”മുസ്ലിം പെണ്‍കുട്ടികള്‍ നേടിയ പുരോഗതി ‘ചാട്ടം’; അവര്‍ നിരീശ്വര വാദത്തിലേക്ക് ആകര്‍ഷിക്കപ്പെടുന്നു…” – മന്ത്രി കെഎം ഷാജി

കോഴിക്കോട്: വിദ്യാഭ്യാസപരമായി മുന്നോട്ടുപോയ മുസ്ലിം പെണ്‍കുട്ടികള്‍ വിശ്വാസപരമായി പിന്നാക്കം പോകുന്നുവെന്ന് ആശങ്ക പ്രകടിപ്പിച്ച് മന്ത്രി കെ.എം. ഷാജി. കാലിക്കറ്റ് സര്‍വ്വകലാശാല സി.എച്ച്. ചെയര്‍ സംഘടിപ്പിച്ച ‘ഡെമോക്രസി ആന്‍ഡ് ഡെവലപ്‌മെന്റ്’ (Democracy and Development) എന്ന വിഷയത്തിലെ ദേശീയ സെമിനാറിലാണ് മന്ത്രിയുടെ പരാമര്‍ശം. മുസ്ലിം പെണ്‍കുട്ടികള്‍ വിദ്യാഭ്യാസ രംഗത്ത് മുന്നേറുന്നുണ്ടെങ്കിലും അവര്‍ നിരീശ്വരവാദികളിലേക്ക് ആകര്‍ഷിക്കപ്പെടുന്നു എന്ന ആശങ്കയാണ് കെ.എം. ഷാജി പ്രധാനമായും പ്രകടിപ്പിച്ചത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

സമുദായവും സംഘടനകളും ഈ പെണ്‍കുട്ടികളെ ശരിയായ രീതിയില്‍ നിയന്ത്രിക്കുകയും നയിക്കുകയും ചെയ്യണമെന്ന് മന്ത്രി ആവശ്യപ്പെട്ടു. വിദ്യാഭ്യാസപരമായി മുന്നേറിയ മുസ്ലിം പെണ്‍കുട്ടികളില്‍ ഭൂരിഭാഗവും നിരീശ്വരവാദികളുടെ ആശയങ്ങളെയും സോഷ്യല്‍ മീഡിയ പേജുകളെയുമാണ് പിന്തുടരുന്നതെന്ന് അദ്ദേഹം പ്രസംഗത്തില്‍ ആരോപിച്ചു.

മുസ്ലിം പെണ്‍കുട്ടികള്‍ക്കിടയില്‍ വന്നിട്ടുള്ള മാറ്റത്തെ ഒരു സാധാരണ മുന്നേറ്റമായി കാണാന്‍ കഴിയില്ലെന്നും, അതിനെ ഒരു ‘ചാട്ടം’ എന്ന് പറയാനാണ് കഴിയുകയെന്നും അദ്ദേഹം വ്യക്തമാക്കി.

സി.എച്ച്. മുഹമ്മദ് കോയ ഉള്‍പ്പെടെയുള്ള മുസ്ലിം ലീഗ് നേതാക്കളുടെ ശ്രമഫലമായാണ് പെണ്‍കുട്ടികള്‍ വീടുകളില്‍ നിന്ന് സ്‌കൂളുകളിലേക്കും കലാലയങ്ങളിലേക്കും എത്തിയത്. എന്നാല്‍ ഈ പെണ്‍കുട്ടികളുടെ വളര്‍ച്ചയെ കൃത്യമായ ദിശയില്‍ നയിക്കാനോ അഭിസംബോധന ചെയ്യാനോ രാഷ്ട്രീയ-മത സംഘടനകള്‍ക്ക് സാധിക്കുന്നില്ലെന്നും അദ്ദേഹം ആശങ്കപ്പെട്ടു.

കൃത്യമായ വഴികാട്ടല്‍ ലഭിക്കാത്തതുകൊണ്ട് പെണ്‍കുട്ടികള്‍ നിരീശ്വരവാദികളായ ആളുകളുടെ ഫോളോവേഴ്‌സായി മാറുകയും വിശ്വാസപരമായി വഴിതെറ്റിപ്പോവുകയും ചെയ്യുന്നു എന്ന് അദ്ദേഹം അഭിപ്രായപ്പെട്ടു.

അതേസമയം, ഒരു ജനപ്രതിനിധിയോ ഭരണഘടനാ പദവിയോ അലങ്കരിക്കുന്ന വ്യക്തി ഒരു മതനേതാവിനെയോ പണ്ഡിതനെയോ പോലെ പെണ്‍കുട്ടികളെ ഉപദേശിക്കുന്ന തരത്തില്‍ സംസാരിക്കുന്നത് ഔചിത്യമല്ലെന്ന വിമര്‍ശനം പ്രസംഗത്തിനെതിരേ ഉയരുന്നുണ്ട്.

Tags: KM Shaji, KM Shaji Speech, Muslim Girls Atheism, Calicut University Seminar, Muslim League, CH Mohammed Koya Chair, Kerala Political News, Muslim Girls Education Kerala

News Tag Live യുട്യൂബ് ചാനല്‍ Subscribe ചെയ്യുക