80 ഇന്ത്യൻ ജീവനക്കാരെ അഞ്ച് മിനിറ്റ് ഗൂഗിൾ മീറ്റ് വഴി പിരിച്ചുവിട്ട് യുഎസ് കമ്പനി

80 ഇന്ത്യൻ ജീവനക്കാരെ വെറും അഞ്ച് മിനിറ്റ് നീണ്ട ഗൂഗിൾ മീറ്റ് വഴി കൂട്ടത്തോടെ പിരിച്ചുവിട്ടതായി ആരോപണം. യുഎസ് ആസ്ഥാനമായ ധനകാര്യ സ്ഥാപനത്തിലെ ഇന്ത്യൻ കസ്റ്റമർ സപ്പോർട്ട് വിഭാഗത്തിലെ ജീവനക്കാരെയാണ് മുന്നറിയിപ്പില്ലാതെ ജോലിയിൽ നിന്ന് ഒഴിവാക്കിയതെന്നാണ് റിപ്പോർട്ട്.
സംഭവത്തെക്കുറിച്ച് ജീവനക്കാരിലൊരാൾ സമൂഹമാധ്യമത്തിൽ പങ്കുവച്ച കുറിപ്പിലാണ് വിവരങ്ങൾ പുറത്തുവന്നത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

‘ഓപ്പറേഷണൽ കാരണങ്ങൾ’ ചൂണ്ടിക്കാട്ടി അന്നേ ദിവസം ജീവനക്കാരോട് വീട്ടിലിരുന്ന് ജോലി ചെയ്യാൻ നിർദേശിച്ചിരുന്നു. വൈകിട്ട് 6.30ന് ആരംഭിച്ച ഷിഫ്റ്റിൽ മൂന്ന് മണിക്കൂർ പിന്നിട്ടപ്പോഴാണ് രാത്രി 9.30ഓടെ മാനേജ്‌മെന്റ് ഗൂഗിൾ മീറ്റിലേക്ക് ജീവനക്കാരെ ക്ഷണിച്ചത്.

മീറ്റിങ്ങിനിടെ ഇന്ത്യൻ കസ്റ്റമർ സർവീസ് ടീമിലെ മുഴുവൻ ജീവനക്കാരെയും പിരിച്ചുവിടുകയാണെന്ന് അറിയിക്കുകയായിരുന്നു. ഏകദേശം 80 ജീവനക്കാരുടെ ജോലി അഞ്ച് മിനിറ്റ് നീണ്ട ഓൺലൈൻ മീറ്റിങ്ങിലൂടെ അവസാനിപ്പിച്ചതായി ജീവനക്കാരൻ ആരോപിച്ചു.

ഇന്ത്യൻ ടീമിൽ നിന്ന് പ്രതീക്ഷിച്ച നിലവാരത്തിലുള്ള ജോലി ലഭിക്കുന്നില്ലെന്നായിരുന്നു പിരിച്ചുവിടലിന് മാനേജ്‌മെന്റ് നൽകിയ കാരണമെന്നാണ് ജീവനക്കാരന്റെ ആരോപണം. എന്നാൽ, ഈ വിശദീകരണത്തോട് ജീവനക്കാരൻ വിയോജിപ്പ് രേഖപ്പെടുത്തി. ജോലി നഷ്ടപ്പെടുമെന്ന ആശങ്കയിൽ ഇന്ത്യൻ ജീവനക്കാർ കൂടുതൽ സമയം ജോലി ചെയ്തിരുന്നുവെന്നും അദ്ദേഹം പറഞ്ഞു.

പിരിച്ചുവിടലിന് ഉത്തരവാദിയായ സ്ഥാപനമായി ജീവനക്കാരൻ സമൂഹമാധ്യമ പ്രതികരണത്തിൽ ബ്ലൂവൈൻ (Bluevine) എന്ന ഡിജിറ്റൽ ബാങ്കിങ് പ്ലാറ്റ്‌ഫോമിന്റെ പേരും പരാമർശിച്ചിട്ടുണ്ട്. സംഭവത്തെ തുടർന്ന് നിരവധി സമൂഹമാധ്യമ ഉപയോക്താക്കൾ ആശങ്കയും നിരാശയും രേഖപ്പെടുത്തി.

ALSO READ: വിവാഹം കഴിഞ്ഞ് 17-ാം ദിവസം ഇന്ത്യൻ യുവാവ് അമേരിക്കയിൽ മരിച്ച നിലയിൽ

News Tag Live യുട്യൂബ് ചാനല്‍ Subscribe ചെയ്യുക