അസ്സലാമു അലൈക്കും’ എന്ന് ആശംസിച്ചതിന് ഐപിഎസ് ഉദ്യോഗസ്ഥയ്ക്ക് സ്ഥലംമാറ്റം; ബംഗാളിൽ വിവാദം രൂക്ഷം

കൊൽക്കത്ത: സിവിൽ സർവീസ് ഉദ്യോഗാർത്ഥികൾക്കായി പങ്കുവെച്ച പ്രചോദനാത്മക വീഡിയോയിൽ ഇസ്ലാമിക ആശംസകൾ ഉപയോഗിച്ചതിന് പിന്നാലെ വനിതാ ഐപിഎസ് ഉദ്യോഗസ്ഥയ്ക്ക് പെട്ടെന്ന് സ്ഥലംമാറ്റം. ഖരഗ്പൂർ അഡീഷണൽ സൂപ്രണ്ട് ഓഫ് പോലീസ് (എഎസ്പി) ആയിരുന്ന ബുഷ്‌റ ബാനോയെ ആണ് പദവിയിൽ ചുമതലയേറ്റ് രണ്ടര മാസത്തിനകം പശ്ചിമ ബംഗാൾ സർക്കാർ സ്ഥലംമാറ്റിയത്. സ്റ്റേറ്റ് ആംഡ് പോലീസിന്റെ നാലാം ബറ്റാലിയൻ ഡെപ്യൂട്ടി കമാൻഡന്റായാണ് സെപ്റ്റംബർ 14-ലെ ഉത്തരവ് പ്രകാരം ഇവരെ മാറ്റിനിയമിച്ചിരിക്കുന്നത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

‘പൊതുതാൽപ്പര്യം’ മുൻനിർത്തിയാണ് സ്ഥലംമാറ്റമെന്നാണ് ഔദ്യോഗിക വിശദീകരണമെങ്കിലും, തീവ്ര ഹൈന്ദവ സംഘടനകളുടെ എതിർപ്പിനെ തുടർന്നാണ് ഈ നടപടിയെന്നാണ് ആരോപണം ഉയരുന്നത്.

ALSO READ: തത്സമയ ശബ്ദ സംഭാഷണത്തിന് വിപ്ലവകരമായ മാറ്റം: ഗൂഗിൾ ‘ജെമിനി 3.8 ലൈവ്’ മോഡലുകൾ അവതരിപ്പിച്ചു

യൂട്ട്യൂബിൽ പങ്കുവെച്ച വീഡിയോയുടെ തുടക്കത്തിലാണ് ബുഷ്‌റ ബാനോ ‘അസ്സലാമു അലൈക്കും’ എന്ന് ആശംസിച്ചത്. തുടർന്ന് താൻ സിവിൽ സർവീസിലേക്ക് എത്തിയ വഴികളും അലിഗഡ് മുസ്ലിം യൂണിവേഴ്സിറ്റിയിലെ (എഎംയു) റെസിഡൻഷ്യൽ കോച്ചിംഗ് അക്കാദമി തയ്യാറെടുപ്പുകൾക്ക് എങ്ങനെ സഹായിച്ചുവെന്നും അവർ വിശദീകരിച്ചു. കൂടുതൽ വിദ്യാർത്ഥികൾ ഇത്തരം സ്ഥാപനങ്ങളുടെ സേവനം പ്രയോജനപ്പെടുത്തണമെന്നും ദൈവം അനുഗ്രഹിച്ചാൽ (‘ഇൻഷാ അള്ളാ’) കൂടുതൽ പേർ മല്‍സര പരീക്ഷകളിൽ വിജയിച്ച് രാജ്യത്തെ സേവിക്കുമെന്നും അവർ പറയുകയുണ്ടായി.

ഉത്തർപ്രദേശിലെ കനൗജ് സ്വദേശിയായ ബുഷ്‌റ, എഎംയുവിൽ നിന്ന് പിഎച്ച്ഡി പൂർത്തിയാക്കി ഗൾഫിൽ കുറച്ചുകാലം ജോലി ചെയ്ത ശേഷമാണ് സിവിൽ സർവീസിലേക്ക് എത്തുന്നത്. 2021-ലെ യുപിഎസ്സി പരീക്ഷ വിജയിച്ചാണ് അവർ ഐപിഎസ് സ്വന്തമാക്കിയത്.

എന്നാൽ, വീഡിയോ പുറത്തുവന്നതിന് പിന്നാലെ ബുഷ്‌റയ്ക്കെതിരെ ചില വലതുപക്ഷ സോഷ്യൽ മീഡിയ പ്രൊഫൈലുകൾ പ്രചാരണം ആരംഭിച്ചു. ഔദ്യോഗിക പദവിയിലിരിക്കുന്ന ഒരു ഉദ്യോഗസ്ഥ ഇത്തരം ഇസ്ലാമിക പദപ്രയോഗങ്ങൾ നടത്തുന്നത് നിഷ്പക്ഷതയ്ക്ക് നിരക്കുന്നതല്ലെന്നായിരുന്നു ഇവരുടെ വാദം.

അതിനിടെ, ഉദ്യോഗസ്ഥയെ പിന്തുണയ്ക്കുന്നതിന് പകരം സ്ഥലംമാറ്റിയ ബംഗാൾ സർക്കാരിന്റെ നടപടിയെ വിമർശിച്ച് പ്രതിപക്ഷ നേതാക്കളും രംഗത്തെത്തി. ഭരണഘടനാവിരുദ്ധമായോ അസാംസ്‌കാരികമായോ ഒന്നും പറയാത്ത ഉദ്യോഗസ്ഥരെ വ്യക്തിപരമായ വിശ്വാസങ്ങളുടെയോ ശീലങ്ങളുടെയോ പേരിൽ ശിക്ഷിക്കരുതെന്ന് തൃണമൂൽ കോൺഗ്രസ് നേതാവ് കുനാൽ ഘോഷ് പ്രതികരിച്ചു. ഐപിഎസ് അസോസിയേഷൻ വിഷയത്തിൽ ഇടപെടണമെന്ന് കോൺഗ്രസ് എംപി ഇമ്രാൻ പ്രതാപ്ഗഢിയും ആവശ്യപ്പെട്ടു.

Tags: Bushra Bano IPS, IPS Officer Transfer News, West Bengal Police Controversy, Assalamu Alaikum Row, West Bengal News, Indian Police Service

News Tag Live യുട്യൂബ് ചാനല്‍ Subscribe ചെയ്യുക