കൊച്ചിയില്‍ സ്പാ ജോലി വാഗ്ദാനം ചെയ്ത് വിളിച്ച് വരുത്തി കൂട്ടബലാത്സംഗം; ദൃശ്യങ്ങള്‍ പകര്‍ത്തി; രണ്ടുപേര്‍ റിമാന്‍ഡില്‍!

കൊച്ചി: കളമശ്ശേരിയില്‍ ജോലി വാഗ്ദാനം ചെയ്ത് വിളിച്ചുവരുത്തി വിവാഹിതയായ യുവതിയെ ലഹരി നല്‍കി കൂട്ടബലാത്സംഗം ചെയ്തു. സ്പായില്‍ മാനേജര്‍ തസ്തികയില്‍ ജോലി നല്‍കാമെന്നും അഭിമുഖത്തിനായി എത്തണമെന്നും ആവശ്യപ്പെട്ട് ലോഡ്ജിലേക്ക് വിളിച്ചുവരുത്തിയായിരുന്നു നാലംഗ സംഘത്തിന്റെ ക്രൂരത. സംഭവത്തില്‍ ഇരിക്കാവ് സ്വദേശി ശ്രീരാജ്, തേവക്കല്‍ സ്വദേശി ജിത്ത് മാര്‍ട്ടിന്‍ (ജിത്തു) എന്നിവരെ കളമശ്ശേരി പോലീസ് അറസ്റ്റ് ചെയ്ത് റിമാന്‍ഡ് ചെയ്തു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ശാരീരികമായും മാനസികമായും ഗുരുതരമായി പരിക്കേറ്റ യുവതി നിലവില്‍ കളമശ്ശേരി മെഡിക്കല്‍ കോളേജ് ആശുപത്രിയില്‍ ചികിത്സയിലാണ്.

ലഹരി നല്‍കി പീഡനം, ദൃശ്യങ്ങള്‍ പകര്‍ത്തി ഭീഷണി

ഇന്റര്‍വ്യൂവിനായി കൊച്ചിയിലെ ലോഡ്ജിലെത്തിയ യുവതിക്ക് പ്രതികള്‍ പാനീയത്തില്‍ ലഹരിമരുന്ന് കലര്‍ത്തി നല്‍കി അവശയാക്കുകയായിരുന്നു. തുടര്‍ന്ന് ബോധരഹിതയായ യുവതിയെ പ്രതികള്‍ മാറിമാറി പീഡിപ്പിച്ചു. ഉപദ്രവത്തിന് ശേഷം സംഭവം പുറത്തുപറയാതിരിക്കാനും ഭീഷണിപ്പെടുത്താനുമായി പ്രതികള്‍ മൊബൈല്‍ ഫോണില്‍ പീഡന ദൃശ്യങ്ങള്‍ പകര്‍ത്തിയതായും പോലീസ് വെളിപ്പെടുത്തി.

പോലീസിന് നല്‍കിയ മൊഴിയുടെ അടിസ്ഥാനത്തിലാണ് കേസില്‍ അന്വേഷണം ഊര്‍ജ്ജിതമാക്കിയത്.

സ്പായുടെ മറവില്‍ പെണ്‍വാണിഭ സംഘം; കൂടുതല്‍ അറസ്റ്റ് ഉടന്‍

സ്പായുടെ മറവില്‍ നഗരകേന്ദ്രങ്ങളില്‍ പെണ്‍വാണിഭവും ലഹരിവ്യാപാരവും നടത്തുന്ന വന്‍ സംഘത്തിലെ പ്രധാന കണ്ണികളാണ് പിടിയിലായ ശ്രീരാജും ജിത്തുവുമെന്ന് പോലീസ് സ്ഥിരീകരിച്ചിട്ടുണ്ട്. ഇന്റര്‍വ്യൂവിന് വിളിച്ചുവരുത്തുന്നതില്‍ മറ്റൊരു യുവതിക്കും പങ്കുള്ളതായി പോലീസ് അന്വേഷണത്തില്‍ വ്യക്തമായിട്ടുണ്ട്.

സംഭവത്തില്‍ കൂടുതല്‍ പേര്‍ ഉള്‍പ്പെട്ടിട്ടുണ്ടെന്ന നിഗമനത്തിലാണ് കളമശ്ശേരി പോലീസ്. കേസിലെ മറ്റു പ്രതികളെയും സംഭവത്തിന് പിന്നില്‍ പ്രവര്‍ത്തിച്ച പെണ്‍വാണിഭ സംഘത്തിലെ മറ്റ് അംഗങ്ങളെയും കണ്ടെത്തുന്നതിനായി അന്വേഷണം വിപുലീകരിച്ചതായി പോലീസ് ഉദ്യോഗസ്ഥര്‍ അറിയിച്ചു.

Tags: Kochi Gang Rape, Kalamassery News, Spa Job Scam, Kerala Crime News, Kochi News, Crime News Malayalam, Kerala Police

News Tag Live യുട്യൂബ് ചാനല്‍ Subscribe ചെയ്യുക