ഫ്രാന്‍സ്-സ്‌പെയിന്‍ പോരാട്ടത്തേക്കാള്‍ ഇരട്ടി വില; അര്‍ജന്റീന-ഇംഗ്ലണ്ട് സെമി ടിക്കറ്റ് നിരക്കില്‍ വന്‍ കുതിപ്പ്

ഡല്ലാസ്/അറ്റ്‌ലാന്റ: ലോകകപ്പ് സെമിഫൈനലുകളില്‍ ആഗോള ഫുട്‌ബോള്‍ വമ്പന്മാര്‍ നേര്‍ക്കുനേര്‍ വരുമ്പോള്‍ ടിക്കറ്റ് നിരക്കില്‍ വന്‍ വ്യത്യാസം. ചൊവ്വാഴ്ച ഡല്ലാസില്‍ നടക്കുന്ന ഫ്രാന്‍സ്-സ്‌പെയിന്‍ സെമിഫൈനല്‍ പോരാട്ടത്തിന്റെ ടിക്കറ്റ് വിലയേക്കാള്‍ ഇരട്ടിയിലധികമാണ് ബുധനാഴ്ച അറ്റ്‌ലാന്റയില്‍ നടക്കുന്ന അര്‍ജന്റീന-ഇംഗ്ലണ്ട് മത്സരത്തിന്റെ ടിക്കറ്റ് നിരക്ക്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ഫിഫ റാങ്കിംഗില്‍ ഒന്നാം സ്ഥാനത്തുള്ള ഫ്രാന്‍സും മൂന്നാം സ്ഥാനത്തുള്ള സ്‌പെയിനും തമ്മിലുള്ള മത്സരത്തിന്റെ ടിക്കറ്റ് നിരക്ക് തിങ്കളാഴ്ചത്തെ കണക്കനുസരിച്ച് 1,325 ഡോളറാണ് (ഏകദേശം 1.1 ലക്ഷം രൂപ). കഴിഞ്ഞ മൂന്ന് ദിവസത്തിനിടെ ഈ മത്സരത്തിന്റെ ടിക്കറ്റ് നിരക്കില്‍ 26 ശതമാനത്തിന്റെ ഇടിവുണ്ടായിട്ടുണ്ട്.

അതേസമയം, നിലവിലെ ചാമ്പ്യന്മാരായ അര്‍ജന്റീനയും ഇംഗ്ലണ്ടും തമ്മിലുള്ള വന്‍ പോരാട്ടത്തിന് കടുത്ത ടിക്കറ്റ് വേട്ടയാണ് നടക്കുന്നത്. ഈ മത്സരത്തിന്റെ ടിക്കറ്റ് നിരക്ക് 2,841 ഡോളറിലേക്ക് (ഏകദേശം 2.37 ലക്ഷം രൂപ) ഉയര്‍ന്നു. കഴിഞ്ഞ മൂന്ന് ദിവസത്തിനിടെ 34 ശതമാനത്തിന്റെ വര്‍ദ്ധനവാണ് ഇതിലുണ്ടായത്.

ശനിയാഴ്ച ടിക്കറ്റ് നിരക്ക് 2,966 ഡോളര്‍ വരെ ഉയര്‍ന്നിരുന്നു. അര്‍ജന്റീനയുടെ മുന്‍ പരിശീലകന്‍ ജെറാര്‍ഡോ ‘ടാറ്റ’ മാര്‍ട്ടിനോ നിലവില്‍ കോച്ചായുള്ള മേജര്‍ ലീഗ് സോക്കര്‍ (MLS) ഫ്രാഞ്ചൈസിയായ അറ്റ്‌ലാന്റ യുണൈറ്റഡിന് വലിയൊരു അര്‍ജന്റീനിയന്‍ ആരാധകവൃന്ദം ഇവിടെയുണ്ട് എന്നതും ഈ കുതിപ്പിന് കാരണമായി ചൂണ്ടിക്കാണിക്കപ്പെടുന്നു.

ALSO READ: 12 വര്‍ഷത്തെ കാത്തിരിപ്പിനുശേഷമുണ്ടായ മകളുടെ ജന്മദിനം കൊണ്ടൊരു ഭാഗ്യപരീക്ഷണം നടത്തിയ മലയാളിക്ക് 78 കോടി രൂപ സമ്മാനം

മൂന്നാം സ്ഥാനക്കാര്‍ക്കായുള്ള മത്സരത്തിന്റെ ടിക്കറ്റ് നിരക്ക് 1,543 ഡോളറാണ്. ന്യൂയോര്‍ക്ക് ന്യൂജേഴ്സി സ്റ്റേഡിയത്തില്‍ ഞായറാഴ്ച നടക്കുന്ന ഫൈനല്‍ മത്സരത്തിന്റെ ടിക്കറ്റ് നിരക്ക് നിലവില്‍ 6,760 ഡോളറാണ് (ഏകദേശം 5.6 ലക്ഷം രൂപ). കഴിഞ്ഞ ഒക്ടോബറില്‍ ഫൈനല്‍ ടിക്കറ്റ് നിരക്ക് 13,650 ഡോളര്‍ വരെ ഉയര്‍ന്നിരുന്നെങ്കിലും പിന്നീട് കുറയുകയായിരുന്നു.

എന്തുകൊണ്ട് ടിക്കറ്റ് നിരക്കുകള്‍ ഇത്രയും ഉയരുന്നു?

ലോകകപ്പ് ടിക്കറ്റുകളുടെ അമിത വിലയ്ക്കെതിരെ ഫിഫ കടുത്ത വിമര്‍ശനങ്ങളാണ് നേരിടുന്നത്. ഒരു ആരാധക കൂട്ടായ്മ ടിക്കറ്റ് വിലയ്ക്കെതിരെ കോടതിയെ വരെ സമീപിച്ചിട്ടുണ്ട്. എന്നാല്‍, ടിക്കറ്റുകള്‍ യഥാര്‍ത്ഥ വിലയേക്കാള്‍ ഉയര്‍ന്ന തുകയ്ക്ക് മറിച്ചുവില്‍ക്കാന്‍ അനുവാദം നല്‍കുന്ന അമേരിക്കന്‍ നിയമങ്ങളെ ഫിഫ അനുകൂലിക്കുകയാണ് ചെയ്തത്. അമേരിക്കയ്ക്ക് കൂടുതല്‍ സാമ്പത്തിക നേട്ടങ്ങള്‍ ഉണ്ടാക്കാനുള്ള അവസരമാണ് ഈ ലോകകപ്പിലൂടെ ലഭിക്കുന്നതെന്ന് കായിക വിദഗ്ദ്ധര്‍ വിലയിരുത്തുന്നു.

ഇതിനുപുറമെ, അമേരിക്കയില്‍ കുറച്ചുകാലമായി നിലവിലുള്ള ‘ഡൈനാമിക് ടിക്കറ്റ് പ്രൈസിംഗ് മോഡല്‍’ (Dynamic Ticket Pricing Model) ഫിഫയും ഇവിടെ നടപ്പിലാക്കിയിട്ടുണ്ട്. ഇതില്‍ ടിക്കറ്റുകള്‍ക്ക് സ്ഥിരമായ ഒരു വിലയുണ്ടാകില്ല; പകരം ആവശ്യക്കാരുടെ എണ്ണത്തിനും (Demand) വിതരണത്തിനും (Supply) അനുസരിച്ച് ടിക്കറ്റ് നിരക്കുകള്‍ തത്സമയം മാറിക്കൊണ്ടിരിക്കും.

Argentina vs England World Cup tickets more expensive than France vs Spain