വെടിനിര്‍ത്തല്‍ പാലിക്കുന്നുവെന്ന് ഉറപ്പാക്കാന്‍ 200 യുഎസ് സൈനികര്‍ ഇസ്രായേലിലേക്ക്

US troops monitoring Gaza ceasefire ഗസയിലെ യുദ്ധം അവസാനിപ്പിക്കാനുള്ള കരാര്‍ ഇസ്രായേല്‍ പാലിക്കുന്നുവെന്ന് ഉറപ്പാക്കാന്‍ അമേരിക്കന്‍ സൈനിക ഇടപെടലുണ്ടാവും. ഈ ഉറപ്പിന്മേലാണ് ഹമാസ് കരാറില്‍ ഒപ്പുവച്ചതെന്നാണ് അറിയുന്നത്. ഇതിനായി 200 അമേരിക്കന്‍ സൈനികരെ താല്‍ക്കാലികമായി ഇസ്രായേലില്‍ വിന്യസിക്കുമെന്ന് പെന്റഗണ്‍ വൃത്തങ്ങളെ ഉദ്ധരിച്ച് അല്‍ജസീറ റിപോര്‍ട്ട് ചെയ്തു.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

ഈ ഉടമ്പടിക്ക് സമ്മതിക്കാന്‍ ഹമാസിനെ പ്രേരിപ്പിച്ച സുപ്രധാന സുരക്ഷാ ഉറപ്പ് ഇതാണ്. ഇതിന മുമ്പ് പലതവണ ഇസ്രായേല്‍ കരാര്‍ ഏക പക്ഷീയമായി ലംഘിച്ച പശ്ചാത്തലത്തിലാണ് ഇങ്ങിനെയൊരു ഉറപ്പ്.

സമാധാന പാലനത്തിനായി 200 യുഎസ് സൈനികര്‍ ഇസ്രായേലിലേക്ക് പുറപ്പെട്ടതായി പെന്റഗണ്‍ അറിയിച്ചു. വെടിനിര്‍ത്തല്‍ നടപ്പാക്കുക എന്നതാണ് അവരുടെ ദൗത്യം.

യുഎസ് സൈന്യത്തിന്റെ സെന്‍ട്രല്‍ കമാന്‍ഡ് (CENTCOM) ആണ് ഈ വെടിനിര്‍ത്തല്‍ നിരീക്ഷണത്തിനായി 200 സൈനികരടങ്ങുന്ന ദൗത്യസേന രൂപീകരിക്കുന്നത്. ഈ ദൗത്യസേന സിവില്‍-സൈനിക ഏകോപന കേന്ദ്രം (Civil-Military Coordination Center – CMCC) എന്ന പേരിലാകും അറിയപ്പെടുക എന്ന് ഒരു യുഎസ് ഉദ്യോഗസ്ഥന്‍ പറഞ്ഞു.

ഈ യുഎസ് സൈനികര്‍ ഗസയില്‍ കാലുകുത്തില്ലെന്ന് പെന്റഗണ്‍ വ്യക്തമാക്കി. പകരം, ഖത്തര്‍, ഈജിപ്ത്, യുഎഇ, തുര്‍ക്കി തുടങ്ങിയ രാജ്യങ്ങളില്‍ നിന്നുള്ള സൈനികര്‍ യുഎസ് സേനയോടൊപ്പം ഉണ്ടാകും. മറ്റ് രാജ്യങ്ങളില്‍ നിന്നുള്ള ഈ സംയുക്ത സേനയായിരിക്കും ഒരുപക്ഷേ ഗസയിലേക്ക് പോകുക.

സുരക്ഷാ സഹായവും മാനുഷിക സഹായവും ഉൾപ്പെടെയുള്ള സഹായങ്ങൾ ഗാസയിലേക്ക് എത്തിക്കുന്നത് സുഗമമാക്കുക എന്നതാണ് CMCC-യുടെ ചുമതലയെന്ന് യുഎസ് ഉദ്യോഗസ്ഥർ റിപ്പോർട്ടർമാരോട് പറഞ്ഞു.

ഈ ദൗത്യസേനയുടെ ഭാഗമായി വിന്യസിക്കപ്പെടുന്ന യുഎസ് സൈനികർക്ക് ആസൂത്രണം, സുരക്ഷ, ലോജിസ്റ്റിക്സ്, എഞ്ചിനീയറിംഗ് എന്നീ മേഖലകളിൽ വൈദഗ്ധ്യമുണ്ടെന്ന് റോയിട്ടേഴ്സ് വാർത്താ ഏജൻസി റിപ്പോർട്ട് ചെയ്യുന്നു.

ഇസ്രായേൽ സൈന്യവും മറ്റ് സുരക്ഷാ സേനകളും വെടിനിർത്തൽ കരാർ നടപ്പാക്കുന്ന സമയത്ത് (ഇസ്രായേൽ സൈന്യം ഗാസയിൽ നിന്ന് പിൻവാങ്ങുകയും ഹമാസ് ബന്ദികളെ വിട്ടയക്കുകയും ചെയ്യുന്ന ഈ സന്ദർഭത്തിൽ) ഏറ്റുമുട്ടലുകൾ ഒഴിവാക്കുന്നുണ്ടെന്ന് ഉറപ്പാക്കാനും ഈ ഏകോപന കേന്ദ്രം നിരീക്ഷണം നടത്തും.

സമാധാന ശ്രമങ്ങളില്‍ വലിയ മുന്നേറ്റമുണ്ടായിട്ടുണ്ടെങ്കിലും ഇത് ഇപ്പോഴും വളരെ ശ്രദ്ധയോടെ കൈകാര്യം ചെയ്യേണ്ട സമയമാണെന്നും കാര്യങ്ങള്‍ പലരീതിയില്‍ വഴിതെറ്റി പോകാന്‍ സാധ്യതയുണ്ടെന്നും പെന്റഗണ്‍ വൃത്തങ്ങള്‍ മുന്നറിയിപ്പ് നല്‍കി.