ഫോൺ ചാർജിംഗിനെച്ചൊല്ലി തർക്കം; ആറ്റിങ്ങലിൽ കേരള കോൺഗ്രസ് നേതാവിനെ മകൻ മർദിച്ചുകൊന്നു!

ആറ്റിങ്ങൽ (തിരുവനന്തപുരം): തിരുവനന്തപുരം ആറ്റിങ്ങലിൽ പൊതുപ്രവർത്തകനും കേരള കോൺഗ്രസ് (സ്കറിയ) നേതാവുമായ കോരാണി സനിലിന്റെ (65) മരണം ക്രൂരമായ മർദനത്തെ തുടർന്നുള്ള കൊലപാതകമാണെന്ന് തെളിഞ്ഞു. സംഭവത്തിൽ സനിലിന്റെ മകൻ ബാലഗോപാലിനെ (34) ആറ്റിങ്ങൽ ഇൻസ്‌പെക്ടർ വി.കെ. ശ്രീജേഷിന്റെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

കട്ടിലിൽ നിന്നു വീണു പരിക്കേറ്റതാണെന്ന് പറഞ്ഞായിരുന്നു സനിലിനെ മെഡിക്കൽ കോളേജിൽ പ്രവേശിപ്പിച്ചിരുന്നത്. എന്നാൽ സനിലിന്റെ മരണം അതിക്രൂരമായ ആക്രമണത്തെ തുടർന്നാണെന്ന് വ്യക്തമായതോടെയാണ് മകന്റെ അറസ്റ്റ് പോലീസ് രേഖപ്പെടുത്തിയത്.

അപകട നാടകം പൊളിച്ചത് പോലീസിന്റെയും സുഹൃത്തുക്കളുടെയും ഇടപെടൽ

ആറ്റിങ്ങൽ പാലസ് റോഡിലെ ‘ശ്രീലക്ഷ്മി’ എന്ന വാടകവീട്ടിലായിരുന്നു സനിലും മകൻ ബാലഗോപാലും താമസിച്ചിരുന്നത്. ഒരാഴ്ച മുൻപ് സനിൽ വീട്ടിൽ അബോധാവസ്ഥയിൽ കിടക്കുന്നത് കണ്ട ജോലിക്കാരി വിവരമറിയിച്ചതിനെ തുടർന്നാണ് സുഹൃത്തുക്കൾ ചേർന്ന് ഇദ്ദേഹത്തെ തിരുവനന്തപുരം മെഡിക്കൽ കോളേജ് ആശുപത്രിയിൽ എത്തിച്ചത്. വീണു പരിക്കേറ്റതാണെന്നായിരുന്നു മകൻ മെഡിക്കൽ കോളേജിൽ പറഞ്ഞത്.

എന്നാൽ, കേരള ഹോട്ടൽ ആൻഡ് റെസ്റ്റോറന്റ് അസോസിയേഷൻ (KHRA) ആറ്റിങ്ങൽ യൂണിറ്റ് മുൻ സെക്രട്ടറിയ കൂടിയായ സനിലിന്റെ അപകടത്തിൽ ദുരൂഹതയുണ്ടെന്ന് ചൂണ്ടിക്കാട്ടി സംഘടന ഭാരവാഹികൾ ആറ്റിങ്ങൽ പോലീസിൽ പരാതി നൽകി. സനിലിന് ബോധമില്ലാതിരുന്നതിനാൽ പോലീസിന് മൊഴിയെടുക്കാൻ സാധിച്ചില്ല. തുടർന്ന് വീട്ടുജോലിക്കാരി നൽകിയ മൊഴിയുടെ അടിസ്ഥാനത്തിൽ ആറ്റിങ്ങൽ പോലീസ് കേസെടുക്കുകയായിരുന്നു.

ആശുപത്രിയിൽ കൂട്ടിരുന്ന മകൻ കസ്റ്റഡിയിൽ

ശനിയാഴ്ച രാവിലെ മെഡിക്കൽ കോളേജ് ആശുപത്രിയിൽ വച്ച് സനിൽ മരണപ്പെട്ടു. ഇതിനു പിന്നാലെ ആശുപത്രിയിൽ പിതാവിന് കൂട്ടിരുന്ന മകൻ ബാലഗോപാലിനെ പോലീസ് കസ്റ്റഡിയിലെടുത്തു.

തുടർന്ന് നടത്തിയ ഇൻക്വസ്റ്റിലും പോസ്റ്റ്മോർട്ടത്തിലുമാണ് മരണകാരണം അതിക്രൂരമായ മർദനമാണെന്ന് ഡോക്ടർമാർ വ്യക്തമാക്കിയത്.

• തലയുടെ വലതുവശത്ത് ആഴത്തിൽ പരിക്കേറ്റിരുന്നു.

• വാരിയെല്ലുകളിൽ അഞ്ചെണ്ണം പൊട്ടിയ നിലയിലായിരുന്നു.

• കഴുത്തിന് പരിക്കേൽക്കുകയും ആന്തരിക രക്തസ്രാവം ഉണ്ടാവുകയും ചെയ്തു.

ഫോൺ ചാർജിംഗിനെ ചൊല്ലിയുള്ള കയ്യാങ്കളി

പോലീസ് കസ്റ്റഡിയിൽ നടത്തിയ ചോദ്യം ചെയ്യലിൽ ബാലഗോപാൽ കുറ്റം സമ്മതിച്ചു. മൊബൈൽ ഫോൺ ചാർജ് ചെയ്തു നൽകുന്നതിനെച്ചൊല്ലിയുണ്ടായ തർക്കമാണ് കൊലപാതകത്തിൽ കലാശിച്ചതെന്നാണ് മകൻ പോലീസിന് നൽകിയ മൊഴി.

തർക്കത്തിനിടെ പിതാവിനെ ക്രൂരമായി മർദിക്കുകയും തള്ളി വീഴ്ത്തുകയുമായിരുന്നു. പ്രതിയെ സനിൽ താമസിച്ചിരുന്ന വാടകവീട്ടിലെത്തിച്ച് പോലീസ് തെളിവെടുപ്പ് പൂർത്തിയാക്കി. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.

Tags: Korani Sanil Murder, Attingal Crime News, Kerala Congress Skaria Leader Death, Balagopal Arrested Attingal, KHRA Attingal, Local News Malayalam, News Malayalam

News Tag Live യുട്യൂബ് ചാനല്‍ Subscribe ചെയ്യുക