ക്ഷേത്രത്തിന് മുന്നില്‍ ഭക്തരുടെ ഇടയിലേക്ക് ട്രക്ക് ഇടിച്ചുകയറി; 12 മരണം; നിരവധി പേര്‍ക്കു പരിക്ക്

ഭോപാൽ / ഗ്വാളിയാർ: മധ്യപ്രദേശിലെ ഗ്വാളിയാറിൽ ഷീത്‌ല മാതാ ക്ഷേത്രത്തിന് സമീപം ഭക്തരുടെ കൂട്ടത്തിലേക്ക് നിയന്ത്രണം നഷ്ടപ്പെട്ട ട്രക്ക് പാഞ്ഞുകയറി വൻ ദുരന്തം. അപകടത്തിൽ 12 പേർ ദാരുണമായി കൊല്ലപ്പെടുകയും നിരവധി പേർക്ക് പരുക്കേൽക്കുകയും ചെയ്തു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ശനിയാഴ്ച രാത്രിയോടെയാണ് നാടിനെ നടുക്കിയ ഈ സംഭവം ഉണ്ടായത്. ഉത്സവത്തോടനുബന്ധിച്ച് ഷീത്‌ല മാതാ ക്ഷേത്രത്തിൽ ദർശനത്തിനായി എത്തിയ ഭക്തജനങ്ങളുടെ മേലിലേക്കാണ് നിയന്ത്രണം വിട്ട ട്രക്ക് ഇടിച്ചുകയറിയത്.

ബരിക്കേഡുകൾ തകർത്തെത്തി; തടിച്ചുകൂടിയവർക്കിടയിലേക്ക് പാഞ്ഞുകയറി

പെട്ടെന്ന് നിയന്ത്രണം നഷ്ടപ്പെട്ട ട്രക്ക് വഴിയിലുണ്ടായിരുന്ന പൊലീസ് ബാരിക്കേഡുകൾ തകർത്താണ് മുന്നോട്ട് പാഞ്ഞത്. റോഡരികിലുണ്ടായിരുന്ന കടകളും ദർശനത്തിനായി നിന്നിരുന്ന ഭക്തരെയും ഇടിച്ചുതെറിപ്പിച്ച വാഹനം ഒടുവിൽ ക്ഷേത്രത്തിന്റെ കവാടത്തിലും പുറംമതിലിലുമാണ് ഇടിച്ചുനിന്നത്.

അപകടത്തെ തുടർന്ന് പ്രദേശത്ത് വലിയ രീതിയിലുള്ള ബഹളവും പരിഭ്രാന്തിയും ഉടലെടുത്തു. റോഡരികിൽ ചിതറിക്കിടന്നവരെ ഉടൻ തന്നെ സമീപത്തെ വിവിധ ആശുപത്രികളിൽ പ്രവേശിപ്പിച്ചു. പരുക്കേറ്റവരിൽ പലരുടെയും നില ഗുരുതരമായി തുടരുന്നതിനാൽ മരണസംഖ്യ ഉയരാൻ സാധ്യതയുണ്ടെന്ന് അധികൃതർ വ്യക്തമാക്കി. പരുക്കേറ്റവരിൽ ഡ്യൂട്ടിയിലുണ്ടായിരുന്ന രണ്ട് പൊലീസുകാരും ഉൾപ്പെടുന്നുണ്ട്.

അന്വേഷണം ആരംഭിച്ച് പൊലീസ്

സംഭവത്തെ തുടർന്ന് സ്ഥലത്തെത്തിയ പൊലീസും ഉന്നത ഉദ്യോഗസ്ഥരും രക്ഷാപ്രവർത്തനങ്ങൾക്ക് നേതൃത്വം നൽകി. കർശന സുരക്ഷയും ഗതാഗത നിയന്ത്രണങ്ങളും നിലനിൽക്കുന്ന പ്രദേശത്തേക്ക് ഈ ഭാരവാഹനം എങ്ങനെ പ്രവേശിച്ചു എന്നതിനെക്കുറിച്ചും, ട്രക്കിന്റെ സാങ്കേതിക തകരാറുകളോ ഡ്രൈവറുടെ അശ്രദ്ധയോ ആണ് അപകടത്തിന് കാരണമെന്നതിനെക്കുറിച്ചും പൊലീസ് സമഗ്രമായ അന്വേഷണം ആരംഭിച്ചിട്ടുണ്ട്.

Tags: Gwalior Accident News, Sheetla Mata Temple Gwalior, Madhya Pradesh News Malayalam, Truck Mows Down Devotees Gwalior, National News Malayalam, News Malayalam

News Tag Live യുട്യൂബ് ചാനല്‍ Subscribe ചെയ്യുക