150 കിലോമീറ്റർ വേഗതയിൽ  മരണപാച്ചിൽ; നെടുമ്പാശേരി മിനി കൂപ്പർ അപകടത്തിൽ ഒപ്പമുണ്ടായിരുന്ന സുഹൃത്തുക്കളും പിടിയിൽ; മദ്യം നൽകിയ ബാറുകൾക്കെതിരെയും നടപടി!

കൊച്ചി: നെടുമ്പാശേരി എയർപോർട്ട് റോഡിൽ സ്കൂട്ടർ യാത്രികരായ മൂന്ന് പേരുടെ ജീവനെടുത്ത ആഡംബര മിനി കൂപ്പർ കാർ അപകടസമയത്ത് 150 കിലോമീറ്റർ വേഗതയിലായിരുന്നു എന്ന് ഡ്രൈവർ പോലീസിനോട് സമ്മതിച്ചു. തൃക്കാക്കര സ്വദേശിയും രാജഗിരി കോളേജിലെ ബി.കോം വിദ്യാർത്ഥിയുമായ സുഹൈൽ സജീവ് (21) ആണ് വാഹനം ഓടിച്ചിരുന്നത്. അപകടസമയത്തെ കാറിന്റെ കൃത്യമായ വേഗത ശാസ്ത്രീയമായി സ്ഥിരീകരിക്കുന്നതിനായി വിദഗ്ധ പരിശോധനകൾ നടത്തിവരികയാണ്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

കാറിലുണ്ടായിരുന്ന മൂന്ന് സുഹൃത്തുക്കളും പിടിയിൽ

അപകടം നടന്ന ഉടൻതന്നെ സ്ഥലത്തുനിന്ന് രക്ഷപ്പെട്ട പ്രതിയുടെ സുഹൃത്തുക്കളെയും പോലീസ് പിടികൂടി. സംഭവസമയത്ത് സുഹൈലിന് പുറമെ മറ്റ് മൂന്ന് പേർകൂടി മിനി കൂപ്പർ കാറിലുണ്ടായിരുന്നു. ആലപ്പുഴ സ്വദേശിയായ നിരവിനെ മുൻപ് തന്നെ പോലീസ് കസ്റ്റഡിയിലെടുത്തിരുന്നു. പിന്നാലെ അമീർ, ജോയൽ എന്നിവരെയും പോലീസ് പിടികൂടുകയായിരുന്നു. പുലർച്ചെ 2:40-ന്റെ വിമാനത്തിൽ എത്തുന്ന സുഹൃത്തിനെ കൂട്ടിക്കൊണ്ടുപോകാനാണ് ഇവർ നെടുമ്പാശേരിയിൽ എത്തിയത്.

മദ്യപിച്ചത് മൂന്നിടങ്ങളിൽ നിന്ന്; ബാറുകൾക്കെതിരെയും നടപടി

ഉച്ച മുതൽ തന്നെ സുഹൈലും സംഘവും കടുത്ത മദ്യലഹരിയിലായിരുന്നുവെന്ന് പോലീസ് വ്യക്തമാക്കുന്നു. വൈറ്റിലയിലെ ദയ, പാലാരിവട്ടത്തെ മൺസൂൺ എംപ്രസ് എന്നീ ബാറുകളിൽ നിന്നും നെടുമ്പാശ്ശേരിയിലെ കോർട്ട് യാർഡ് ബൈ മാറിയറ്റ് ഹോട്ടലിൽ നിന്നുമാണ് ഇവർ മദ്യം കഴിച്ചത്.

മദ്യപാനവും ഭക്ഷണവും കഴിഞ്ഞ് രാത്രി 12 മണിക്കു ശേഷമായിരുന്നു എയർപോർട്ടിലേക്കുള്ള യാത്ര. ബാറുകളിൽ നിന്നുള്ള സിസിടിവി ദൃശ്യങ്ങൾ പൊലീസ് ശേഖരിക്കുന്നുണ്ട്. ബാറുകൾക്കെതിരെ കേസെടുക്കാൻ മന്ത്രി എം.ലിജു നിർദേശിച്ചതോടെ എറണാകുളം എക്സൈസ് ഡപ്യൂട്ടി കമ്മിഷണർ പി.കെ.സതീഷിന്റെ നേതൃത്വത്തിൽ നടപടികൾ ആരംഭിച്ചു.

23 വയസ്സ് തികയാത്തവർക്ക് മദ്യം വിളമ്പി നൽകിയതും നിയമം ലംഘിച്ചതും കണക്കിലെടുത്ത് ഈ സ്ഥാപനങ്ങൾക്കെതിരെ കർശന നടപടി സ്വീകരിക്കുമെന്ന് അധികൃതർ അറിയിച്ചു. സംഘത്തിന് മദ്യം നൽകിയ ബാറുകളുടെ ലൈസൻസ് റദ്ദാക്കുന്ന കാര്യവും സർക്കാരിന്റെ പരിഗണനയിലുണ്ട്. പ്രതി സുഹൈൽ സജീഫിന്റെ ഡ്രൈവിംഗ് ലൈസൻസ് പൂർണ്ണമായി റദ്ദാക്കുമെന്ന് മോട്ടോർ വാഹന വകുപ്പും (MVD) വ്യക്തമാക്കിയിട്ടുണ്ട്.

അതേസമയം, ചീറിപ്പാഞ്ഞെത്തിയ കാർ സുഹൃത്തുക്കളെ ഇടിച്ചു തെറിപ്പിക്കുന്നതു കണ്ടതിന്റെ ഞെട്ടലിലാണു അപകടത്തിൽ കൊല്ലപ്പെട്ട യുവാക്കളുടെ സഹപ്രവർത്തകനായ പ്രിയാദ്. കൊല്ലപ്പെട്ടവരും പ്രിയാദും മറ്റൊരു സഹപ്രവർത്തകനും ഉൾപ്പെടെ 5 പേരാണു 3 ബൈക്കുകളിലായി രാത്രി വിമാനത്താവള ദൃശ്യങ്ങൾ കാണാനും ഭക്ഷണം കഴിക്കാനുമായി നെടുമ്പാശേരിയിലെത്തിയത്. വിമാനത്താവള മതിൽക്കെട്ടിനു പുറത്തുനിന്നു വിമാനങ്ങൾ ലാൻഡ് ചെയ്യുന്നതും പറന്നുയരുന്നതും കണ്ടശേഷം ഭക്ഷണവും കഴിച്ചു മടങ്ങുകയായിരുന്നുവെന്നും പ്രിയാദ് പറയുന്നു.

അപകടത്തിൽപ്പെട്ട ബൈക്കിനു മുൻപിലായി സുഹൃത്തും പിന്നിലായി പ്രിയാദുമാണു സഞ്ചരിച്ചിരുന്നത്. ചീറിപ്പാഞ്ഞെത്തിയ കാർ അപകടകരമായി തന്നെ മറികടന്നുപോയതു ഭീതിയോടെയാണു പ്രിയാദ് ശ്രദ്ധിച്ചത്. തൊട്ടു മുൻപിലെ വളവിൽ കാർ ഭീകര ശബ്ദത്തോടെ സ്കൂട്ടറിൽ ഇടിക്കുന്നതും സ്കൂട്ടർ തെറിച്ചുയർന്നു റോഡരികിലേക്കു വീഴുന്നതും കണ്ടു. അടുത്തുചെന്നു വാഹനം നിർത്തി നോക്കിയപ്പോഴാണു തന്റെ സുഹൃത്തുക്കൾ തന്നെയാണു ചോരയിൽകുളിച്ചു റോഡിൽ കിടക്കുന്നതെന്നു തിരിച്ചറിഞ്ഞതെന്നും പ്രിയാദ് പറ‍ഞ്ഞു.

Tags: Nedumbassery Car Accident, Mini Cooper Scooter Accident, Suhail Sajeev Friends Arrested, Ernakulam News Malayalam, Nedumbassery Airport Road Speed Racing, Kerala News Malayalam

News Tag Live യുട്യൂബ് ചാനല്‍ Subscribe ചെയ്യുക