ഹൈദരാബാദിൽ എഐഎംഐഎം നേതാവിനെ കുത്തിക്കൊന്നു

ഹൈദരാബാദിൽ എഐഎംഐഎം നേതാവിനെ അജ്ഞാത സംഘം കുത്തിക്കൊലപ്പെടുത്തി. എഐഎംഐഎം ഏരിയ പ്രസിഡന്റ് മെഹ്ബൂബ് അലിയാണ് കൊല്ലപ്പെട്ടത്. ഞായറാഴ്ച രാത്രി വട്ടേപ്പള്ളിയിലെ ഗുണ്ടൽ ഷാ ബാബ ദർഗയ്ക്ക് സമീപമായിരുന്നു ആക്രമണം.

ന്യൂസ്ടാഗ് വാര്‍ത്തകള്‍ വാട്‌സാപ്പില്‍ കിട്ടും >>

രാത്രി പത്ത് മണിയോടെയാണ് ആറോളം പേരടങ്ങുന്ന സംഘം മെഹ്ബൂബ് അലിയെ ആക്രമിച്ചതെന്നാണ് പൊലീസിന്റെ പ്രാഥമിക വിവരം. ഗുരുതരമായി പരിക്കേറ്റ അദ്ദേഹത്തെ ഉടൻ ആശുപത്രിയിൽ എത്തിച്ചെങ്കിലും ചികിത്സയ്ക്കിടെ മരിക്കുകയായിരുന്നു.

ആക്രമണത്തിന്റെ കൃത്യമായ കാരണം ഇതുവരെ വ്യക്തമായിട്ടില്ല. സംഭവത്തിന് പിന്നിൽ രാഷ്ട്രീയ തർക്കമുണ്ടെന്നോ മെഹ്ബൂബ് അലിയുടെ രാഷ്ട്രീയ പ്രവർത്തനങ്ങളുമായി കൊലപാതകത്തിന് ബന്ധമുണ്ടെന്നോ പൊലീസ് സ്ഥിരീകരിച്ചിട്ടില്ല.

കൊലപാതകം അന്വേഷിക്കുന്നതിനായി പൊലീസ് മൂന്ന് സംഘങ്ങളെ നിയോഗിച്ചു. പ്രദേശത്തെ സിസിടിവി ദൃശ്യങ്ങൾ പരിശോധിക്കുന്നതിനൊപ്പം ദൃക്‌സാക്ഷികളിൽ നിന്ന് വിവരങ്ങളും ശേഖരിക്കുന്നുണ്ട്. പ്രതികളെ തിരിച്ചറിഞ്ഞ് പിടികൂടാനുള്ള ശ്രമങ്ങൾ തുടരുകയാണ്.

ഒന്നിലധികം പേർ ചേർന്ന് കത്തിയുമായി നടത്തിയ ആക്രമണമെന്ന റിപ്പോർട്ട് ഹൈദരാബാദിലെ പഴയ നഗരമേഖലയിൽ ആശങ്ക ഉയർത്തിയിട്ടുണ്ട്. ഈ വർഷം ഓൾഡ് സിറ്റിയിൽ ഇതുവരെ ആറ് കൊലപാതകങ്ങൾ നടന്നതായാണ് റിപ്പോർട്ട്.

News Tag Live യുട്യൂബ് ചാനല്‍ Subscribe ചെയ്യുക