മലപ്പുറം മോർഫിങ് കേസ്: ജാമ്യത്തിലിറങ്ങിയ പ്രതി ലോഡ്ജിൽ ആത്മഹത്യക്ക് ശ്രമിച്ചു

മലപ്പുറം: കോളേജ് വിദ്യാർഥിനികളുടെ ചിത്രങ്ങൾ മോർഫ് ചെയ്ത് സോഷ്യൽ മീഡിയയിലൂടെ പ്രചരിപ്പിച്ച കേസിൽ അറസ്റ്റിലായി ജാമ്യത്തിലിറങ്ങിയ പ്രതി ആത്മഹത്യക്ക് ശ്രമിച്ചു. തിരുവനന്തപുരം തിരുമല ഓടൻകുഴി സ്വദേശിയും മൊബൈൽ ടെക്നീഷ്യനുമായ സുബിൻ ബാബു (26) ആണ് മലപ്പുറത്തെ സ്വകാര്യ ലോഡ്ജിൽ വെച്ച് കൈഞരമ്പ് മുറിച്ച് ജീവനൊടുക്കാൻ ശ്രമിച്ചത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

രക്തസ്രാവത്തെ തുടർന്ന് ഇയാളെ ഉടൻ തന്നെ സമീപത്തെ ആശുപത്രിയിൽ പ്രവേശിപ്പിച്ചു. യുവാവ് നിലവിൽ അപകടനില തരണം ചെയ്തതായി ആശുപത്രി അധികൃതർ അറിയിച്ചു. ഇന്നലെയാണ് കേസിൽ കോടതി സുബിന് ജാമ്യം അനുവദിച്ചത്.

മലപ്പുറം ജില്ലയിലെ പൊന്നാനി ഉൾപ്പെടെയുള്ള പന്ത്രണ്ടോളം കോളേജുകളിലെ വിദ്യാർഥിനികളുടെ പരാതിയിലാണ് സുബിൻ ബാബുവിനെ മലപ്പുറം സൈബർ പോലീസ് അറസ്റ്റ് ചെയ്തത്. ഇൻസ്റ്റഗ്രാം അക്കൗണ്ടുകളിൽ നിന്ന് വിദ്യാർഥിനികൾ പോസ്റ്റ് ചെയ്ത ഓണാഘോഷത്തിന്റെയും മറ്റും ചിത്രങ്ങൾ ശേഖരിച്ച്, വ്യാജ അക്കൗണ്ടുകളിലൂടെ മോർഫ് ചെയ്ത് അശ്ലീല രൂപത്തിലാക്കി പ്രചരിപ്പിക്കുകയായിരുന്നു ഇയാളുടെ രീതി. ഇത്തരം ചിത്രങ്ങൾ പണം വാങ്ങി ടെലഗ്രാമിലൂടെയും മറ്റ് സോഷ്യൽ മീഡിയ പ്ലാറ്റ്‌ഫോമുകളിലൂടെയും വിൽപ്പന നടത്തിയിരുന്നതായി പ്രതി സമ്മതിച്ചിട്ടുണ്ടെന്ന് പോലീസ് പറഞ്ഞു. മെറ്റയിൽ നിന്ന് ലഭിച്ച സാങ്കേതിക വിവരങ്ങളുടെ അടിസ്ഥാനത്തിലാണ് തിരുവനന്തപുരത്തുനിന്ന് ഇയാളെ പോലീസ് സംഘം പിടികൂടിയത്.

അതേസമയം, എറണാകുളം തൃക്കാക്കര ഭാരത് മാതാ കോളജിൽ വിദ്യാർഥിനികളുടെയും അധ്യാപകരുടെയും ചിത്രങ്ങൾ മോർഫ് ചെയ്ത് പ്രചരിപ്പിച്ച കേസിൽ കെഎസ്‌യു മീഡിയ കമ്മിറ്റി അംഗവും ബിബിഎ വിദ്യാർഥിയുമായ ശ്രീഹരി അറസ്റ്റിലായതിന് പിന്നാലെയാണ് സംസ്ഥാനത്തെ വിവിധ ജില്ലകളിൽ നിന്ന് സമാനമായ സൈബർ അക്രമങ്ങൾ പുറത്തുവരുന്നത്. സംഭവത്തിൽ കൂടുതൽ പേർക്ക് പങ്കുണ്ടോ എന്നതിനെക്കുറിച്ച് പോലീസ് അന്വേഷണം വ്യാപിപ്പിച്ചിട്ടുണ്ട്.

Tags: Malappuram morphing case, Subin Babu, Cyber crime Kerala, Instagram morphing scam, Thiruvananthapuram native arrested, Malappuram police, Crime news Malayalam, Cyber police Malappuram, College student morphing case, Kerala crime updates

News Tag Live യുട്യൂബ് ചാനല്‍ Subscribe ചെയ്യുക