യുപിയില്‍ പീഡനശ്രമം എതിര്‍ത്ത ദലിത് യുവതിയെ ശര്‍ക്കര നിര്‍മിക്കുന്ന ചൂടുപാത്രത്തിലേക്ക് തള്ളിയിട്ടു

ലഖ്നൗ: ഉത്തര്‍പ്രദേശില്‍ പീഡനം എതിര്‍ക്കാന്‍ ശ്രമിച്ച ദലിത് യുവതിയെ ശര്‍ക്കര നിര്‍മാണ യൂണിറ്റിലെ ചൂടുപാത്രത്തിലേക്ക് തള്ളിയിട്ടു. ബുദൗണ്‍ ജില്ലയിലാണ് സംഭവം. ഗുരുതരമായി പൊള്ളലേറ്റ 18കാരിയെ ഡല്‍ഹിയിലെ ജിടിബി ആശുപത്രിയില്‍ പ്രവേശിപ്പിച്ചു. സംഭവത്തില്‍ മൂന്ന് പേരെ അറസ്റ്റ് ചെയ്തതായി പൊലീസ് പറഞ്ഞു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

മുസഫര്‍നഗര്‍ സ്വദേശിനിയായ യുവതി പ്രമോദ് എന്നയാളുടെ കമ്പനിയില്‍ ജോലി ചെയ്തുവരികയായിരുന്നു. കഴിഞ്ഞ ബുധനാഴ്ച യുവതിയെ ജോലി സ്ഥലത്തെ ഉടമയും മറ്റ് മൂന്ന് പേരും ചേര്‍ന്ന് പീഡിപ്പിക്കാന്‍ ശ്രമിച്ചു.

ഇത് ചെറുത്തപ്പോഴാണ് യുവതിയെ ശര്‍ക്കര നിര്‍മാണ യൂണിറ്റിലെ തിളച്ച ചൂടുപാത്രത്തിലേക്ക് തള്ളിയിട്ടത്. ശേഷം പ്രതികള്‍ ഓടിരക്ഷപെട്ടു. യുവതിക്ക് നേരെ പ്രതികൾ ജാതിയധിക്ഷേപവും നടത്തിയതായി സഹോദരന്‍ പൊലീസിന് മൊഴി നല്‍കി.