യോഗി ചൂണ്ടിക്കാട്ടുന്നവരെയെല്ലാം വെടിവച്ചുകൊല്ലാനാണെങ്കില്‍ എന്തിന് കോടതികള്‍?

അഹ്‌മദ് ശരീഫ് പി

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

കാട്ടാള നീതി എന്ന് പറയാന്‍ കഴിയില്ല. കാട്ടാളന്മാര്‍ യുപി പോലീസിനേക്കാള്‍ ഭേദമാണ്. പിതാവിനെ കോടതിയില്‍ ഹാജരാക്കുമ്പോള്‍ മകനെ വെടിവച്ചു കൊല്ലുക. അതിന്റെ ശവ സംസ്‌കാര ചടങ്ങില്‍ പങ്കെടുക്കാന്‍ പോലും പിതാവിനെ സമ്മതിക്കാതിരിക്കുക. പിറ്റേന്ന് പിതാവിനെയും പിതൃസഹോദരനെയും വെടിവച്ചു കൊല്ലുക. പോലീസ് അല്ലെങ്കില്‍ പോലീസിന്റെ ഒത്താശയോടെ.

ഒരാള്‍ക്ക് ഗുണ്ട എന്ന ലേബല്‍ ഒട്ടിച്ചാല്‍ പിന്നെ അയാള്‍ പേപ്പട്ടിയായി. ആര്‍ക്കും കല്ലെറിഞ്ഞും വെടിവച്ചും കൊല്ലാം. ഗുണ്ട ആണെങ്കില്‍ തന്നെ ഇവര്‍ക്ക് മാത്രം നിയമങ്ങള്‍ ഇല്ലേ. ജനം തിരഞ്ഞെടുത്ത ഒരു മുന്‍ എംപി ആണ് ഇയാള്‍.

യോഗി ആദിത്യനാഥ് ചൂണ്ടിക്കാട്ടുന്നവരെയെല്ലാം വെടിവയ്ക്കും യുപി പോലീസ്. എന്തിന് കോടതികള്‍. പോലീസും കോടതിയും എല്ലാം യോഗി തന്നെ. ഏത് നിരപരാധിയെയും പിടിച്ചു ജയിലില്‍ ഇടാം. എന്തിനേറെ ഡല്‍ഹിയിലെ മുഖ്യമന്ത്രിയെയും ഉപമുഖ്യ മന്ത്രിയെയും വരെ വേട്ടയാടുന്ന, ജയിലില്‍ ഇടുന്ന കലിയുഗം. വന്നു കഴിഞ്ഞു മനുരാജ്യം അഥവാ ഹിന്ദു രാഷ്ട്രം. ജയ് ശ്രീറാം വിളിച്ചാല്‍ ഇവിടെ നിങ്ങള്‍ക്ക് ആരെയും കൊല്ലാം.