ന്യൂസിലൻഡ് പരമ്പരയ്ക്ക് മുമ്പ് നെറ്റ്സിൽ കോഹ്‌ലിയെ വെള്ളം കുടിപ്പിച്ച് യുവ പേസർ

ന്യൂസിലൻഡിനെതിരായ ഏകദിന പരമ്പരയ്ക്ക് മുന്നോടിയായുള്ള പരിശീലനത്തിൽ വിരാട് കോഹ്‌ലിയെ കുഴക്കി യുവ ഇന്ത്യൻ പേസർ ആഖിബ് നബി. നെറ്റ്സിൽ ആഖിബിന്റെ സ്വിങ്ങും വേഗവും നിറഞ്ഞ പന്തുകൾ നേരിടാൻ കോഹ്‌ലി ഏറെ പ്രയാസപ്പെട്ടതായാണ് റിപ്പോർട്ടുകൾ. പലതവണ ബാറ്റിന്റെ എഡ്ജ് മറികടന്ന പന്തുകൾ താരത്തെ സമ്മർദത്തിലാക്കുകയും ചെയ്തു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

രോഹിത് ശർമയും വിരാട് കോഹ്‌ലിയും ഉൾപ്പെടെയുള്ള സീനിയർ താരങ്ങൾക്കായി ഒരുക്കിയ പ്രത്യേക പരിശീലന സെഷനിൽ യുവ പേസർമാരാണ് ശ്രദ്ധാകേന്ദ്രമായത്. ഉയരംകൊണ്ട് മികച്ച ബൗൺസ് കണ്ടെത്തിയ ഗുർനൂർ ബ്രാറും കൃത്യമായ ലൈനിലും ലെങ്തിലും പന്തെറിഞ്ഞ അൻഷുൽ കാംബോജും ബാറ്റർമാരെ പരീക്ഷിച്ചു. എന്നാൽ ഇരുവശങ്ങളിലേക്കും സ്വിങ് ചെയ്ത പന്തുകളിലൂടെ കോഹ്‌ലിയെ ഏറ്റവും കൂടുതൽ ബുദ്ധിമുട്ടിച്ചത് നബിയായിരുന്നു.

ആഖിബിന്റെ ഇൻസ്വിങ്ങറുകൾ കോഹ്‌ലിയുടെ പാഡിലും തുടയിലും പതിച്ചു. തുടർച്ചയായ ഔട്ട്‌സ്വിങ്ങറുകളും ബാറ്ററുടെ പ്രതിരോധം പരീക്ഷിച്ചു. ചില പന്തുകൾ കൃത്യമായി നേരിടാനാകാതെ വന്നതോടെ കോഹ്‌ലി അസ്വസ്ഥത പ്രകടിപ്പിച്ചതായും റിപ്പോർട്ടിലുണ്ട്. എന്നാൽ പിന്നീട് രോഹിത് ശർമയുമായി തമാശകൾ പങ്കുവെച്ച് താരം പരിശീലനം തുടർന്നു.

ഇന്ത്യ എ ടീമിനായി ന്യൂസിലൻഡിൽ നടന്ന അനൗദ്യോഗിക ടെസ്റ്റിലെ മികച്ച പ്രകടനത്തിന് പിന്നാലെയാണ് ആഖിബ് നബി വീണ്ടും ശ്രദ്ധ നേടുന്നത്. പരിക്കേറ്റ പ്രസിദ്ധ് കൃഷ്ണയ്ക്ക് പകരക്കാരനായാണ് താരത്തെ ഏകദിന ടീമിൽ ഉൾപ്പെടുത്തിയത്.

നവംബർ നാലിന് ഓക്‌ലൻഡിലാണ് ഇന്ത്യയും ന്യൂസിലൻഡും തമ്മിലുള്ള ആദ്യ ഏകദിനം. രോഹിത് ശർമ, വിരാട് കോഹ്‌ലി, ശുഭ്മാൻ ഗിൽ, കെ.എൽ രാഹുൽ തുടങ്ങിയ പ്രമുഖ താരങ്ങൾ അണിനിരക്കുന്ന പരമ്പരയ്ക്ക് മുന്നോടിയായി യുവ പേസറുടെ പ്രകടനം ഇന്ത്യൻ ക്യാമ്പിൽ ശ്രദ്ധ നേടുകയാണ്.

News Tag Live യുട്യൂബ് ചാനല്‍ Subscribe ചെയ്യുക