ഓണ്‍ലൈന്‍ വഴി അയച്ച പണം തിരിച്ചുപിടിക്കാം; ഡിജിറ്റല്‍ തട്ടിപ്പ് തടയാന്‍ കടുത്ത നിയന്ത്രണങ്ങള്‍ക്കൊരുങ്ങി ആര്‍ബിഐ

ന്യൂഡല്‍ഹി: യുപിഐ വഴിയോ മറ്റ് ഓണ്‍ലൈന്‍ സംവിധാനങ്ങളിലൂടെയോ വന്‍തുകകള്‍ ട്രാന്‍സ്ഫര്‍ ചെയ്യുന്നതിന് നിയന്ത്രണം വരുന്നു. ഡിജിറ്റല്‍ തട്ടിപ്പുകള്‍ വര്‍ധിച്ചു വരുന്ന സാഹചര്യത്തിലാണ് ഇടപാടുകളില്‍ കര്‍ശനമായ നിയന്ത്രണമേര്‍പ്പെടുത്താന്‍ റിസര്‍വ് ബാങ്ക് ഓഫ് ഇന്ത്യ(ആര്‍ബിഐ)തയ്യാറെടുക്കുന്നത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

യുപിഐ വഴി അയക്കുന്ന പണം ഒരുമണിക്കൂര്‍ കാലതാമസമെടുത്ത് സ്വീകര്‍ത്താവിലേക്ക് എത്തുന്ന തരത്തിലുള്ള നിയന്ത്രണം ഏര്‍പ്പെടുത്താനൊരുങ്ങുന്നതായാണ് വിവരം. പുതിയ നിര്‍ദേശം നടപ്പിലാക്കുന്നതിന് മുന്നോടിയായി മേയ് 8 വരെ പൊതുജനാഭിപ്രായം തേടുമെന്ന് റിസര്‍വ് ബാങ്ക് അറിയിച്ചു. ലഭിക്കുന്ന പ്രതികരണങ്ങള്‍ പരിശോധിച്ച ശേഷം മാത്രമേ റിസര്‍വ് ബാങ്ക് ഇത് സംബന്ധിച്ച ഔദ്യോഗിക മാര്‍ഗ്ഗനിര്‍ദ്ദേശങ്ങള്‍ (Formal Guidelines) പുറത്തിറക്കുകയുള്ളൂ.

എന്താണ് കൂളിങ് ഓഫ് പിരീയഡ്?

രാജ്യത്ത് ഇതിനോടകം 22,000 കോടിയുടെ ഓണ്‍ലൈന്‍ തട്ടിപ്പുകള്‍ നടന്നതായാണ് അടുത്തിടെ പുറത്തുവന്ന റിപ്പോര്‍ട്ടുകള്‍. ഇത് തടയാനായി കൂള്‍ ഓഫ് പിരീയഡെന്ന രീതിയില്‍ ട്രാന്‍സാക്ഷന്‍ പൂര്‍ത്തിയാക്കുന്നതിന് മുന്‍പായി അല്‍പ്പം സമയം നിശ്ചയിക്കാനാണ് നീക്കം. ഇത് പ്രാബല്യത്തിലായാല്‍ പണം അയച്ചുകഴിഞ്ഞാലും ഒരുമണിക്കൂര്‍ കഴിഞ്ഞേ സ്വീകര്‍ത്താവിലേക്ക് എത്തുകയുള്ളൂ. ഈ ഒരുമണിക്കൂറിനുള്ളില്‍ ഉദ്ദേശിക്കുന്ന ആളിലേക്ക് തന്നെയാണ് പണമെത്തുന്നതെന്ന് സ്ഥിരീകരിക്കാന്‍ ഉപയോക്താവിന് സാധിക്കും. ഏതെങ്കിലും തരത്തില്‍ തട്ടിപ്പാണെന്ന് സംശയം തോന്നുന്ന മാത്രയില്‍ ട്രാന്‍സാക്ഷന്‍ കാന്‍സല്‍ ചെയ്യാനും സാധിക്കും.

എന്തിനാണ് കാലതാമസം?

പുതിയ പുതിയ ടെക്നോളജി ഉപയോഗപ്പെടുത്തിക്കൊണ്ടുള്ള തട്ടിപ്പിനാണ് അധികപേരും ഇരയാക്കപ്പെടുന്നതെന്നാണ് റിസര്‍വ് ബാങ്കിന്റെ നിരീക്ഷണം. സമയമെടുത്ത് ചിന്തിക്കാന്‍ സമയം അനുവദിക്കാതെ, ഉപയോക്താവിനെ സമ്മര്‍ദത്തിലാക്കിയാണ് മിക്ക തട്ടിപ്പുകളും നടക്കാറുള്ളത്. ഇത് മറികടക്കുന്നതിനായാണ് ഒരു മണിക്കൂര്‍ കാലതാമസം കൊണ്ടുവരുന്നതെന്നാണ് റിസര്‍വ് ബാങ്കിന്റെ ന്യായം.

പ്രധാനമായും, 10,000-ത്തിന് മുകളിലുള്ള ട്രാന്‍സാക്ഷനുകള്‍ക്കായിരിക്കും കൂളിങ് ഓഫ് പിരീയഡ് ഏര്‍പ്പെടുത്തുക. ഈ സമയത്തിനുള്ളില്‍ ഉപയോക്താവിന് ട്രാന്‍സാക്ഷന്‍ റദ്ദ് ചെയ്യാനുള്ള അവസരമുണ്ടാകും.

70 വയസിന് മുകളില്‍ പ്രായമുള്ളവരെ സംബന്ധിച്ചിടത്തോളം, 50,000-ത്തിന് മുകളിലുള്ള ഇടപാടുകള്‍ക്ക് വിശ്വസ്ഥനായ ഇടനിലക്കാരന്റെ അനുവാദം നിര്‍ബന്ധമാക്കും.
വ്യക്തിഗതമോ ബിസിനസ് ആവശ്യങ്ങള്‍ക്കോ വേണ്ടിയുള്ള വന്‍ നിക്ഷേപങ്ങളില്‍ സ്ഥിരീകരിച്ച് കഴിഞ്ഞതിന് ശേഷം മാത്രമേ ബാങ്ക് ക്രെഡിറ്റ് ചെയ്യുകയുള്ളൂ.