കുറച്ച് ദിവസങ്ങളായി ഇറാനെതിരെ സൈനിക നടപടി സ്വീകരിക്കുന്നതിനെക്കുറിച്ച് അദ്ദേഹം പരസ്യമായി സൂചിപ്പിച്ചിരുന്നു.

ട്രൂത്ത് സോഷ്യല്‍ (Truth Social) എന്ന പ്ലാറ്റ്ഫോമില്‍ ട്രംപ് പോസ്റ്റ് ചെയ്തത് ഇങ്ങിനെയാണ്

‘ഇറാനിലെ ദേശസ്‌നേഹികളെ, പ്രതിഷേധം തുടരുക – നിങ്ങളുടെ സ്ഥാപനങ്ങള്‍ പിടിച്ചെടുക്കുക! കൊലയാളികളുടെയും മര്‍ദകരുടെയും പേരുകള്‍ കുറിച്ചുവെക്കുക. അവര്‍ വലിയ വില നല്‍കേണ്ടി വരും. പ്രതിഷേധക്കാരെ അന്യായമായി കൊലപ്പെടുത്തുന്നത് നിര്‍ത്തുന്നത് വരെ ഇറാന്‍ ഉദ്യോഗസ്ഥരുമായുള്ള എല്ലാ കൂടിക്കാഴ്ചകളും ഞാന്‍ റദ്ദാക്കിയിരിക്കുന്നു. സഹായം ഉടന്‍ എത്തും.’ MIGA-! [MAGA]’

ALSO READ: പൈവളിഗെയില്‍ മുസ് ലിം ലീഗ് പിന്തുണയില്‍ ബിജെപിക്ക് സ്റ്റാന്‍ഡിങ് കമ്മിറ്റി ചെയര്‍പെഴ്‌സണ്‍ പദവി

ഇറാന്‍ സര്‍ക്കാര്‍ പ്രതിഷേധക്കാരെ വധിക്കുകയാണെങ്കില്‍ യുഎസ് ‘വളരെ ശക്തമായ നടപടികള്‍’ സ്വീകരിക്കുമെന്ന് സിബിഎസ് ന്യൂസിന് നല്‍കിയ അഭിമുഖത്തില്‍ അദ്ദേഹം ആവര്‍ത്തിച്ചു.

സാമ്പത്തിക സമ്മര്‍ദ്ദവും സുരക്ഷാ മുന്നറിയിപ്പും

ഇറാനുമായി വ്യാപാരത്തിലേര്‍പ്പെടുന്ന ഏത് രാജ്യത്തിനും 25 ശതമാനം താരിഫ് ചുമത്തുമെന്ന് ട്രംപ് തിങ്കളാഴ്ച പ്രഖ്യാപിച്ചു.
സംഘര്‍ഷം വര്‍ദ്ധിക്കുന്ന പശ്ചാത്തലത്തില്‍ അമേരിക്കന്‍ പൗരന്മാര്‍ ഉടന്‍ ഇറാന്‍ വിടണമെന്ന് സ്റ്റേറ്റ് ഡിപ്പാര്‍ട്ട്മെന്റ് നിര്‍ദ്ദേശം നല്‍കി.

അന്താരാഷ്ട്ര ആശങ്കകള്‍

അമേരിക്ക സൈനിക ആക്രമണം നടത്തിയാല്‍ അത് അന്താരാഷ്ട്ര നിയമങ്ങളുടെ ലംഘനമാകുമെന്നും ഇറാനില്‍ വലിയ അരാജകത്വത്തിന് കാരണമാകുമെന്നും വിദഗ്ധര്‍ മുന്നറിയിപ്പ് നല്‍കുന്നു. ഇറാന്റെ പരമാധികാരത്തെ ബാധിക്കുന്ന ഇത്തരം നീക്കങ്ങള്‍ രാജ്യത്തെ ആഭ്യന്തര യുദ്ധത്തിലേക്കോ അസ്ഥിരതയിലേക്കോ നയിച്ചേക്കാമെന്ന് ഇന്റര്‍നാഷണല്‍ ക്രൈസിസ് ഗ്രൂപ്പിലെ അലി വായെസ് ചൂണ്ടിക്കാട്ടി.

മരണസംഖ്യ ഉയരുന്നു

പ്രതിഷേധങ്ങളില്‍ ഇതിനകം നൂറുകണക്കിന് ആളുകള്‍ കൊല്ലപ്പെട്ടതായി മനുഷ്യാവകാശ സംഘടനകള്‍ അവകാശപ്പെടുന്നു. എന്നാല്‍ നൂറിലധികം സുരക്ഷാ ഉദ്യോഗസ്ഥര്‍ കൊല്ലപ്പെട്ടതായാണ് ഇറാന്‍ സര്‍ക്കാര്‍ മാധ്യമങ്ങളുടെ റിപ്പോര്‍ട്ട്. രാജ്യത്ത് ഇന്റര്‍നെറ്റ് വിച്ഛേദിക്കപ്പെട്ടതിനാല്‍ കൃത്യമായ വിവരങ്ങള്‍ ലഭ്യമാകുന്നതില്‍ തടസ്സമുണ്ട്. അതേസമയം, ഇറാനിലെ അശാന്തിക്ക് പിന്നില്‍ അമേരിക്കയും ഇസ്രായേലുമാണെന്ന് തെഹ്റാന്‍ ആരോപിച്ചു.

ഫ്രാന്‍സ്, ഖത്തര്‍ തുടങ്ങിയ രാജ്യങ്ങള്‍ മേഖലയിലെ സംഘര്‍ഷം ലഘൂകരിക്കാനുള്ള ശ്രമങ്ങള്‍ തുടരുകയാണ്.