20
Oct 2026
Tue
തിരുവനന്തപുരം: പുനഃസംഘടിപ്പിച്ച സംസ്ഥാന വഖഫ് ബോര്‍ഡില്‍ പ്രാതിനിധ്യം ലഭിച്ചില്ലെന്ന സമസ്ത കാന്തപുരം എ.പി. അബൂബക്കര്‍ മുസ്ലിയാര്‍ വിഭാഗത്തിന്റെ രൂക്ഷമായ പ്രതിഷേധത്തിന് ഒടുവില്‍ സമവായം. വഖഫ് ബോര്‍ഡില്‍ കാന്തപുരം വിഭാഗത്തിന് തര്‍ക്കമില്ലാത്ത പ്രാതിനിധ്യം ഉറപ്പാക്കാനും അതനുസരിച്ച് മറ്റു ബോര്‍ഡുകളിലെ സ്ഥാനമാനങ്ങളില്‍ മാറ്റങ്ങള്‍ വരുത്താനും ധാരണയായി. കെ.പി. നൗഷാദലി എം.എല്‍.എ, മുസ്ലിം ലീഗ് സംസ്ഥാന നേതൃത്വവും പ്രമുഖ സുന്നി നേതാക്കളുമായി നടത്തിയ നിര്‍ണായക ചര്‍ച്ചകളെ തുടര്‍ന്നാണ് ഈ പ്രശ്‌നപരിഹാരം സാധ്യമായത്.
 |
|
പദവികളില്‍ കൈമാറ്റം; സമവായം ഇങ്ങനെ
പുതിയ ധാരണ പ്രകാരം:വഖഫ് ബോര്‍ഡ്: പുതിയ ബോര്‍ഡില്‍ അംഗമായി തെരഞ്ഞെടുക്കപ്പെട്ട ദക്ഷിണ കേരള ജംഇയ്യത്തുല്‍ ഉലമ പ്രതിനിധി തൊടിയൂര്‍ മുഹമ്മദ് കുഞ്ഞ് മൗലവി വഖഫ് ബോര്‍ഡില്‍ നിന്ന് രാജിവെക്കും. ഈ ഒഴിവിലേക്ക് കാന്തപുരം വിഭാഗത്തിലെ പ്രതിനിധിയെ നിയമിക്കും.
ഹജ്ജ് കമ്മിറ്റി: കാന്തപുരം വിഭാഗക്കാരനായ നിലവിലെ ഹജ്ജ് കമ്മിറ്റി ചെയര്‍മാന്‍ ഹുസൈന്‍ സഖാഫി ചുള്ളിക്കോട് പദവി ഒഴിയും. പകരം തൊടിയൂര്‍ മുഹമ്മദ് കുഞ്ഞ് മൗലവിയെ സംസ്ഥാന ഹജ്ജ് കമ്മിറ്റി ചെയര്‍മാനായി നിയമിക്കും.
നേരത്തെ വഖഫ് ബോര്‍ഡ് പുനഃസംഘടനയില്‍ എം.സി. മായിന്‍ ഹാജിയെ ചെയര്‍മാനാക്കുകയും പ്രാതിനിധ്യത്തില്‍ തങ്ങളെ പൂര്‍ണമായും തഴയുകയും ചെയ്തതില്‍ കടുത്ത അമര്‍ഷത്തിലായിരുന്നു കാന്തപുരം വിഭാഗം.
കടുത്ത പ്രതിഷേധവും ‘സിറാജ്’ മുഖപ്രസംഗവും
വഖഫ് സ്വത്തുക്കളും സ്ഥാപനങ്ങളും സംരക്ഷിക്കുന്നതില്‍ മുന്‍പന്തിയിലുള്ള തങ്ങള്‍ക്ക് അര്‍ഹമായ പ്രാതിനിധ്യം നല്‍കാത്തത് വഞ്ചനാപരമാണെന്ന് കാന്തപുരം വിഭാഗം മുഖപത്രമായ ‘സിറാജ്’ മുഖപ്രസംഗത്തിലൂടെ വിമര്‍ശിച്ചിരുന്നു. തങ്ങള്‍ക്ക് ലഭിക്കേണ്ട അവകാശങ്ങള്‍ തട്ടിയെടുത്തു എന്നാരോപിച്ച് സയ്യിദ് ഇബ്രാഹിം ഖലീല്‍ ബുഖാരി തങ്ങളുടെ അധ്യക്ഷതയില്‍ ചേര്‍ന്ന യോഗം ഒക്ടോബര്‍ 22-ന് സംസ്ഥാന വ്യാപകമായി സെക്രട്ടേറിയറ്റിലേക്കും കളക്ടറേറ്റുകളിലേക്കും മാര്‍ച്ചും പ്രഖ്യാപിച്ചു.
വിഷയം കടുക്കുമെന്നും സമുദായത്തിനുള്ളില്‍ വലിയ ഭിന്നതയുണ്ടാകുമെന്നും കണ്ടതോടെയാണ് മുസ്ലിം ലീഗ് ദേശീയ ജനറല്‍ സെക്രട്ടറി പി.കെ. കുഞ്ഞാലിക്കുട്ടി, സാദിഖലി ശിഹാബ് തങ്ങള്‍ തുടങ്ങിയവര്‍ ഇടപെട്ടത്. പരാതി ന്യായമാണെന്നും ചര്‍ച്ചകളിലൂടെ പരിഹരിക്കുമെന്നും ലീഗ് നേതൃത്വം വ്യക്തമാക്കുകയായിരുന്നു. പരാതികള്‍ പരിഹരിക്കപ്പെട്ട് കാന്തപുരം വിഭാഗത്തിന് ബോര്‍ഡില്‍ അര്‍ഹമായ സ്ഥാനം ഉറപ്പായതോടെ, ഒക്ടോബര്‍ 22-ന് നടത്താനിരുന്ന പ്രതിഷേധ പരിപാടികള്‍ കേരള മുസ്ലിം ജമാഅത്ത് താല്‍ക്കാലികമായി പിന്‍വലിച്ചേക്കുമെന്നാണ് ലഭിക്കുന്ന സൂചന.
Tags: Waqf Board Reconstitution Kerala, Kanthapuram AP Aboobacker Musliyar, Thodiyoor Muhammed Kunju Maulavi, Haj Committee Chairman Kerala, Muslim League PK Kunhalikutty, Kerala News Malayalam, News Malayalam
News Tag Live യുട്യൂബ് ചാനല്‍ Subscribe ചെയ്യുക
Latest News
Trending
More Stories
