അക്ഷയ് കുമാറിന്റെ മകളോട് ‘നഗ്‌നചിത്രം’ ആവശ്യപ്പെട്ടു: മാസങ്ങള്‍ക്ക് ശേഷം ആദ്യ അറസ്റ്റ് രേഖപ്പെടുത്തി പോലീസ്

മുംബൈ: ബോളിവുഡ് താരം അക്ഷയ് കുമാറിന്റെ 13 വയസ്സുള്ള മകള്‍ ഓണ്‍ലൈന്‍ ഗെയിമിംഗിനിടെ സൈബര്‍ പീഡനത്തിന് ഇരയായ കേസില്‍ മഹാരാഷ്ട്ര സൈബര്‍ വിഭാഗം ആദ്യ അറസ്റ്റ് രേഖപ്പെടുത്തി. ഗെയിമിംഗ് പ്ലാറ്റ്ഫോമിലൂടെ പെണ്‍കുട്ടിയെ ശല്യം ചെയ്ത പ്രതിയെ ഡിജിറ്റല്‍ ട്രാക്കിംഗിലൂടെയാണ് പോലീസ് പിടികൂടിയത്.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

കഴിഞ്ഞ വര്‍ഷം ഒക്ടോബറില്‍ മുംബൈയിലെ പോലീസ് ആസ്ഥാനത്ത് നടന്ന സൈബര്‍ ബോധവല്‍ക്കരണ മാസത്തിന്റെ ഉദ്ഘാടന ചടങ്ങിലാണ് അക്ഷയ് കുമാര്‍ തന്റെ കുടുംബത്തിനുണ്ടായ ഈ ദുരനുഭവം വെളിപ്പെടുത്തിയത്.

സംഭവത്തെക്കുറിച്ച് അക്ഷയ് കുമാര്‍ പറഞ്ഞത്:
‘എന്റെ മകള്‍ ഒരു വീഡിയോ ഗെയിം കളിക്കുകയായിരുന്നു. അപരിചിതരായ ആളുകള്‍ക്കൊപ്പം കളിക്കാന്‍ കഴിയുന്ന തരം ഗെയിമായിരുന്നു അത്. കളി തുടങ്ങുമ്പോള്‍ വളരെ മാന്യമായ സന്ദേശങ്ങളാണ് വന്നിരുന്നത്. ‘നന്നായി കളിക്കുന്നു’, ‘നന്ദി’ എന്നിങ്ങനെയുള്ള സന്ദേശങ്ങള്‍ കണ്ട് മാന്യമായ പെരുമാറ്റമാണെന്ന് തോന്നും. എന്നാല്‍ പെട്ടെന്ന് അയാള്‍ എവിടെ നിന്നാണെന്ന് ചോദിച്ചു. ‘മുംബൈ’ എന്ന് മകള്‍ മറുപടി നല്‍കി.

പിന്നീട് മകള്‍ ആണാണോ പെണ്ണാണോ എന്നായി ചോദ്യം. ‘പെണ്‍കുട്ടി’ എന്ന് മറുപടി നല്‍കിയതോടെ അയാള്‍ തന്റെ നഗ്‌നചിത്രം അയച്ചുതരുമോ എന്ന് ചോദിച്ചു. ഉടന്‍ തന്നെ മകള്‍ ഗെയിം ഓഫ് ചെയ്യുകയും അമ്മയോട് കാര്യം പറയുകയും ചെയ്തു. അവള്‍ ഇക്കാര്യം വീട്ടില്‍ അറിയിച്ചത് വലിയ കാര്യമാണ്. ഇങ്ങനെയുള്ള ചതിക്കുഴികളില്‍ പലപ്പോഴും കുട്ടികള്‍ വീണുപോകാറുണ്ട്. ഇത് പിന്നീട് ബ്ലാക്ക്മെയിലിംഗിലേക്കും ആത്മഹത്യകളിലേക്കും വരെ നയിക്കുന്നു,’ അക്ഷയ് കുമാര്‍ പറഞ്ഞു.

നടപടി ആവശ്യപ്പെട്ട് താരം

സൈബര്‍ കുറ്റകൃത്യങ്ങള്‍ തെരുവിലെ കുറ്റകൃത്യങ്ങളെക്കാള്‍ വര്‍ദ്ധിച്ചുവരികയാണെന്നും ഇതിനെതിരെ സ്‌കൂളുകളില്‍ ആഴ്ചയിലൊരിക്കല്‍ ബോധവല്‍ക്കരണ ക്ലാസുകള്‍ നടത്തണമെന്നും അക്ഷയ് കുമാര്‍ മുഖ്യമന്ത്രി ദേവേന്ദ്ര ഫഡ്നാവിസിനോട് അഭ്യര്‍ത്ഥിച്ചു.

ALSO READ: ചെറുവണ്ണൂരിലെ ദര്‍സ് ഭീകരവാദ കേന്ദ്രമെന്ന് ഹിന്ദുഐക്യവേദി; വിദ്വേഷ പ്രചാരണത്തിന് തീ പകരാന്‍ ശശികല എത്തുന്നു

താരം ഈ സംഭവം വെളിപ്പെടുത്തിയതിന് പിന്നാലെയാണ് സൈബര്‍ സെല്‍ അന്വേഷണം ഊര്‍ജ്ജിതമാക്കിയത്. സാങ്കേതിക വിശകലനത്തിലൂടെ പ്രതിയെ തിരിച്ചറിയുകയും അറസ്റ്റ് ചെയ്യുകയുമായിരുന്നു. ഇയാള്‍ സമാനമായ രീതിയില്‍ മറ്റ് കുട്ടികളെയും ലക്ഷ്യം വെച്ചിട്ടുണ്ടോ എന്ന് പോലീസ് അന്വേഷിച്ചു വരികയാണ്.

മുംബൈയിലെ കോളേജുകളില്‍ സംഘടിപ്പിച്ച സൈബര്‍ ബോധവല്‍ക്കരണ പരിപാടികളില്‍ അക്ഷയ് കുമാറിന്റെ ഈ വീഡിയോ സന്ദേശം പ്രദര്‍ശിപ്പിച്ചിരുന്നു. ഓണ്‍ലൈന്‍ സാമ്പത്തിക തട്ടിപ്പുകള്‍, സോഷ്യല്‍ മീഡിയ സുരക്ഷ, ഫിഷിംഗ്, സൈബര്‍ ബുള്ളിയിംഗ് എന്നിവയെക്കുറിച്ച് വിദ്യാര്‍ത്ഥികളെ ബോധവല്‍ക്കരിക്കാനാണ് ഈ സെഷനുകള്‍ ലക്ഷ്യമിടുന്നത്.