പിണറായി വിജയനും വീണയ്ക്കും മുഹമ്മദ് റിയാസിനുമെതിരെ കേസെടുക്കാന്‍ ഹൈക്കോടതി ഉത്തരവ്! അഴിമതി തടയല്‍ നിയമപ്രകാരം ഉടന്‍ എഫ്.ഐ.ആര്‍ രജിസ്റ്റര്‍ ചെയ്യണം!

കൊച്ചി: സി.എം.ആര്‍.എല്‍-എക്‌സാലോജിക് സാമ്പത്തിക ഇടപാടുമായി ബന്ധപ്പെട്ട് എന്‍ഫോഴ്സ്മെന്റ് ഡയറക്ടറേറ്റ് (ED) കൈമാറിയ റിപ്പോര്‍ട്ടിന്റെ അടിസ്ഥാനത്തില്‍ മുന്‍ മുഖ്യമന്ത്രി പിണറായി വിജയന്‍ ഉള്‍പ്പെടെയുള്ളവര്‍ക്കെതിരേ കേസേടുക്കണമെന്ന് ഹൈക്കോടതി.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

പിണറായി വിജയന്‍, മകള്‍ ടി. വീണ, വീണയുടെ ഭര്‍ത്താവും മുന്‍ മന്ത്രിയുമായ പി.എ. മുഹമ്മദ് റിയാസ് എന്നിവര്‍ക്കെതിരെ അഴിമതി തടയല്‍ നിയമപ്രകാരം (Prevention of Corruption Act) ഉടന്‍ എഫ്.ഐ.ആര്‍ (FIR) രജിസ്റ്റര്‍ ചെയ്ത് അന്വേഷണം നടത്താനാണ് ഹൈക്കോടതി ഉത്തരവ്.

ഇ.ഡി നല്‍കിയ റിപ്പോര്‍ട്ടില്‍ നേരിട്ട് കേസെടുക്കാതെ ക്രൈംബ്രാഞ്ചിന്റെ പ്രാഥമികാന്വേഷണത്തിന് മാത്രം ഉത്തരവിട്ട സംസ്ഥാന പോലീസ് മേധാവിയുടെ (DGP) നടപടിയെ ചോദ്യം ചെയ്ത് പൊതുപ്രവര്‍ത്തകന്‍ അഡ്വ. കെ.എം. ഷാജഹാന്‍ സമര്‍പ്പിച്ച ഹര്‍ജിയിലാണ് ജസ്റ്റിസ് എ. ബദറുദ്ദീന്‍ ഈ നിര്‍ണായക വിധി പുറപ്പെടുവിച്ചത്.

ഡി.ജി.പിയുടെ നിലപാട് തള്ളി; ഇ.ഡിയുടെ വാദം അംഗീകരിച്ച് കോടതി

സി.എം.ആര്‍.എല്‍ (CMRL) കമ്പനിയില്‍ നിന്നും എക്‌സാലോജിക് സാങ്കേതിക സ്ഥാപനത്തിലേക്ക് നടന്ന പണമിടപാടില്‍ ഇ.ഡി നടത്തിയ അന്വേഷണത്തില്‍ ഗുരുതരമായ കണ്ടെത്തലുകളാണ് ഉണ്ടായത്. ഇതിന്റെ തുടര്‍ച്ചയായി പിണറായി വിജയന്‍, വീണ വിജയന്‍, പി.എ. മുഹമ്മദ് റിയാസ് എന്നിവര്‍ക്കെതിരെ കേസെടുക്കണമെന്ന് കാട്ടി ഇ.ഡി സംസ്ഥാന പോലീസ് മേധാവിക്ക് റിപ്പോര്‍ട്ട് നല്‍കിയിരുന്നു.

എന്നാല്‍, നിര്‍ദ്ദേശത്തെ മറികടന്ന് കേസ് രജിസ്റ്റര്‍ ചെയ്യാതെ ഡി.ജി.പി ക്രൈംബ്രാഞ്ച് പ്രാഥമികാന്വേഷണത്തിനാണ് ഉത്തരവിട്ടത്. ഇതിനെതിരെയാണ് കെ.എം. ഷാജഹാന്‍ ഹൈക്കോടതിയെ സമീപിച്ചത്.

സര്‍ക്കാരിന്റെ വാദം: ഹരജി നിലനില്‍ക്കില്ലെന്നും ഏതൊരു പരാതിയിലും ആദ്യം തന്നെ എഫ്.ഐ.ആര്‍ രജിസ്റ്റര്‍ ചെയ്യേണ്ടതില്ലെന്ന് സുപ്രീം കോടതി വിധികളുണ്ടെന്നും സര്‍ക്കാര്‍ കോടതിയില്‍ വാദിച്ചു.

ഇ.ഡിയുടെ വാദം: കള്ളപ്പണം വെളുപ്പിക്കല്‍ തടയല്‍ നിയമത്തിന്റെ (PMLA Act) സെക്ഷന്‍ 66 (2) പ്രകാരം ഒരു കേന്ദ്ര ഏജന്‍സി നല്‍കുന്ന വിവരങ്ങളില്‍ എഫ്.ഐ.ആര്‍ രജിസ്റ്റര്‍ ചെയ്ത് അന്വേഷണം നടത്തേണ്ടത് നിയമപരമായി നിര്‍ബന്ധമാണ്. കുറ്റകൃത്യത്തിന്റെ സ്വഭാവം അതീവ ഗുരുതരമായതിനാല്‍ പ്രാഥമിക അന്വേഷണത്തിന്റെ ആവശ്യമില്ലെന്നും ഇ.ഡി വ്യക്തമാക്കി.

ഈ വാദങ്ങള്‍ സമഗ്രമായി പരിശോധിച്ച ഹൈക്കോടതി, സര്‍ക്കാരിന്റെ എതിര്‍പ്പുകള്‍ പൂര്‍ണ്ണമായി തള്ളിക്കൊണ്ട് ഉടന്‍ കേസെടുക്കാന്‍ പൊലീസിന് കര്‍ശന നിര്‍ദ്ദേശം നല്‍കുകയായിരുന്നു.

മറ്റ് മുതിര്‍ന്ന രാഷ്ട്രീയ നേതാക്കളും നിഴലില്‍

ഇ.ഡി പോലീസിന് നല്‍കിയ രേഖകളില്‍ യു.ഡി.എഫ് (UDF) മുന്നണിയിലെ മുതിര്‍ന്ന നേതാക്കളുടെയും ആഭ്യന്തര മന്ത്രി രമേശ് ചെന്നിത്തല, വ്യവസായ മന്ത്രി പി കെ കുഞ്ഞാലിക്കുട്ടി ഉള്‍പ്പെടെയുള്ള പ്രമുഖരുടെയും പേരുകള്‍ പരാമര്‍ശിക്കപ്പെട്ടിട്ടുള്ളതായി റിപ്പോര്‍ട്ടുകള്‍ ഉണ്ടായിരുന്നു. ഇതാണ് തുടക്കത്തില്‍ എഫ്.ഐ.ആര്‍ രജിസ്റ്റര്‍ ചെയ്യുന്നതില്‍ സര്‍ക്കാര്‍ വിമുഖത കാണിക്കാന്‍ കാരണമെന്നും ഹര്‍ജിക്കാരന്‍ കോടതിയില്‍ ആക്ഷേപമുന്നയിച്ചിരുന്നു.

കെ.എസ്.ഐ.ഡി.സി (KSIDC) മുതല്‍ വിവിധ കേന്ദ്ര ഏജന്‍സികള്‍ വരെ അന്വേഷിക്കുന്ന എക്‌സാലോജിക് വിഷയം ഹൈക്കോടതിയുടെ ഈ പുതിയ ഉത്തരവോടെ പുതിയൊരു നിയമപോരാട്ടത്തിലേക്കും രാഷ്ട്രീയ കൊടുങ്കാറ്റിലേക്കുമാണ് സംസ്ഥാനത്തെ നയിക്കുന്നത്. എഫ്.ഐ.ആര്‍ രജിസ്റ്റര്‍ ചെയ്യുന്നതോടെ കേസിന്റെ കൂടുതല്‍ വിവരങ്ങളും അനുബന്ധ തെളിവുകളും പുറത്തുവരുമെന്നാണ് സൂചന.

Tags: Pinarayi Vijayan, Exalogic CMRL Case, Veena Vijayan, Mohammad Riyas, Kerala High Court Order, ED Report Kerala Police, Kerala Politics Malayalam, Breaking News Malayalam

News Tag Live യുട്യൂബ് ചാനല്‍ Subscribe ചെയ്യുക