ബന്ധുനിയമനത്തില്‍ വീണ്ടും കൈപൊള്ളി യുഡിഎഫ് സര്‍ക്കാര്‍; വിവാദങ്ങള്‍ക്കൊടുവില്‍ ബി.ആര്‍.എം ഷഫീറിന്റെ ഭാര്യ സീമാറ്റില്‍ നിന്ന് രാജിവെച്ചു; ബയോഡാറ്റ മാത്രം വാങ്ങി 12 പേര്‍ക്ക് നിയമനം!

തിരുവനന്തപുരം: കോണ്‍ഗ്രസ് നേതാവും കെ.പി.സി.സി ജനറല്‍ സെക്രട്ടറിയുമായ ബി.ആര്‍.എം. ഷഫീറിന്റെ ഭാര്യ ആര്‍.എസ്. ഷാനി റിസര്‍ച്ച് ഓഫീസര്‍ പദവിയില്‍ നിന്ന് രാജിവെച്ചു. വിദ്യാഭ്യാസ വകുപ്പിന് കീഴിലുള്ള സ്റ്റേറ്റ് ഇന്‍സ്റ്റിറ്റ്യൂട്ട് ഓഫ് എജ്യുക്കേഷണല്‍ മാനേജ്മെന്റ് ആന്‍ഡ് ട്രെയിനിംഗില്‍ (സീമാറ്റ്) നടന്ന വഴിവിട്ട അനധികൃത നിയമന വിവാദത്തിന് പിന്നാലെയാണ് രാജി. ആവശ്യമായ യോഗ്യതയില്ലാതെയാണ് നിയമനമെന്നതിനുള്ള തെളിവുകള്‍ മാധ്യമങ്ങള്‍ പുറത്തുവിട്ടിരുന്നു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ഗവേഷണം പൂര്‍ത്തിയാക്കുന്നതിന് വേണ്ടിയാണ് രാജിയെന്നാണ് ഔദ്യോഗിക വിശദീകരണമെങ്കിലും, ക്രമക്കേടുകള്‍ പുറത്തുവന്നതോടെ ഉണ്ടായ കടുത്ത രാഷ്ട്രീയ സമ്മര്‍ദ്ദത്തിലാണ് രാജിയെന്ന് വ്യക്തമാണ്.

പിഎച്ച്.ഡി പോലുമില്ല; അക്കാദമിക് യോഗ്യതയില്‍ വന്‍ ക്രമക്കേട്

സീമാറ്റില്‍ റിസര്‍ച്ച് ഓഫീസര്‍ തസ്തികയിലേക്ക് നിയമനം ലഭിക്കാനുള്ള പ്രധാന അടിസ്ഥാന യോഗ്യത പിഎച്ച്.ഡി ആണ്. എന്നാല്‍ ആര്‍.എസ്. ഷാനി നിലവില്‍ ഒരു പിഎച്ച്.ഡി സ്‌കോളര്‍ മാത്രമാണ്. വരുന്ന ഡിസംബറില്‍ മാത്രമാണ് ഇവര്‍ പ്രബന്ധം അവതരിപ്പിക്കാന്‍ പോകുന്നത്.

അടിസ്ഥാന അക്കാദമിക് യോഗ്യത പൂര്‍ണ്ണമായും കൈവരിക്കുന്നതിന് മുന്‍പ് തന്നെ ഇവരെ ഉയര്‍ന്ന പദവിയിലേക്ക് തിരുകിക്കയറ്റിയത് വിദ്യാഭ്യാസ സ്ഥാപനത്തിന്റെ സുതാര്യതയെ ചോദ്യം ചെയ്യുന്നതാണെന്ന് ഉദ്യോഗാര്‍ത്ഥികള്‍ ആരോപിച്ചിരുന്നു. എന്നാല്‍ ഇവര്‍ക്ക് വേണ്ടത്ര യോഗ്യതയുണ്ടെന്ന വാദത്തിലായിരുന്നു സീമാറ്റ് ഡയറക്ടര്‍ ആര്‍. അരുണ്‍കുമാര്‍.

നോട്ടിഫിക്കേഷനില്ല, അഭിമുഖമില്ല; ബയോഡാറ്റ ചോദിച്ചു വാങ്ങി നിയമനം!

പൊതുവിജ്ഞാപനം ഇറക്കുകയോ ഉദ്യോഗാര്‍ത്ഥികളില്‍ നിന്ന് അപേക്ഷ ക്ഷണിക്കുകയോ ചെയ്യാതെയാണ് ആര്‍.എസ്. ഷാനിയുടെ നിയമനം നടന്നത്. അപേക്ഷിക്കാത്ത തസ്തികയിലേക്ക് ബയോഡാറ്റ നേരിട്ട് വാങ്ങി നിയമനം നല്‍കുകയായിരുന്നു. ഇത്തരത്തില്‍ യു.ഡി.എഫ് ഭരണകാലയളവിന് ശേഷം വിജ്ഞാപനം പുറപ്പെടുവിക്കാതെ 12 പേരെയാണ് സീമാറ്റില്‍ താല്‍ക്കാലിക വ്യവസ്ഥയില്‍ നിയമിച്ചിട്ടുള്ളതെന്ന രേഖകളും പുറത്തുവന്നിട്ടുണ്ട്.

ഇതില്‍ റിസര്‍ച്ച് ഓഫീസര്‍ തസ്തികയില്‍ 5 പേര്‍ക്കും, അസിസ്റ്റന്റ് പദവിയില്‍ 4 പേര്‍ക്കും, അറ്റന്‍ഡര്‍ തസ്തികയില്‍ 3 പേര്‍ക്കുമാണ് നിയമനം ലഭിച്ചത്.

നിയമനം ലഭിച്ചവരെല്ലാം രാഷ്ട്രീയ ബന്ധമുള്ളവര്‍

സീമാറ്റില്‍ വഴിവിട്ട് നിയമനം നേടിയവരെല്ലാം കോണ്‍ഗ്രസ് – ലീഗ് രാഷ്ട്രീയ ബന്ധമുള്ളവരാണെന്നതാണ് മറ്റൊരു നിര്‍ണ്ണായക വസ്തുത. ഒഴിവ് വന്ന സമയത്ത് ലഭിച്ച ബയോഡാറ്റകള്‍ പരിശോധിച്ച് യോഗ്യതയുള്ളവരെ നിയമിക്കുകയായിരുന്നു എന്നാണ് സീമാറ്റ് ഡയറക്ടര്‍ ഇതിന് നല്‍കിയ വിശദീകരണം.

ലക്ഷക്കണക്കിന് ഉദ്യോഗാര്‍ത്ഥികള്‍ പി.എസ്.സി റാങ്ക് ലിസ്റ്റുകളിലും എംപ്ലോയ്മെന്റ് എക്സ്ചേഞ്ചുകളിലും ജോലി പ്രതീക്ഷിച്ചിരിക്കുമ്പോള്‍, മുന്‍നിര രാഷ്ട്രീയ നേതാക്കളുടെ ബന്ധുക്കള്‍ക്ക് പിന്‍വാതില്‍ നിയമനം നല്‍കിയതിനെതിരെ വന്‍ പ്രതിഷേധമാണ് ഉദ്യോഗാര്‍ത്ഥികളുടെയും പൊതുജനങ്ങളുടെയും ഭാഗത്തുനിന്നും ഉയരുന്നത്.

Tags: BRM Shafeer Wife Resigns, SIEMAT Recruitment Scam, RS Shani Resignation, Kerala Education Department, Kerala Politics News, Kerala News Malayalam, Latest News Kerala

News Tag Live യുട്യൂബ് ചാനല്‍ Subscribe ചെയ്യുക