06
Sep 2026
Sun
തെങ്കാശി: തമിഴ്നാട്ടിലെ തെങ്കാശി-നെല്ലൈ മേഖലയില് ഭീതി പടര്ത്തി വീണ്ടും തലയറുത്തുള്ള കൊലപാതകം. കടയം പൊട്ടല്പ്പുതൂരില് 26 വയസ്സുള്ള നിര്മ്മാണ തൊഴിലാളിയെ തലയറുത്ത് കൊലപ്പെടുത്തിയ കേസില് രണ്ടുപേരെ ആള്വാര്കുറിച്ചി പോലീസ് അറസ്റ്റ് ചെയ്തു. കഴിഞ്ഞ 33 ദിവസത്തിനിടെ ഈ മേഖലയില് റിപ്പോര്ട്ട് ചെയ്യപ്പെടുന്ന മൂന്നാമത്തെ സമാന സംഭവമാണിത്.
 |
|
പൊട്ടല്പ്പുതൂര് സ്വദേശി എല്. സന്തോഷ് ബാലമുരുകന് (26) ആണ് കൊല്ലപ്പെട്ടത്. സംഭവവുമായി ബന്ധപ്പെട്ട് ആലങ്കുളം സ്വദേശികളായ എസ്. കാര്ത്തിക് രാജ (22), അളിയന് പി. മുത്തരാശന് (24) എന്നിവരെ പോലീസ് അറസ്റ്റ് ചെയ്തു.
രണ്ടു വര്ഷം മുന്പ് മൃഗങ്ങളെ വേട്ടയാടുന്നതിനിടയിലുണ്ടായ തര്ക്കമാണ് കൊലപാതകത്തില് കലാശിച്ചതെന്നാണ് വിവരങ്ങള്. ബാലമുരുകന്റെ സുഹൃത്തിന്റെ കൃഷിയിടത്തില് പ്രതികള് മൃഗങ്ങളെ പിടിക്കാന് സ്ഫോടകവസ്തുക്കള് അടങ്ങിയ ഇര ഒളിപ്പിച്ചതിനെ ചൊല്ലിയായിരുന്നു ആദ്യ തര്ക്കം. പിന്നീട് നാടന് ഉത്സവങ്ങളിലും പൊതുചടങ്ങുകളിലും ഇവര് കണ്ടുമുട്ടുമ്പോഴൊക്കെ വാക്കുതര്ക്കം പതിവായിരുന്നു.
കഴിഞ്ഞ ആഴ്ച പ്രതികള് സഞ്ചരിച്ച ഇരുചക്രവാഹനം കൊണ്ട് ബാലമുരുകന്റെ ബൈക്കില് ഇടിപ്പിക്കാന് ശ്രമിച്ചിരുന്നു. ഇതേത്തുടര്ന്ന് ബാലമുരുകന് ഗ്രാമസഭയിലെ മുതിര്ന്നവരെ വിവരം അറിയിക്കുകയും അവര് പ്രതികളെ ശകാരിക്കുകയും ചെയ്തിരുന്നു. ഫോണിലൂടെയും ഇരുവരും പരസ്പരം ഭീഷണിപ്പെടുത്തിയിരുന്നു.
അപകടം മണത്ത ബാലമുരുകന് പൊട്ടല്പ്പുതൂരിലേക്ക് വരുന്നത് ഒഴിവാക്കുകയായിരുന്നു. എന്നാല് വെള്ളിയാഴ്ച കുട്ടിക്ക് സുഖമില്ലെന്ന വിവരമറിഞ്ഞ് നാട്ടിലെത്തിയപ്പോഴാണ് പ്രതികള് വധശിക്ഷ നടപ്പാക്കിയത്. തീപ തിടല് പ്രദേശത്തിന് സമീപം ബൈക്കില് വരികയായിരുന്ന ബാലമുരുകനെ തടഞ്ഞുനിര്ത്തി തലയറുത്തു കൊലപ്പെടുത്തിയ ശേഷം പ്രതികള് കടന്നുകളയുകയായിരുന്നു.
തെങ്കാശി എസ്.പി എസ്. അശോക് കുമാറിന്റെ നേതൃത്വത്തിലുള്ള പോലീസ് സംഘം സ്ഥലത്തെത്തി പ്രാഥമിക അന്വേഷണം നടത്തി. മൃതദേഹം തിരുനെല്വേലി മെഡിക്കല് കോളേജ് ആശുപത്രിയിലേക്ക് മാറ്റി.
നേരത്തെ, ഓഗസ്റ്റ് 3-ന് പൊട്ടല്പ്പുതൂരിന് 11 കിലോമീറ്റര് അകലെയുള്ള വിക്രമസിംഗപുരത്ത് എസ്. സോരിമുത്തു (30) എന്നയാളെയും, ഓഗസ്റ്റ് 30-ന് തിരുനെല്വേലി മണിമൂര്ത്തീശ്വരത്ത് ഭാസ്കര് (33) എന്ന പെയിന്ററെയും സമാനരീതിയില് സംഘം തലയറുത്ത് കൊലപ്പെടുത്തിയിരുന്നു.
Tags: Tenkasi News, Tenkasi Beheading Murder, Tamil Nadu Crime News, Alwarkurichi Police, Tirunelveli Crime News, Crime News Malayalam
News Tag Live യുട്യൂബ് ചാനല് Subscribe ചെയ്യുക
Latest News
Trending
More Stories
