കൃത്രിമബുദ്ധിയെ ഭയക്കണോ? മനുഷ്യന്റെ നിയന്ത്രണത്തിൽ ഉപയോഗിക്കേണ്ട പുതിയ സാങ്കേതികവിദ്യയെന്ന് വിലയിരുത്തൽ

കൃത്രിമബുദ്ധിയെ (എഐ) മനുഷ്യരാശി ഭയക്കേണ്ടതുണ്ടോ, അതോ മനുഷ്യരുടെ ജോലി, ചിന്ത, സർഗാത്മകത എന്നിവയിൽ മാറ്റം സൃഷ്ടിക്കുന്ന ഏറ്റവും പുതിയ സാങ്കേതിക മുന്നേറ്റമായി അതിനെ കാണണമോ? ഷാർജ അന്താരാഷ്ട്ര പുസ്തകമേളയുടെ 45-ാം പതിപ്പിൽ നടന്ന ചർച്ചയിൽ ഈ ചോദ്യമാണ് പ്രധാനമായും ഉയർന്നത്. ഈജിപ്ഷ്യൻ നോവലിസ്റ്റും വിവർത്തകയുമായ ഡോ. ഹൊവൈദ സാലിഹ്, അക്കാദമിക വിദഗ്ധനും എഴുത്തുകാരനുമായ പ്രൊഫ. നിർമൽ ഛബ്രിയ, ഇന്റർനെറ്റ് ഹിസ്റ്ററി പോഡ്കാസ്റ്റിന്റെ അവതാരകനും എഴുത്തുകാരനുമായ ബ്രയാൻ മക്കല്ലോ എന്നിവർ ചർച്ചയിൽ പങ്കെടുത്തു. ലൈല എൽ-വാഫി മോഡറേറ്ററായിരുന്നു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

എഐയെക്കുറിച്ചുള്ള ഭയം മാറ്റി അതിനെക്കുറിച്ച് വ്യക്തമായ അറിവ് നേടുകയാണ് വേണ്ടതെന്ന് നിർമൽ ഛബ്രിയ അഭിപ്രായപ്പെട്ടു. ഭയപ്പെടുകയല്ല, ജാഗ്രതയോടെ സമീപിക്കുകയാണ് വേണ്ടതെന്നും സാങ്കേതികവിദ്യ മികച്ച രീതിയിൽ എങ്ങനെ ഉപയോഗിക്കാമെന്ന് മനസ്സിലാക്കണമെന്നും അദ്ദേഹം പറഞ്ഞു. എഐയെ ഏറ്റവും പുതിയൊരു ഉപകരണമായി കാണണമെന്ന് ബ്രയാൻ മക്കല്ലോയും അഭിപ്രായപ്പെട്ടു. സാങ്കേതികവിദ്യ നല്ലതോ ചീത്തയോ ആകുന്നത് അത് ഉപയോഗിക്കുന്നവരെ ആശ്രയിച്ചാണെന്നും അദ്ദേഹം ചൂണ്ടിക്കാട്ടി. കമ്പ്യൂട്ടറുകൾ ആദ്യകാലത്ത് മനുഷ്യരുടെ തൊഴിൽ നഷ്ടപ്പെടുത്തുമെന്ന ആശങ്ക ഉയർത്തിയിരുന്നെങ്കിലും പിന്നീട് ജോലികൾ എളുപ്പമാക്കുന്ന ഉപകരണങ്ങളായി മാറിയതും അദ്ദേഹം ഉദാഹരിച്ചു.

എന്നാൽ എഐയുടെ ഭാവി വളർച്ചയെക്കുറിച്ച് കൂടുതൽ ജാഗ്രത വേണമെന്ന നിലപാടാണ് ഡോ. ഹൊവൈദ സാലിഹ് മുന്നോട്ടുവച്ചത്. ഇന്ന് എഐയ്ക്ക് ചെയ്യാൻ കഴിയുന്ന കാര്യങ്ങളേക്കാൾ വരുംവർഷങ്ങളിൽ അത് കൈവരിച്ചേക്കാവുന്ന ശേഷികളാണ് ആശങ്കപ്പെടുത്തുന്നതെന്ന് അവർ പറഞ്ഞു. യന്ത്രങ്ങൾ സ്വന്തമായി ആശയവിനിമയ രീതികൾ വികസിപ്പിക്കുകയും മനുഷ്യർക്ക് മനസ്സിലാക്കാൻ പ്രയാസമുള്ള രീതിയിൽ പ്രവർത്തിക്കുകയും ചെയ്യാനുള്ള സാധ്യതയും അവർ ചർച്ചയിൽ ഉന്നയിച്ചു.

എഐ മനുഷ്യന്റെ താൽപര്യങ്ങൾക്കും ലക്ഷ്യങ്ങൾക്കും അനുസൃതമായി പ്രവർത്തിക്കുന്നുവെന്ന് ഉറപ്പാക്കുന്നതിന്റെ പ്രാധാന്യവും ചർച്ചയായി. ഒരു എഐ സംവിധാനം മറ്റൊരു എഐ സംവിധാനത്തെ സൃഷ്ടിക്കുകയും പരിശീലിപ്പിക്കുകയും ചെയ്യുന്ന സാഹചര്യം വന്നാൽ അവയെ മനുഷ്യന്റെ ലക്ഷ്യങ്ങളുമായി ചേർത്തുനിർത്തുന്നതിനെക്കുറിച്ച് ഗൗരവമായി ചിന്തിക്കണമെന്ന് ഛബ്രിയ പറഞ്ഞു. സാങ്കേതികവിദ്യയുടെ ഉപയോഗം നല്ലതോ ചീത്തയോ ആകുന്നത് അതിന്റെ സൃഷ്ടാക്കളുടെയും ഉപയോക്താക്കളുടെയും തീരുമാനങ്ങളെ ആശ്രയിച്ചാണെന്നും അതിന്റെ ഉത്തരവാദിത്തം മനുഷ്യർക്കാണെന്നും അദ്ദേഹം വ്യക്തമാക്കി. സർക്കാർ, വിദ്യാഭ്യാസം, ബിസിനസ് മേഖലകളിൽ യുഎഇ നടത്തുന്ന എഐ വിനിയോഗവും ചർച്ചയിൽ പരാമർശിച്ചു.

എഐയുടെ വളർച്ച സാഹിത്യരംഗത്തും എഴുത്തുകാരുടെ പകർപ്പവകാശത്തിലും ഉയർത്തുന്ന വെല്ലുവിളികളെക്കുറിച്ചും ഡോ. സാലിഹ് ആശങ്ക പ്രകടിപ്പിച്ചു. എഐ സംവിധാനങ്ങൾ പരിശീലിപ്പിക്കാൻ ഉപയോഗിക്കുന്ന ഉള്ളടക്കങ്ങൾ എവിടെനിന്നാണ് ലഭിക്കുന്നതെന്ന് എഴുത്തുകാർ ചോദിക്കേണ്ടതുണ്ടെന്ന് അവർ പറഞ്ഞു. എഴുത്തുകാരുടെ സൃഷ്ടികൾ അവരുടെ അറിവോ സമ്മതമോ ഇല്ലാതെ എഐ പരിശീലനത്തിന് ഉപയോഗിക്കപ്പെടുന്നുണ്ടോ എന്നതും സർഗാത്മക സൃഷ്ടികളുടെ ഉടമസ്ഥാവകാശം എങ്ങനെ സംരക്ഷിക്കുമെന്നതും ഗൗരവമായ ചോദ്യങ്ങളാണെന്നും അവർ ചൂണ്ടിക്കാട്ടി. സാങ്കേതിക മുന്നേറ്റങ്ങൾ മനുഷ്യന്റെ വിവേചനബുദ്ധി, സർഗാത്മകത, ഉത്തരവാദിത്തം എന്നിവയുടെ നിയന്ത്രണത്തിലായിരിക്കണമെന്ന സന്ദേശത്തോടെയാണ് ചർച്ച അവസാനിച്ചത്.

News Tag Live യുട്യൂബ് ചാനല്‍ Subscribe ചെയ്യുക