യു.ഡി.എഫിൽ തിരുത്തൽ ചേരിയോ? വി.ഡി. സതീശനെതിരെ കോൺഗ്രസിൽ അമർഷം പുകയുന്നു; വിട്ടുവീഴ്ചയ്ക്കില്ലാതെ അടൂർ പ്രകാശ്

തിരുവനന്തപുരം: യു.ഡി.എഫ് കൺവീനർ അടൂർ പ്രകാശ് എം.പി നടത്തിയ അസാധാരണ വാ വാർത്താസമ്മേളനത്തിന് പിന്നാലെ ഭരണപക്ഷമായ കോൺഗ്രസിലും യു.ഡി.എഫിലും ഭിന്നത രൂക്ഷമാകുന്നു. മുഖ്യമന്ത്രി വി.ഡി. സതീശന്റെ പ്രവർത്തനശൈലിക്കെതിരെയും ആലോചനകളില്ലാത്ത ഏകപക്ഷീയമായ തീരുമാനങ്ങൾക്കെതിരെയും പാർട്ടിയിലെ കൂടുതൽ നേതാക്കൾ രഹസ്യമായി രംഗത്തെത്തിയിട്ടുണ്ട്. തദ്ദേശ ഉപതിരഞ്ഞെടുപ്പിൽ പ്രതീക്ഷിച്ച വിജയം നേടാനാകാതെ പോയതിന് കാരണം സതീശന്റെ നിലപാടുകളാണെന്ന വിലയിരുത്തൽ പാർട്ടിയിലുണ്ട്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

അതേസമയം, വ്യാഴാഴ്ച ഉന്നയിച്ച കടുത്ത വിമർശനങ്ങളിൽ ഇന്നും ഉറച്ചുനിൽക്കുകയാണ് കൺവീനർ അടൂർ പ്രകാശ്.

പറഞ്ഞതിൽ ഉറച്ച് അടൂർ പ്രകാശ്; എ.ഐ.സി.സിയെ കാണും

“താൻ ആരുടെയും പിന്തുണ പ്രതീക്ഷിച്ചല്ല സംസാരിച്ചത്. അനുഭവത്തിന്റെ വെളിച്ചത്തിലുള്ള പ്രതികരണമാണ് നടത്തിയത്. എനിക്ക് പറയാനുള്ള കാര്യങ്ങൾ എ.ഐ.സി.സിയോട് (AICC) നേരിട്ട് ബോധ്യപ്പെടുത്തും. അത് എന്റെ കടമയും ഉത്തരവാദിത്തവുമാണ്,” എന്ന് അടൂർ പ്രകാശ് ഇന്നും മാധ്യമങ്ങളോട് ആവർത്തിച്ചു.

തിരുത്തൽ ചേരിയാണോ രൂപപ്പെടുന്നത് എന്ന ചോദ്യത്തിന് “അത് എങ്ങനെ വേണമെങ്കിലും വ്യാഖ്യാനിക്കാം” എന്നായിരുന്നു അദ്ദേഹത്തിന്റെ മറുപടി. ക്ലിഫ് ഹൗസിൽ ഒരൊറ്റ തവണ മാത്രമാണ് മുന്നണി യോഗം ചേർന്നത്. ബോർഡ്, കോർപ്പറേഷൻ നിയമനങ്ങളിലും കൺവീനറെപ്പോലും അറിയിക്കാതെ എം.കെ. മുനീറിന് ഭരണപരിഷ്കാര കമ്മീഷൻ അധ്യക്ഷപദവി നൽകിയതിലും തനിക്ക് കടുത്ത വിയോജിപ്പുണ്ടെന്ന് അദ്ദേഹം വ്യക്തമാക്കി.

മുഖ്യമന്ത്രിയുടെ ഓഫീസിന് മാത്രം അധികാരം; നേതാക്കളിൽ കടുത്ത അതൃപ്തി

മുഖ്യമന്ത്രിയുടെ ഓഫീസ് കേന്ദ്രീകരിച്ച് മാത്രമാണ് എല്ലാ സുപ്രധാന തീരുമാനങ്ങളും എടുക്കുന്നതെന്ന പരാതി കോൺഗ്രസ് ഗ്രൂപ്പ് സമവാക്യങ്ങൾക്കതീതമായി ഉയരുന്നുണ്ട്.

1. കൂടിയാലോചനകളുടെ അഭാവം: അക്കാദമികളുടെ ഭാരവാഹിത്വം നിശ്ചയിച്ചതിലും അർഹരായ പല മുതിർന്ന നേതാക്കളെയും മാറ്റിനിർത്തിയതായി ആക്ഷേപമുണ്ട്.

2. ചാർട്ടേഡ് വിമാനയാത്ര വിവാദം: മുഖ്യമന്ത്രി വി.ഡി. സതീശന്റെ ചാർട്ടേഡ് വിമാനയാത്ര ജനങ്ങൾക്ക് മുന്നിൽ കൃത്യമായി വിശദീകരിക്കാൻ സർക്കാരിന് സാധിച്ചിട്ടില്ലെന്ന് നേതാക്കൾ ചൂണ്ടിക്കാണിക്കുന്നു.

3. മുന്നണി ഏകോപനം: മുന്നണി യോഗങ്ങൾ കൃത്യമായി വിളിച്ചുചേർക്കാൻ ചെയർമാൻ കൂടിയായ മുഖ്യമന്ത്രി മുൻകൈ എടുക്കുന്നില്ല.

അടൂർ പ്രകാശ് വിഷയം പരസ്യമാക്കിയ ശൈലിയോട് ചില മുതിർന്ന നേതാക്കൾക്ക് വിയോജിപ്പുണ്ടെങ്കിലും, അദ്ദേഹം ഉന്നയിച്ച വിഷയങ്ങളിൽ വലിയൊരു വിഭാഗം നേതാക്കളുടെയും പിന്തുണയുണ്ടെന്നാണ് റിപ്പോർട്ടുകൾ.

എ.ഐ.സി.സിക്ക് കത്ത് നൽകും; തിരിച്ചടിക്കാൻ സതീശൻ വിഭാഗം

തനിക്ക് പരാതിയുള്ള കാര്യങ്ങൾ ചൂണ്ടിക്കാട്ടി അടൂർ പ്രകാശ് ഉടൻ തന്നെ ഹൈക്കമാൻഡിന് ഔദ്യോഗികമായി കത്തയക്കുമെന്നാണ് വിവരം. എ.ഐ.സി.സി ജനറൽ സെക്രട്ടറി കെ.സി. വേണുഗോപാലിന്റെ പ്രതികരണങ്ങളിലും വി.ഡി. സതീശന്റെ ശൈലിയോടുള്ള ചില വിയോജിപ്പുകളുടെ സൂചനയുണ്ടെന്ന് രാഷ്ട്രീയ നിരീക്ഷകർ കരുതുന്നു.

അതേസമയം, കെ.പി.സി.സി ആസ്ഥാനത്ത് വാർത്താസമ്മേളനം വിളിച്ച് സർക്കാരിനെ പ്രതിക്കൂട്ടിലാക്കിയ കൺവീനറുടെ നീക്കത്തിനെതിരെ എ.ഐ.സി.സിക്ക് കത്ത് നൽകാനാണ് വി.ഡി. സതീശനെ അനുകൂലിക്കുന്ന വിഭാഗത്തിന്റെ നീക്കം. യു.ഡി.എഫ് സർക്കാരിന്റെ ആദ്യ നാളുകളിൽ തന്നെ പുറത്തുവന്ന ഈ പടലപ്പിണക്കം വരുംദിവസങ്ങളിൽ കേരള രാഷ്ട്രീയത്തിൽ വലിയ കൊടുങ്കാറ്റായി മാറുമെന്നുറപ്പാണ്.

Tags: Adoor Prakash, VD Satheesan, UDF Convener Adoor Prakash, Congress Kerala News, Kerala Politics News, UDF Rift Kerala, AICC Congress, KPCC News, Kerala News Today

News Tag Live യുട്യൂബ് ചാനല്‍ Subscribe ചെയ്യുക