07
Jun 2026
Sun
ബെയ്റൂട്ട്: തെക്കന് ലെബനനിലുടനീളം ഇസ്രായേല് നടത്തിയ ആക്രമണങ്ങളില് ഉന്നത സൈനിക ഉദ്യോഗസ്ഥര് ഉള്പ്പെടെ പന്ത്രണ്ടോളം പേര് കൊല്ലപ്പെട്ടു. ഖര്ദാലി-നബാത്തിയ റോഡില് സൈനിക വാഹനത്തിന് നേരെ ഇസ്രായേല് നടത്തിയ വ്യോമാക്രമണത്തില് ഒരു ബ്രിഗേഡിയര് ജനറലും ക്യാപ്റ്റനും ഒരു സൈനികനും കൊല്ലപ്പെട്ടതായി ലെബനന് സൈന്യം അറിയിച്ചു. അമേരിക്കയുടെ മധ്യസ്ഥതയില് നടന്ന ചര്ച്ചകള്ക്കൊടുവില് ഇരുരാജ്യങ്ങളും ഉപാധികളോടെയുള്ള വെടിനിര്ത്തല് കരാറിലെത്തി ദിവസങ്ങള്ക്കകമാണ് വീണ്ടും ഇസ്രായേല് ആക്രമണം.
 |
|
എന്നാല് ശനിയാഴ്ച നടന്ന ആക്രമണം ‘സജീവമായ ഒരു യുദ്ധമേഖലയില്’ (active combat zone) വെച്ചായിരുന്നുവെന്നും ഇത്തരം മേഖലകളിലെ നീക്കങ്ങള്ക്ക് തങ്ങളുടെ മുന്കൂര് അനുമതി ആവശ്യമാണെന്നുമാണ് ഇസ്രായേല് സൈന്യത്തിന്റെ വാദം. സംഭവത്തെക്കുറിച്ച് അന്വേഷണം നടന്നുവരികയാണെന്നും അവര് കൂട്ടിച്ചേര്ത്തു. അതേസമയം, പരിഹാരത്തിനായുള്ള എല്ലാ ശ്രമങ്ങളെയും തകര്ക്കാനാണ് ഇസ്രായേല് ബോധപൂര്വ്വം ആവര്ത്തിച്ച് ആക്രമണം നടത്തുന്നതെന്ന് ലെബനന് സൈന്യം കുറ്റപ്പെടുത്തി.
ആക്രമണം ലെബനന്റെ പരമാധികാരത്തിന്മേലും അന്താരാഷ്ട്ര നിയമങ്ങള്ക്ക് മേലുമുള്ള നഗ്നമായ ലംഘനമാണെന്ന് ലെബനന് പ്രസിഡന്റ് ജോസഫ് ഔന് ആരോപിച്ചു. ഇതൊരു ക്രൂരമായ കുറ്റകൃത്യവും ലെബനന് നേരെയും അവിടുത്തെ ജനങ്ങള്ക്ക് നേരെയുമുള്ള ആക്രമണവുമാണെന്ന് ലെബനന് പ്രധാനമന്ത്രി നവാഫ് സലാം വിശേഷിപ്പിച്ചു. ആക്രമണത്തില് കൊല്ലപ്പെട്ട ബ്രിഗേഡിയര് ജനറല് വസ്സാം സാബ്ര, ക്യാപ്റ്റന് എലി ഖൗരി, സൈനികന് ഹുസൈന് ഗോസല് എന്നിവരുടെ കുടുംബാംഗങ്ങളുടെയും സഹപ്രവര്ത്തകരുടെയും ദുഃഖത്തില് പങ്കുചേരുന്നതായി പ്രധാനമന്ത്രി അറിയിച്ചു.
യു.എസ്-ഇസ്രായേല്-ഇറാന് തര്ക്കങ്ങള് പരിഹരിക്കുന്നതിനായുള്ള മധ്യസ്ഥ ചര്ച്ചകളില് പങ്കെടുക്കാന് ലെബനന് സൈനിക മേധാവി ജനറല് റുഡോള്ഫ് ഹൈക്കല് പാകിസ്താനിലേക്ക് തിരിച്ചിട്ടുണ്ട്. പാകിസ്താന് ഫീല്ഡ് മാര്ഷല് ആസിം മുനീറുമായി അദ്ദേഹം ചര്ച്ച നടത്തും.
അന്താരാഷ്ട്ര തലത്തില് ശക്തമായ പ്രതിഷേധം
ഇസ്രായേലിന്റെ ആക്രമണത്തെ ‘ക്രൂരമായ കുറ്റകൃത്യം’ എന്ന് വിശേഷിപ്പിച്ച ലെബനനിലെ സായുധ സംഘടനയായ ഹിസ്ബുള്ള, വാഷിംഗ്ടണില് ശത്രുവിന്റെ ആവശ്യങ്ങള്ക്ക് പൂര്ണ്ണമായി കീഴടങ്ങിയതിലൂടെ ലെബനന് സര്ക്കാര് രാജ്യത്തെ രക്തച്ചൊരിച്ചിലിലേക്ക് തള്ളിവിട്ടിരിക്കുകയാണെന്ന് ആരോപിച്ചു. ലെബനന് എന്ന രാജ്യത്തെ പൂര്ണ്ണമായും ഇല്ലാതാക്കാനാണ് ഇസ്രായേല് ശ്രമിക്കുന്നതെന്ന് വ്യക്തമാക്കുന്നതാണ് ഈ കൊലപാതകങ്ങളെന്ന് ഇറാന്റെ വിദേശകാര്യ മന്ത്രാലയ വക്താവ് ഇസ്മായില് ബഗായ് പറഞ്ഞു.
സൗദി അറേബ്യ, ജോര്ദാന്, ഖത്തര് തുടങ്ങിയ പ്രാദേശിക രാജ്യങ്ങളും ആക്രമണത്തെ ശക്തമായി അപലപിച്ചു. ലെബനന്റെ പരമാധികാരത്തിന്മേലുള്ള കടന്നുകയറ്റം അംഗീകരിക്കാനാവില്ലെന്ന് സൗദി വ്യക്തമാക്കിയപ്പോള്, ഐക്യരാഷ്ട്രസഭയുടെ സുരക്ഷാ കൗണ്സില് പ്രമേയം 1701 പൂര്ണ്ണമായി നടപ്പിലാക്കാന് അന്താരാഷ്ട്ര സമൂഹം ഇസ്രായേലിനോട് ആവശ്യപ്പെടണമെന്ന് ഖത്തര് ആവശ്യപ്പെട്ടു. തെക്കന് ലെബനനിലെ യു.എന് സമാധാന സേനയും (UNIFIL) ആക്രമണത്തെ ശക്തമായി അപലപിച്ചിട്ടുണ്ട്.
മാര്ച്ച് 2-ന് സംഘര്ഷം ആരംഭിച്ചതുമുതല് ഇതുവരെ അന്പതിലധികം ലെബനന് സൈനികര് കൊല്ലപ്പെട്ടിട്ടുണ്ടെങ്കിലും, ഇത്രയും ഉയര്ന്ന റാങ്കിലുള്ള ഒരു ജനറല് കൊല്ലപ്പെടുന്നത് ഇതാദ്യമായാണെന്ന് മാധ്യമങ്ങള് റിപ്പോര്ട്ട് ചെയ്യുന്നു.
തുടരുന്ന വ്യോമാക്രമണങ്ങള്
ശനിയാഴ്ച സിദോന് ജില്ലയിലെ സക്സാകിയ ഗ്രാമത്തില് ഇസ്രായേല് നടത്തിയ വ്യോമാക്രമണത്തില് ആറ് പേര് കൊല്ലപ്പെടുകയും നാല് പേര്ക്ക് പരിക്കേല്ക്കുകയും ചെയ്തതായി ലെബനന്റെ ഔദ്യോഗിക വാര്ത്താ ഏജന്സി (NNA) റിപ്പോര്ട്ട് ചെയ്തു. നബാത്തിയ ജില്ലയിലെ ദെയര് അല്-സഹ്റാനിയില് കാറിന് നേരെയുണ്ടായ ഡ്രോണ് ആക്രമണത്തിലും മറ്റ് വിവിധ ഇടങ്ങളിലായുമായി കൂടുതല് ആളുകള് കൊല്ലപ്പെട്ടു. തെക്കന് ലെബനനിലെ നിരവധി ഗ്രാമങ്ങളിലുള്ളവരോട് ഒഴിഞ്ഞുപോകാന് ഇസ്രായേല് വീണ്ടും ഉത്തരവിട്ടിട്ടുണ്ട്.
കഴിഞ്ഞ രണ്ട് ദിവസത്തിനിടെ തെക്കന് ലെബനനിലെ 150-ഓളം ഹിസ്ബുള്ള ലക്ഷ്യങ്ങള് തകര്ത്തതായി ഇസ്രായേല് അവകാശപ്പെട്ടു. ഇതേസമയം, തെക്കന് ലെബനനില് തങ്ങളുടെ രണ്ട് സൈനികര് കൊല്ലപ്പെട്ടതായി ഇസ്രായേല് സൈന്യവും സ്ഥിരീകരിച്ചു. ബിന്ത് ജ്ബെയ്ല് മേഖലയിലെ ഇസ്രായേല് സൈനിക പോസ്റ്റിന് നേരെ ഡ്രോണ് ആക്രമണം നടത്തിയതായി ഹിസ്ബുള്ളയും അറിയിച്ചു.
മാര്ച്ച് ആദ്യം മുതല് ആരംഭിച്ച ഇസ്രായേല് ആക്രമണങ്ങളില് ലെബനനില് ഇതുവരെ 3,593 പേര് കൊല്ലപ്പെടുകയും 10,990 പേര്ക്ക് പരിക്കേല്ക്കുകയും ചെയ്തിട്ടുണ്ടെന്നാണ് ലെബനന് ആരോഗ്യ മന്ത്രാലയത്തിന്റെ കണക്കുകള് വ്യക്തമാക്കുന്നത്.
Israeli attacks in Lebanon kill 12 people, including high-ranking officers
Latest News
More Stories
All Rights Reserved © 2022