മക്കയിലേക്കും മദീനയിലേക്കുമുള്ള ബുള്ളറ്റ് ട്രെയിനുകൾ ഓടിക്കാൻ ഇനി വനിതകളും

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

മക്കയെയും മദീനയെയും ബന്ധിപ്പിക്കുന്ന ഹറമൈൻ ബുള്ളറ്റ് ട്രെയിനുകൾ ഓടിക്കാൻ ഇനി വനിതകളും. ​ഗതാ​ഗതമന്ത്രി സാലിഹ് അൽ ജാസിർ ആണ് ഇക്കാര്യം അറിയിച്ചത്. തൊഴിൽ പ്രാദേശികവൽക്കരണത്തിന്റെ ഭാ​ഗമായാണ് നടപടിയെന്നും അദ്ദേഹം പറഞ്ഞു. മാർച്ചിൽ ആരംഭിച്ച പരിശീലനത്തിന്റെ ആദ്യഘട്ടം 31 സൗദി വനിതകൾ ഇതിനകം വിജയകരമായി പൂർത്തിയാക്കിയതായും മന്ത്രി അറിയിച്ചു. തിയറി പരിശീലനം, പൊതുവിജ്ഞാനം, ​ഗതാ​ഗത, സുരക്ഷാ മാനദണ്ഡങ്ങൾ എന്നിവയിലായി 483 മണിക്കൂർ പരിശീലനമാണ് ഇവർക്ക് നൽകിയിരുന്നത്. 

ശമ്പളത്തോടു കൂടിയുള്ള ഒരുവർഷത്തെ പരിശീലനത്തിനു ശേഷമാവും വനിതകൾ ഹറമൈൻ ബുള്ളറ്റ് ട്രെയിനുകൾ ഓടിക്കുക. വനിതാ ട്രെയിൻ ഡ്രൈവർമാർക്കു വേണ്ടി ഈ വർഷം ഫെബ്രുവരിയിൽ നടത്തിയ പരസ്യത്തെ തുടർന്ന് 28000 പേരാണ് അപേക്ഷ നൽകിയത്. 

​ഗതാ​ഗതമേഖലയിലെ 18 തരം ജോലികൾ സൗദി അടുത്ത വർഷത്തോടെ സ്വദേശികൾക്കു മാത്രമായി പരിമിതപ്പെടുത്തുകയാണ്. പൈലറ്റ്, എയർ കൺട്രോളർ, കോ പൈലറ്റ് തുടങ്ങിയവയും സൗദിവൽക്കരിക്കാനുള്ള നീക്കത്തിലാണ് മന്ത്രാലയമെന്ന് മന്ത്രി പറഞ്ഞു.