കാറ്റിൽ റോഡിൽ വീണ മരത്തിൽ ഓട്ടോ ഇടിച്ചു; മീൻ വിൽപ്പനക്കാരനു ദാരുണാന്ത്യം

കോട്ടയം: ശക്തമായ മഴയിലും കാറ്റിലും റോഡിലേക്ക് കടപുഴകി വീണ മരത്തിൽ ഓട്ടോയിടിച്ച് മീൻ വിൽപ്പനക്കാരൻ മരിച്ചു. തൃശൂർ ചുവന്നമണ്ണ് വള്ളിക്കാട്ടിൽ ബിജു ജോസ് (42) ആണ് മരിച്ചത്. വൈക്കം- തൊടുപുഴ റോഡിൽ കാഞ്ഞിരമല കോൺവെന്റിനു സമീപം ഇന്ന് പുലർച്ചെ ഒന്നരയോടെയാണ് അപകടം. വെളിയന്നൂർ- അരീക്കര റോഡിൽ മീൻ വിൽപ്പന നടത്തിവരുന്ന ബിജു കാഞ്ഞിരമല ഭാ​ഗത്ത് വാടക വീട്ടിലാണ് താമസം.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

പുലർച്ചെ വിൽപ്പനയ്ക്കുള്ള മീൻ വാങ്ങുന്നതിനായി ഓട്ടോറിക്ഷയിൽ പോകുമ്പോഴാണ് അപകടം ഉണ്ടായത്. രാത്രി ഈ ഭാ​ഗത്തുണ്ടായ കാറ്റിൽ ആഞ്ഞിലി മരം റോ‍ഡിലേക്ക് വീണു കിടക്കുകയായിരുന്നു. ഇതിലാണ് ബിജുവിൻ്റെ ഓട്ടോയിടിച്ചത്.

ഇടിയുടെ ആഘാതത്തിൽ ഓട്ടോയിൽ നിന്നു റോഡിലേക്ക് തെറിച്ചു വീണ ബിജുവിന്റെ തലയ്ക്ക് പരിക്കേൽക്കുകയായിരുന്നു. അ​ഗ്നിരക്ഷാ സേനയെത്തി ഉടൻ കൂത്താട്ടുകുളത്തെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

ഭാര്യ: ബ്ലെസി. മക്കൾ: ജഫ്രിൻ, ജസ്റ്റിന, ജസിയ. (മൂവരും വിദ്യാർഥികൾ).
മൃതദേഹം പോസ്റ്റ്മോർട്ടത്തിന് ശേഷം സംസ്കരിക്കും.

News Tag Live യുട്യൂബ് ചാനല്‍ Subscribe ചെയ്യുക