മുള്ളിനെ മുള്ള് കൊണ്ട് എടുക്കുന്ന വിദ്യ

മസ് ഹർ എഴുതുന്നു

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

എന്താ ഉത്തമാ ആരും കവച കുണ്ഡലം ഒരുക്കാത്തത് എന്ന് ഒരാഴ്ചായി കുണ്ഡിതപ്പെട്ടു കൊണ്ടിരിക്കുമ്പോഴാണ് സാക്ഷാൽ ഷംസീർ സഖാവിൻ്റെ തിരുപ്പുറപ്പാട്. സ്പീക്കർ പദവി ഒന്നും നോക്കാതെ രാഷ്ട്രീയ ഗുരു പിണറായി വിജയൻ എന്ന മുഖ്യമന്ത്രിക്ക് സംരക്ഷണം തീർക്കാൻ ഷംസീർ ഉവാച ഭേഷായിരിക്കുന്നു.

പി. പി അൻവർ പാർട്ടിക്കും സർക്കാരിനും ഉണ്ടാക്കിയ പരിക്ക് ചില്ലറയല്ല. അൻവർ എന്ന ഇടത് മുസ് ലിം സ്വതന്ത്ര എം.എൽ എ പുരയ്ക്കുമേൽ ചാഞ്ഞ മരമാണ്. ഇനി അതിനെ വെട്ടിമാറ്റാതെ സിപിഐഎമ്മിന് പാർട്ടി എന്ന നിലയിൽ അര അടി മുന്നോട്ട് പോകാനാകില്ല എന്ന് ഈ പാർട്ടിയെ കുറിച്ച് കുറച്ച് ചുക്കും ചുണ്ണാമ്പും പഠിച്ചവർക്കറിയാം. ഇജ്ജാതി കേവല സ്വതന്ത്ര ന്യൂനപക്ഷ സഖാക്കൾ പാർട്ടിയെ ഹൈജാക്ക് ചെയ്യുന്നത് ശരിക്കും അസ്ഥിവാരം തോണ്ടലാണ്.

ഷംസീർ, വസീഫ്, റിയാസ്. കരീം പോലുള്ള അർ ഡസൻ മാപ്പിള സഖാക്കളെ ഇറക്കി തന്നെ പ്രതിരോധിച്ചില്ലെങ്കിൽ പണിപാളുമെന്ന് പാർട്ടിക്കറിയാം. അപ്പുറത്ത് സംഘ്പരിവാരമാണ്, ഇപ്പുറത്താകട്ടെ വേവാത്ത സഖാക്കളായ ഇടതു മുസ് ലിം പ്രതിരോധകരാണ്. അതിനാൽ മുള്ളിനെ മുള്ള് കൊണ്ട് എടുക്കാൻ പാർട്ടിയെ ആരും പഠിപ്പിക്കണ്ട., അല്ലെങ്കിൽ പാർട്ടി ശത്രുക്കളുടെ വ്യഖ്യാന കസർത്തിൽ പ്രതിരോധം ദുർബലമാകും.

പാർട്ടിയെ വെല്ലുവിളിച്ച അൻവർ കള്ളനും കൊള്ളക്കാരനുമാകാൻ ഇനി അധികനാൾ വേണ്ടാ, തീവ്രവാദിയും ഭീകരനുമാകാനും അധികനാൾ വേണ്ട. സുജിത് ദാസും അജിത് കുമാറും ശശിധരനും ഹൊസബെല്ലയും രാംമാധവും സ്വർണ്ണം പൊട്ടിക്കലും താമിർ വധവും ഒക്കെ അതിൻ്റെ വഴിക്കു പോകും.
അൻവറിനെ പടച്ചോൻ കാക്കട്ടെ.

ALSO READ: എഡിജിപി ആർഎസ്എസ് നേതാക്കളെ കണ്ടതിൽ തെറ്റില്ലെന്ന് സ്പീക്കർ എ എൻ ഷംസീർ